လါစဲးပထ့ဘၢၣ်(၁)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တၢ်ဃုထၢထၢသုးကရူၢ်အံၤကရဲၣ်ကျဲၤမၤ၀ဲအံၤအပူၤ လ့ၤတက့ၤတၢ်သုတဆီၣ်ထွဲမၤစၢၤအီၤတဂ့ၤအဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆) ဘိးဘၣ်ရၤလီၤ၀ဲ အတၢ်အိၣ်ဆၢထၢၣ်လံၥ်တၢ်ပၥ်သး ဖဲလါအီကူၥ်(၃၀)သီအနံၤန့ၣ်လီၤ.
တၢ်ဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကရူၢ်လၢကရဲၣ်ကျဲၤမၤတၢ်ဃုထၢအံၤန့ၣ် စူးကါ၀ဲ တဖိးသဲစး တၢ်သူၣ်ထီၣ်ထံကီၢ်တၢ်ဘျၢသဲစးခိၣ်သ့ၣ်၂၀၀၈လၢအတၢ်လိၣ်ဘၣ်အသိး၀ံၤ မ့ၢ်ဒၣ် ကပၢဆူၣ်ပၢစိးဆီၣ်တံၢ်မၤနၢၤ ထံဖိကီၢ်ဖိကမျၢၢ်လၢ အယံၤအထၢကန့ၢ်အဂီၢ်အဂ့ၢ် စံး၀ဲန့ၣ်လီၤ.
သုးကရူၢ်အတၢ်ဃုထၢအယီၤအဘျၣ်အံၤန့ၣ် ထီဒါ၀ဲထံဖိကီၢ်ဖိကမျၢၢ်အတၢ်ပၥ်သး၀ံၤ ကမၤကမၣ်၀ဲ တၢ်မၤပျီၢ်မၤဂီၤ, တၢ်မၤပျံၤမၤဖူး, တၢ်ဖီၣ်န့ၢ်ဆူၣ်ဖီၣ်စိးတဖၣ်၀ံၤ ကရဲၣ်ကျဲၤမၤ၀ဲအဃိ တမ့ၢ်စ့ၢ်ကီးကျိၤကျဲလၢ ကဘှါရှဲန့ၢ် ကတီၢ်အံၤထံရူၢ်ကီၢ်သဲးတၢ်ဂ့ၢ်ကီဘၣ်အဂ့ၢ် KNU-သုးက့ ၆ အတၢ်အိၣ်ဆၢထၢၣ်လံၥ်တၢ်ပၥ်သးအပူၤ ပၥ်ဖျါဃၥ်၀ဲန့ၣ်လီၤ.
ကတီၢ်ခဲအံၤ တၢ်ဃုထၢန့ၣ် တၢ်ဟံးန့ၢ်ဆူၣ်ထံကီၢ်တၢ်စိတၢ်မီၤ သုးကီၣ်မံးရှၢၣ် သုးခိၣ်သုးနၢ်တဖၣ်ဒီးအပှၤဟံၣ်ဖိဃီဖိတဖၣ်, အပှၤတ၀ၢ, ပှၤလၢအမၤသကိးတၢ်အီၤဒီးတဖၣ် အထံရူၢ်ကီၢ်သဲးပၣ်တံၣ်တဖၣ် ကဒိးန့ၢ်တၢ်စိတၢ်ကမီၤအဂီၢ်လီၤ၀ံၤ တမ့ၢ်စ့ၢ်ကီး တၢ်ဃုထၢအတြီအတြၢ်ဘၣ်အသိး တၢ်ဘၣ်ဘျူးတအိၣ်၀ဲလၢ ကီၢ်ပယီၤထံဖိကီၢ်ဖိကမျၢၢ်ခဲလၢၥ်အဂီၢ်နီတမံၤဘၣ်အဂ့ၢ် စံး၀ဲန့ၣ်လီၤ.
တၢ်ဘူၣ်တၢ်ဘါခိၣ်နၢ်တဖၣ်, ပှၤတ၀ၢတၢ်ကရၢကရိတဖၣ်, NGOs ၊ INGOsတဖၣ်လၢအိၣ်ဖဲ ခ့ၣ်အဲၣ်ယူၣ်-သုးက့(၆)ဟီၣ်က၀ီၤပူၤတဖၣ်တခီ နီၢ်တဂၤစုၥ်စုၥ်မ့ၢ်ဂ့ၤ, တၢ်ကရၢကရိတဖုစုၥ်စုၥ်မ့ၢ်ဂ့ၤ လ့ၤတက့ၤ တၢ်သုတပၣ်ဃုၥ်ပၣ်ဂီၢ်ဆီၣ်ထွဲမၤစၢၤ သုးကရူၢ်အံၤအတၢ်ဃုထၢအပူၤတဂ့ၤအဂ့ၢ် ဟ့ၣ်သဆၣ်ထီၣ်ဃၥ်၀ဲန့ၣ်လီၤ.
တၢ်ကရၢကရိတဖုစုၥ်စုၥ်မ့ၢ်ဂ့ၤ, ပှၤနီၢ်တဂၤစုၥ်စုၥ်မ့ၢ်ဂ့ၤ တၢ်မ့ၢ်တလူၤပိၥ်မၤထွဲ ခ့ၣ်အဲၣ်ယူၣ်-သုးက့(၆)အတၢ်ဘိးဘၣ်သ့ၣ်ညါဟ့ၣ်သဆၣ်ထီၣ်ဘၣ်န့ၣ် တၢ်ကဟံးန့ၢ်ဂ့ၢ်၀ီတုၤလီၤတီၤလီၤ ဒ် ကီၢ်သူလ့ၤတၢ်ဘျၢသဲစးအသိးအဂ့ၢ် ဒုးသ့ၣ်ညါဘိးဘၣ်ရၤလီၤဃၥ်၀ဲအဒိၣ်အယိၥ်န့ၣ်လီၤ.
