လါစဲးပထ့ဘၢၣ်(၁)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးကီၢ်မံးရှၢၣ်အသုး ဆှၢထီၣ်အသုးအဂံၢ်အဘါအါအါဂီၢ်ဂီၢ်ဆူ တနီသရံၣ်ကီၢ်ခီ, ကီၢ်ရ့ၣ်ဒ၀ဲၢ်, ၀့ၢ်မတါသုးတၢ်တိၥ်ကူၣ်ကျဲၤခိၣ်သ့ၣ်အဂ့ၢ်န့ၣ် ဒ၀ဲၢ်ကီၢ်ရ့ၣ်သုးပၥ်ဖှိၣ် ပှၤဘၣ်မူဘၣ်ဒါတဂၤ စံး၀ဲန့ၣ်လီၤ.
တၢ်ဆှၢထီၣ် စကခ(၈)အစုတီၤဖီလၥ် အပှၤသုးဖိတဖၣ်လၢ ၀့ၢ်ဒ၀ဲၢ်ဆူ၀့ၢ်မတါတကးဘၣ် စုက၀ဲၤဒီးတၢ်အီၣ်တၢ်အီတဖၣ်စ့ၢ်ကီး ဟဲတီၣ်၀ဲအဂ့ၢ်န့ၣ် ပှၤဘၣ်မူဘၣ်ဒါတဖၣ် စံး၀ဲန့ၣ်လီၤ.
“ဆှၢစုက၀ဲၤဒီးတၢ်အီၣ်တၢ်အီတဖၣ်ဆူ ၀့ၢ်မတါလီၤ. ဟဲထီၣ်ဆူတၢ်မဲၥ်ညါတန့ၢ်ဘၣ်အဃိ မၤအါထီၣ်၀ဲသုးအဂံၢ်အဘါ”အဂ့ၢ် ဒ၀ဲၢ်ကီၢ်ရ့ၣ်သုးပၥ်ဖှိၣ် ပှၤဘၣ်မူဘၣ်ဒါ တဲနၢ်ပၢၢ်၀ဲ သုးကီၢ်မံးရှၢၣ်အသုးတၢ်အိၣ်သးန့ၣ်လီၤ.
လါအီကူၥ် သၢနွံတနွံအတီၢ်ပူၤန့ၣ် သုးကီၣ်မံးရှၢၣ် သိလ့ၣ်ကျိၤလၢတီၣ်စုက၀ဲၤဒီးတၢ်အီၣ်တၢ်အီ(၁၀)ခိၣ်လၢလဲၤဆူ ၀့ၢ်မတါတပၤအံၤDNLAတီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ်ဒုးအီၤဖဲသယဲးခၠီဟီၣ်က၀ီၤ,မိရွ့ၣ်ကိဒီးစီၣ်ဖၠါသ၀ီအကပၤ၀ံၤ မၤဟးဂီၤကွံၥ်၀ဲ သိလ့ၣ်တဖၣ်အသိး မၤန့ၢ်၀ဲစ့ၢ်ကီး စုက၀ဲၤဒီးသုးတၢ်ပီးတၢ်လီတဖၣ်န့ၣ်လီၤ.
လၢတၢ်န့ၣ်အဃိ ဖဲလါအီကူၥ်(၂၉)သီလံၤလံၤန့ၣ် ဆှၢထီၣ်စကခ(၈)အစုတီၤဖီလၥ်အသုးလၢသိလ့ၣ်ကျိၤတဖၣ်၀ံၤ တၢ်တယၥ်အဖီခိၣ် အဂံၢ်အညါအိၣ်၀ဲ ၅၀၀ဃၣ်ဃၣ်အဂ့ၢ် လီၢ်က၀ီၤပူၤဂံၢ်ခီၣ်ထံးတၢ်ပၢၢ်ဆၢသုးတဖၣ် စံး၀ဲန့ၣ်လီၤ.
‘ကတီၢ်ခဲအံၤတခီ ဖဲန့ၣ်တပၤန့ၣ် တၢ်တယၥ်အဖီခိၣ် အဂံၢ်အဘါကအိၣ်၀ဲ(၅၀၀)ဃၣ်ဃၣ်န့ၣ်လီၤ. သိလ့ၣ်(၁၀)ခိၣ်ပၣ်သုးလ့ၣ်ကျိၤတခီ တၢ်ဒုးကဲထီၣ်အဃိ ဘၣ်တၢ်ဒွဲၣ်အူကွံၥ်အီၤလံ. အခဲအံၤသိလ့ၣ်ကျိၤတခီ အပၣ်ပှဲၤခိၣ်လဲၣ်တခီ တဲလီၤတံၢ်တသ့ဘၣ်အဂ့ၢ်” ဂံၢ်ခီၣ်ထံးတၢ်ပၢၢ်ဆၢသုးတဂၤ စံး၀ဲန့ၣ်လီၤ.
တကးဘၣ် ဟဲဆီလီၤဃၥ်၀ဲစ့ၢ်ကီး သုးကဘီ၃ခိၣ်လၢ ဒ၀ဲၢ်ကဘီသန့ၤဒီး မီမကၣ်ပီၣ်လဲၣ်နံၤအဘၢၣ်စၢၤ ပီၣ်လဲၣ်ဟီၣ်က၀ီၤအပူၤ၀ံၤ တခိၣ်န့ၣ် အဂံၢ်အဘါကအိၣ်၀ဲတုၤ(၁၀၀)ဃၣ်ဃၣ်အဂ့ၢ်, အပူၤကွံၥ်န့ၣ် ဖဲဟီၣ်က၀ီၤအပူၤ ထဲဒၣ်သုးကဘီတခိၣ် ဟးဆှၣ်၀ဲအဂ့ၢ် စံးကဒီး၀ဲန့ၣ်လီၤ.
ကတီၢ်ခဲအံၤန့ၣ် သုးကီၣ်မံးရှၢၣ်အပှၤသုးဖိဂံၢ်ဘါ(၂၀၀)ဃၣ်ဃၣ်လၢ ဟဲဒိးပိၥ်သိလ့ၣ်(၁၀)ခိၣ်သုလ့ၣ်ကျိၤလၢ ဟဲတီၣ်စုက၀ဲၤဒီးတၢ်အီၣ်တၢ်အီတဖၣ် ဘၣ်တၢ်ဒုးမၤဟးဂီၤကွံၥ်အီၤ၀ံၤအလီၢ်ခံ လဲၤပၥ်ဖှိၣ်ထီၣ်အသးဆူ ၀့ၢ်မတါသုးတၢ်တိၥ်ကူၣ်ကျဲၤအလီၢ်အဂ့ၢ် လီၢ်က၀ီၤဂံၢ်ခီၣ်ထံးတၢ်ပၢၢ်ဆၢတၢ်ကစီၣ်တဖၣ်စံး၀ဲအဖီခိၣ် တၢ်သ့ၣ်ညါဘၣ်န့ၣ်လီၤ.
