လါအီကူာ်(၂၉)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
အ့ဒံယါမုၫ်ထီၣ်ကလံၤစိးတကပၤ မံၣ်စိၣ်ရၣ်ကီၫ်စဲၣ်အပူၤ လၢကီၫ်ပယီၤတကပၤ ပှၤဘၣ်ကီဘၣ်ခဲဖိလၢဟဲဃ့ၫ်အိၣ်က ဒုအနီၫ်ဂံၫ်န့ၫ် အိၣ်ထီၣ်၀ဲ ၃၀,၀၀၀ဃၣ်ဃၣ်အဂ့ၫ် မံၣ်စိၣ်ရၣ် ထံလီၫ်ကီၫ်ပူၤကိတိာ်အတၫ်တဲလၢဘျီၣ်ဒိၣ်ပူၤအဖီခိၣ် The Statesmanတၫ်ကစီၣ်သန့ပာ်ဖျါ၀ဲ ဖဲလါအီကူာ်(၂၇)သီအနံၤန့ၣ်လီၤ.
လၢကီၫ်အဂၤတကပၤ တၫ်ဒုးဒီးတၫ်သဘံၣ်သဘုၣ်အဃိ တုၤလါအီကူာ်(၁၁)သီနံၤ လၢမံၣ်စိၣ်ရၣ်ကီၫ်စဲၣ်ပူၤ ပှၤကီၫ် ပယီၤဖိအနီၫ်ဂံၫ်ခဲလၢာ်ဟဲအိၣ်ကဒု၀ဲ ၂၉,၀၄၆ဂၤအဂ့ၫ် မံၣ်စိၣ်ရၣ်ကိတိာ်တဲ၀ဲလီၤ.
ပှၤကီၫ်ပယီၤဖိတၫ်နုာ်လီၤလၢမံၣ်စိၣ်ရၣ်ကီၫ်စဲၣ်ပူၤန့ၣ် ဖဲ၂၀၂၁နံၣ်အလီၫ်ခံ တၫ်သဘံၣ်သဘုၣ်အိၣ်ထီၣ်ဒီး ကလုာ် ဂ့ၫ်၀ီ,တၫ်ဆဲးတၫ်လၤတဖၣ်လီၤပလိာ်အသးအဃိ ခၠီဘၣ်ကီဘၣ်ခဲဖိလၢအကထိဂၤ လဲၤဃ့ၫ်အိၣ်ကဒုလၢမံၣ်စိၣ်ရၣ် တကပၤန့ၣ်လီၤ.
ကီၫ်ပယီၤဘၣ်ကီဘၣ်ခဲဖိလၢလဲၤတုၤဆူမံၣ်စိၣ်ရၣ်တဖၣ် ဘၣ်တၫ်တြီဃာ်တၫ်ဖံးအီၣ်မၤအီၣ်ခွဲးယာ်အသိး,တၫ်ဆီၣ်ထွဲ မၤစၢၤတအိၣ်ဘၣ်အဃိ ကွၫ်ဆၢၣ်မဲာ်ဘၣ်ဒီးတၫ်အိၣ်ဆိးအီၣ်အီအဂီၫ်န့ၣ်လီၤ.
ကီၫ်ပယီၤဘၣ်ကီဘၣ်ခဲတနီၤန့ၣ် အတၫ်ဖံးတၫ်မၤတဘၣ်လိာ်ဖိးဒ့ဘၣ်အဃိ ကူၣ်လဲၫ်မၤကၤဆါကသံၣ်တၫ်မူၤတၫ်ဘှီး ဒီးကျိတၫ်စုက၀ဲၤတဖၣ်အဂ့ၫ် ပှၤဟ့ၣ်မၤစၢၤတၫ်တဖၣ်တဲ၀ဲလီၤ.
ပှၤဘၣ်ကီဘၣ်ခဲဖိတဖၣ်န့ၣ် ဟးထီၣ်ဟးလီၤခွဲးယာ်တအိၣ်ဘၣ်အဃိ ဖဲဟးထီၣ်ဟးလီၤအကတီၫ် မၤ၀ဲအ့ဒံယါလံာ် ခိၣ်ဂီၤအယီၤအဘျၣ်အဃိ ဘၣ်တၫ်ဖီၣ်၀ဲအိၣ်အဂ့ၫ် ပှၤမၤစၢၤတၫ်တဖၣ်တဲ၀ဲလီၤ.
နီၫ်ဂံၫ်နီၫ်ဒွးဖိးသဲစးအဖီခိၣ် ပှၤကီၫ်ပယီၤဖိတဖၣ်န့ၣ် လၢမံၣ်စိၣ်ရၣ်ကီၫ်စဲၣ်,ဟီၣ်က၀ီၤ(၁၁)ဘ့ၣ်အပူၤ အိၣ်ရၤလီၤအသး ဒီးကီၫ်ဆၢဒီတကျိၤ ခၠၣ်ဖဲၣ်ဟီၣ်က၀ီၤပူၤတခီအိၣ်၀ဲအါကတၢၫ်ဒီး ပှၤနီၫ်ဂံၫ်အိၣ်၀ဲ(၁၃,၅၀၀)ဂၤဘျဲၣ်န့ၣ်လီၤ.
အ၀ဲသ့ၣ်တဖၣ်တၫ်ကမၤစၢၤ၀ဲအဂီၫ် တၫ်ကီတၫ်ခဲအိၣ်ဘၣ်ဆၣ် ဒူသ၀ီကမျၢၫ်ဒီးကီၫ်စဲၣ်ပဒိၣ်တကပၤ မၤစၢၤဆီၣ်ထွဲ ၀ဲဂ့ၫ်ခီၣ်ထံးတၫ်မၤစၢၤတဖၣ်အဂ့ၫ် တၫ်ကစီၣ်ပူၤ ပာ်ဖျါ၀ဲလီၤ.
လၢကတီၫ်အံၤ ကီၫ်စဲၣ်ပဒိၣ်န့ၣ် စးထီၣ်ဟံးန့ၫ်ထၢ၀ဲ ပှၤဘၣ်ကီဘၣ်ခဲဖိတဖၣ်အနီၫ်ကစၫ်တၫ်ဂ့ၫ်တၫ်ကျိၤလံအဂ့ၫ်တၫ် သ့ၣ်ညါဘၣ်လီၤ.
တၫ်ထၢစရီဒ်သိးအံၤန့ၣ် အတၫ်ပညိၣ်အိၣ်ဒ်လဲၣ်န့ၣ် တပာ်ဖျါ၀ဲဖျိဖျိဖျါဖျါဘၣ်အဃိ မ့ၫ်ဆှၢက့ၤ၀ဲဆူသုးကီၣ်ကးအိၣ်ဒု ဟံၣ်ဖိဃီဖိလၢအိၣ်တ့ၫ်လၢကီၫ်ပူၤတဖၣ်အဂီၫ် တၫ်ဘံၣ်တၫ်ဘၢတၫ်ပာ်ယိၣ်အိၣ်ထီၣ်၀ဲန့ၣ်လီၤ.
လၢတကပၤ တၫ်မ့ၫ်မၤနီၣ်ဃာ်နီၫ်ကစၫ်တၫ်ဂ့ၫ်တၫ်ကျိၤန့ၣ် တၫ်တြီ၀ဲကသံၣ်မူၤဘှီးလၢကီၫ်ပယီၤအကပၤ အတၫ်နုာ် လီၤဆူ မံၣ်စိၣ်ရၣ်ကီၫ်စဲၣ်ပူၤကန့ၫ်၀ဲအဃိ ပှၤတူၫ်လိာ်ဆီၣ်ထွဲ၀ဲအိၣ်န့ၣ်လီၤ.
မံၣ်စိၣ်ရၣ်ကီၫ်စဲၣ်အပူၤကွံာ်(၅)နံၣ်အတီၫ်ပူၤ ပှၤမၤကမၣ်ကွီၫ်မ့ၣ် ပှၤထံဂုၤကီၫ်ဂၤ (၄၆၀)ဂၤတၫ်ဖီၣ်န့ၫ်၀ဲဒီးလၢအကျါ အါတက့ၫ်မ့ၫ်ပှၤကီၫ်ပယီၤဖိတဖၣ်အဂ့ၫ် ထံလီၫ်ကီၫ်ပူၤကိတိာ်၀ဲၤကျိၤန့ၣ် ဖဲစှၤသီအတီၫ်ပူၤ ထုးထီၣ်ဘိးဘၣ်ရၤလီၤ ၀ဲလီၤ.
တၫ်အံၤမ့ၫ်ဖဲအပူၤကွံာ် ၂၀၂၀နံၣ်တုၤတနံၣ်အံၤ လါမ့ၤအတီၫ်ပူၤ ဖီၣ်၀ဲန့ၫ်ဒီး လီၫ်လၢလၢ ပံၣ်ရူ ၇၇၀.၉၅ကဘီအဃိ တၫ်အံၤမ့ၫ်တၫ်ခီထံခီကီၫ်မၤကမၣ်ကွီၫ်မ့ၣ်အဂ့ၫ် အိၣ်ဖျါ၀ဲန့ၣ်လီၤ.
ထံဂုၤကီၫ်ဂၤပှၤမၤကမၣ်ကွီၫ်မ့ၣ်လၢတၫ်ဖီၣ်န့ၫ်၀ဲ ၄၆၀ဂၤအကျါ ပှၤကီၫ်ပယီဖိပာ်ဃုာ် ၄၃၉ဂၤဒီးမ့ၫ်အအါကတၢၫ်၀ံၤ ပှၤဘ့ကလါဒ့းရှ်ဖိ(၁၈)ဂၤ,အိၣ်တ့ၫ်န့ၣ်မ့ၫ်ထံဂုၤကီၫ်ဂၤတဖၣ်ဒီးကူၣ်လဲၫ်မၤကၤတၣ်မူၤတၫ်ဘှီး,ကျိတၫ်စုက၀ဲၤဒီးမၤကမၣ်တၫ်အိၣ်ဆိးအဂီၫ် ဘံၣ်စၣ် ပာ်ဃုာ်၀ဲန့ၣ်လီၤ.
Source: The Statesman News
