လါအီကူၥ်(၂၉)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးမုၢ်ဒိၣ်လၢ အမၤသံမၤ၀ီထံဖိကီၢ်ဖိကမျၢၢ်ဒီး ပှၤမၤကမၣ်ဟီၣ်ခီၣ်ဒီဖျၢၣ်သုးကွီၢ်မ့ၣ်တဖုအံၤ အဘိးဘၣ်ရၤလီၤလၢ KNU မ့ၢ်တၢ်မၤပျီၢ်မၤဂီၤကရၢန့ၣ် မ့ၢ်ဒၣ်” တၢ်ဘျၣ်က့ၤဃါက့ၤ ပှၤကညီ”အဃိ တလိၣ်ကနၣ်ဃုၥ်အီၤဘၣ်အဂ့ၢ် KNU လီၢ်ခၢၣ်သးထီဘိကမံးတံၥ်ဒီး ပှၤကတိၤတၢ်ပၢ ပဒိၣ်စီၤတီနံ တဲခီၣ်ဆၢက့ၤ၀ဲန့ၣ်လီၤ.
တၢ်မၤပျီၢ်မၤဂီၤသုးမုၢ်ဒိၣ်လၢဘၣ်တၢ်တီခိၣ်ရိၣ်မဲအီၤလၢ မ့အီၣ်လဲၣ်တဖုအံၤ ထုးထီၣ်ဘိးဘၣ်ရၤလီၤ၀ဲ KNU မ့ၢ် ကရၢတဖိးသဲစးဒီး တၢ်မၤပျီၢ်မၤဂီၤကရၢ ဖဲ၂၀၂၅နံၣ်, လါအီကူၥ်(၂၈)သီအနံၤ ဟါလီၤခီန့ၣ်လီၤ.
မ့ၣ်အီၣ်လဲလၢအဘိးဘၣ်ရၤလီၤဃၥ်၀ဲ အနီၢ်ကစၢ်ဒ် ပတြီၤကီၢ်ခိၣ်အံၤ KNUန့ၣ် ဒုးကဲထီၣ်တၢ်မၤတံၥ်တၢ် လၢထံကီၢ်တၢ်ဘျၢသဲစးတၢ်ဒိၣ်စိဂ့ၢ်၀ီမ့ၢ်ဂ့ၤ,ထံကီၢ်တၢ်အိၣ်ဂၢၢ်အိၣ်ကျၢၢ်ဒီးထံဖိကီၢ်ဖိကမျၢၢ်အတၢ်မုၥ်တၢ်ခုၣ်အဂီၢ်မ့ၢ်ဂ့ၤအဃိ တဖိးသဲစးကရၢ တၢ်ဘျၢသဲစးအဆၢဒိၣ် ၁၆ အဖီခိၣ် ဘိးဘၣ်ရၤလီၤ၀ဲKNUမ့ၢ်တဖိးသဲစးကရၢအသိးအဂ့ၢ်, တကးဘၣ် မီၤစိရိၤအစုတီၤဖီလၥ် လီၢ်ခၢၣ်သးတၢ်ဒုးလီၤပှီၢ်တၢ်မၤပျီၢ်မၤဂီၤကရၢစ့ၢ်ကီး ဘိးဘၣ်ရၤလီၤကဒီးလၢ KNUမ့ၢ် တၢ်မၤပျီၢ်မၤဂီၤကရူၢ်အသိးန့ၣ်လီၤ.
ခီဖျိလၢ KNUန့ၣ် တၢ်ဒုးလီၤပှီၢ်တၢ်မၤပျီၢ်မၤဂီၤတၢ်ဘျၢသဲစးအဖီခိၣ် တၢ်မၤပျီၢ်မၤဂီၤတဖၣ်ဒ်အမ့ၢ် ဒိးလီၤမ့ၣ်ပိၢ်မၤဟးဂီၤကွံၥ် ထံဖိကီၢ်ဖိကမျၢၢ်အါအါဂီၢ်ဂီၢ်စူးကါ၀ဲ ကျဲ,တိၤတဖၣ်, ဒုးခးလီၤ၀ဲကျိဖးဒိၣ်တဖၣ်ဆူ ကမျၢၢ်အိၣ်အါ၀့ၢ်ဒီးဒူသ၀ီတဖၣ်, ဒုးတ့ၢ်လီၤ Drop Bombတဖၣ်, မၤသံကမျၢၢ်လၢတၢ်ကမၣ်တအိၣ်တဖၣ်, ထၢဖှိၣ်ဆူၣ်သုးသီ, မၤဟးဂီၤထံကီၢ်ပၢ တၢ်သူၣ်ထီၣ်, လ့ၣ်ဧိၤလီဧိၤ, စဲးဖီကဟၣ်တၢ်ပီးတၢ်လီဒီးတၢ်ဖိတၢ်လံၤတဖၣ်၀ံၤ မၤကမၣ်၀ဲ တၢ်မၤပျီၢ်မၤဂီၤတၢ်ဖံးတၢ်မၤတဖၣ်ဖဲ ထံကီၢ်ပူၤအဂ့ၢ် လီၢ်ခၢၣ်သးတၢ်ဒုးလီၤပှီၢ်တၢ်မၤပျီၢ်မၤဂီၤကရၢ ဘိးဘၣ်ရၤလီၤဃၥ်၀ဲန့ၣ်လီၤ.
မ့ၣ်အီၣ်လဲဒီး တၢ်မၤပျီၢ်မၤဂီၤသုးမုၢ်ဒိၣ် အတၢ်ဘိးဘၣ်ရၤလီၤန့ၣ် မ့ၢ်ဒၣ်” တၢ်ဘျၣ်က့ၤဃါက့ၤ ပှၤကညီ”လီၤအဂ့ၢ်, ကတီၢ်ခဲအံၤန့ၣ်ဟီၣ်ခိၣ်ဘီမုၢ်ဒီးဟီၣ်ခိၣ်အမဲၥ်သၣ်အဖီခိၣ်ပယီၤသုးမုၢ်ဒိၣ်အံၤမ့ၢ်ကရၢတဖုလၢအမၤပျီၢ်မၤဂီၤတၢ်နီၢ်နီၢ်အဂ့ၢ်န့ၣ် ဟီၣ်ခိၣ်ဘီမုၢ်စံၣ်ညီၣ်ပီတ့ၣ်၀ဲၤဒၢးတဖၣ်လၢအမ့ၢ် ICJ , ICCဒီး အၣ်ကၠ့ၣ်တံနါစံၣ်ညီၣ်ပီတ့၀ဲၤဒၢးတဖၣ်အပူၤ တၢ်လိၥ်ဘၢလိၥ်ကွီၢ်ဃၥ် သုးမုၢ်ဒိၣ်ဒီး သုးခိၣ်သုးနၢ်တဖၣ် လၢသုးကွီၢ်မ့ၣ်အဖီခိၣ် တၢ်ဒုးနဲၣ်တခါလီၤအဂ့ၢ် ပဒိၣ်စီၤတီနံ စံး၀ဲန့ၣ်လီၤ.
အပတီၢ်တထီၣ်ဘးလၢ “တၢ်လီတၢ်၀့ၤလၢအလီၤရၢၢ်လီၤစၢၢ်၀ံၤ တၢ်ဘျၣ်က့ၤဃါက့ၤ ပှၤကညီ” “စကမ”အဃိ တလိၣ်လၢပကဘၣ်ကနၣ်ဃုၥ်အီၤဘၣ်အဂ့ၢ်,ပှၤမၤပျီၢ်မၤဂီၤတၢ်နီၢ်နီၢ်ဒီးဟီၣ်ခိၣ်ဒီဖျၢၣ်အပတီၢ်ပှၤမၤကမၣ်သုးကွီၢ်မ့ၣ်န့ၣ် အကဲမတၤလဲၣ်, ပှၤလၢအဘိးဘၣ်ရၤလီၤ တဖိးသဲစးကရၢန့ၣ် အကဲမတၤတဖၣ်လဲၣ်အဂ့ၢ်န့ၣ် တၢ်မ့ၢ်ကွၢ်လၢ တၢ်လိၥ်ဘၢလိၥ်ကွီၢ်ဃၥ်အ၀ဲသ့ၣ်လၢICJ,ICCဒီးအၣ်ကၠ့ၣ်တံနါစံၣ်ညီၣ်ပီတ့၀ဲၤဒၢးအဖီခိၣ်န့ၣ်တလိၣ်လၢဘၣ်ဒုးနဲၣ်ပၠးလီၤလီၤဆီဆီဘၣ်အဂ့ၢ်” ပဒိၣ်စီၤတီနံ စံး၀ဲန့ၣ်လီၤ.
တၢ်ဃုထၢလၢ သုးကီၣ်မံးရှၢၣ်ကရဲၣ်ကျဲၤမၤအံၤအဖီခိၣ် လ့ၤတက့ၤတတူၢ်လိၥ်၀ဲဘၣ်အဂ့ၢ်န့ၣ် KNU တပၤထုးထီၣ်ပၥ်ဖျါဃၥ်၀ဲ အတၢ်ပၥ်သးန့ၣ်လီၤ.
