လါအီကူၥ်(၂၉)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကၣ်ကၠံၣ်ကံၣ်ကလံၤမုၢ်အူတၢ်၀ံၤအလီၢ်ခံ ကီၢ်ကၠီၣ်တဲၣ်ကလံၤစိးတပၤ မူခိၣ်စူၤဒိၣ်၀ံၤဟီၣ်ခိၣ်လၥ်ကဲထီၣ်၀ဲအဃိ လါအီကူၥ်(၂၈)သီအနံၤ, ဂီၤအဆၢကတီၢ် ပှၤဘၣ်သံအိၣ်ထီၣ်တုၤ(၅)ဂၤ၀ံၤ ပှၤလၢလီၤမၢ်၀ဲတဖၣ်စ့ၢ်ကီးအိၣ်၀ဲအဂ့ၢ် ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဃၥ်၀ဲအဖီခိၣ်တၢ်သ့ၣ်ညါဘၣ်န့ၣ်လီၤ.
ခီဖျိကလံၤမုၢ်အဃိ ကၠီၣ်တဲၣ်ကလံၤစိးဒီးမုၢ်ထီၣ်ကလံၤစိးကီၢ်တဖၣ်လၢအမ့ၢ် ကံၢ်မဲ, ခၠ့ရဲၣ်, မဲၢ်ဟီၣ်ဆီၣ်ကီၢ်ရ့ၣ်တဖၣ်ပၣ်ဃုၥ် ကီၢ်ရ့ၣ်(၁၂)ဘ့ၣ်အပူၤ ထံဒိၣ်နိယွၤ, ဟီၣ်ခိၣ်လၥ်တဖၣ် ကဲထီၣ်၀ဲဒိၣ်ဒိၣ်မုၢ်မုၢ်၀ံၤ ကျဲမုၢ်ကျဲဘိ, တိၤတဖၣ်စ့ၢ်ကီး ဘၣ်ဟးဂီၤကွံၥ်၀ဲအဂ့ၢ် ပှၤဘၣ်မူဘၣ်ဒါတဖၣ်စံး၀ဲန့ၣ်လီၤ.
ထံဒိၣ်ဒီးဟီၣ်ခိၣ်လၥ်အဃိ ဟံၣ်ဃီပၥ်ဖှိၣ် (၁၈၀၀)ဃၣ်ဃၣ် ဘၣ်ဟးဂီၤကွံၥ်၀ဲ၀ံၤ ပှၤခဲလၢၥ်ပၥ်ဖှိၣ် (၆၃၀၀)ဘျဲၣ် ဘၣ်ဒိ၀ဲအဂ့ၢ် ကၠီၣ်တဲၣ်တၢ်ဒီသဒၢတၢ်လီၤဘၣ်ယိၣ်၀ဲၤကျိၤ(DDPM) ထုးထီၣ်ပၥ်ဖျါ၀ဲန့ၣ်လီၤ.
၀့ၢ်ကံၢ်မဲအပူၤ ခီဖျိဟီၣ်ခိၣ်လၥ်အဃိ ပှၤဘၣ်သံ(၄)ဂၤ၀ံၤ မ့မ့ၢ်လၢ မဲၢ်ဟီၣ်ဆီၣ်တခီ ပှၤ(၁)ဂၤလီၤထွံလၢထံဒီးသံ၀ဲအဂ့ၢ် ထံလီၢ်ကီၢ်ပူၤ၀ဲၤကျိၤ စံး၀ဲန့ၣ်လီၤ.
တကးဘၣ် ၀့ၢ်ကံၢ်မဲအပူၤ ခီဖျိဟီၣ်ခိၣ်လၥ်အဃိ ပှၤလၢလီၤမၢ်(၅)ဂၤဒီး ပှၤ(၂)ဂၤလၢ လီၤထွံလၢထံတဖၣ် တၢ်ဃုထံၣ်အီၤအဖၢမုၢ်ဒံးလီၤဒီး ပှၤ(၁၅)ဂၤတခီ ဘၣ်ဒိဘၣ်ထံး၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ကီၢ်ရ့ၣ်မဲၢ်ဟီၣ်ဆီၣ်အပူၤစ့ၢ်ကီး ခီဖျိထံလုၢ်ဘၢတၢ်အဃိ ကျဲဒီးတိၤတဖၣ်ဘၣ်ဟးဂီၤကွံၥ်၀ဲအသိး ပှၤ(၂)ဂၤလီၤမၢ်၀ဲအဖၢမုၢ်ဒံးလီၤအဂ့ၢ် ပၥ်ဖျါဃၥ်၀ဲန့ၣ်လီၤ.
မဟါအနံၤ, လါအီကူၥ်(၂၈)သီအနံၤ ကီၢ်ရ့ၣ်(၈)ဘ့ၣ်အပူၤ ထံဒိၣ်ဒံး၀ဲအဖၢမုၢ်လီၤ၀ံၤ ပှၤ(၆၀၀၀)ဘျဲၣ် ဘၣ်သုးကစီၤအီၤဆူ တၢ်လီၢ်လၢအပူၤဖျဲးအလီၢ်အဂ့ၢ် ထံလီၢ်ကီၢ်ပူၤကိတိၥ် စံး၀ဲန့ၣ်လီၤ.
ကၣ်ကၠံၣ်ကံၣ်ကလံၤမုၢ်အံၤ ဖဲလါအီကူၥ်(၂၅)သီအနံၤန့ၣ် နုၥ်လီၤအူတၢ်ဖဲကီၢ်ဘံၣ်ယဲးနၣ်အပူၤ၀ံၤ ကီၢ်ဘံၣ်ယဲးန့ၣ်အပူၤ ပှၤဘၣ်သံ၀ဲ(၇)ဂၤအဂ့ၢ် တၢ်ကစီၣ်တဖၣ်အပူၤ ပၥ်ဖျါဃၥ်၀ဲန့ၣ်လီၤ.
Ref: REUTERS, Thai Enquirer
