တၢ်ဒုးဆူၣ်လၢ ကီးတရံး-အ့ရှၢကျဲမုၢ်အဖိခိၣ်

လါအီကူၥ်(၂၈)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆), ကီးတရံး-ရၤမတံ အ့ရှၢကျဲမုၢ်အဖီခိၣ် တၢ်ဒုးဆူၣ်လၢ သုးခီၣ်မံးရှၢၣ်အသုးဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ်အဘၢၣ်စၢၤအဂ့ၢ် တၢ်သ့ၣ်ညါဘၣ်လၢဟီၣ်ခိၣ်မဲၥ်ဖံးခိၣ်တၢ်ကစီၣ်အအိၣ်န့ၣ်လီၤ.

သုးခီၣ်မံးရှၢၣ်အသုး အဲၣ်ဒိးက့ၤပၢဆှၢက့ၤ၀ဲ ကၠီၣ်တဲၣ်-ပယီၤတၢ်ကူၣ်လဲၢ်မၤကၤအဂီၢ်အရ့ဒိၣ်အံၤအဃိ အပှၤသုးတဖၣ် ဟဲဆီလီၤဃၥ်ခီၣ်တဃၣ်လၢ၀့ၢ်ကီးတရံး၀ံၤ မၤဒုးယၤရဲၣ်ကျဲၤလၢ သုးကျိၤ(၃)ကျိၤအဂ့ၢ် အ၀ဲစံး၀ဲန့ၣ်လီၤ.

သုးကျိၤတဖၣ်အံၤန့ၣ် မၤဒုးယၤရဲၣ်ကျဲၤ ဟဲထီၣ်သုးကျိၤ လၢကီးတရံး ဆူ အ့ရှၢကျဲမုၢ်, ကီးတရံးဆူ တီနီၢ်ကစၢၢ်ကျဲမုၢ်လီၢ်လံၤတပၤဒီး ကြုၢ်တုဆူ ကီးတရံးတပၤန့ၣ်လီၤ.

သုးခီၣ်မံးရှၢၣ်အသုးလၢအိၣ်ဖဲ ကီးတရံး၀့ၢ်ပူၤ တကးဘၣ် သုးကျိၤတဖၣ်စ့ၢ်ကီး စူးကါ၀ဲ ဒြိဒီးကျိဖးဒိၣ်တဖၣ်၀ံၤ တ့ၢ်လီၤမ့ၣ်ပိၢ်, ခးလီၤတၢ်လၢတၢ်ဒုးကဲထီၣ်သးအလီၢ်အဂ့ၢ် ပှၤလၢသ့ၣ်ညါ၀ဲတၢ်မဲၥ်ညါတၢ်အိၣ်သးတနီၤ စံး၀ဲန့ၣ်လီၤ.

“ခံခီခံကပၤတၢ်ဒုးအပူၤ ခံကပၤလၢၥ် သံဒီးဘၣ်ဒိအိၣ်အါ၀ဲ”အဂ့ၢ် ပှၤလၢအိၣ်ဘူးဒီး KNLA တဂၤ စံး၀ဲန့ၣ်လီၤ.

၀့ၢ်ရၤမတံအနုၥ်လီၤ သုးခိး၀့ၢ်နီၣ်ဂံၢ် (၂၇၅)ခီၣ်သုးရ့ၣ်စ့ၢ်ကီး မၤအါထီၣ်ဃၥ်သုးအဂံၢ်အဘါဒီး သုးသီတဖၣ်အဂ့ၢ် တၢ်သ့ၣ်ညါဘၣ်လၢ KNLAဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ.

ဒ်န့ၣ်အသိး ကၠီၣ်တဲၣ်-ပယီၤကီၢ်ဆၢတၢ်ကူၣ်လဲၢ်မၤကၤအလီၢ် နီၣ်ဂံၢ်(၂) တၢ်ရ့လိၥ်မုၥ်လိၥ်တိၤလၢ သုးခီၣ်မံးရှၢၣ် ကးတံၥ်ဃၥ်တစိၢ်တလီၢ်အံၤအကပၤစ့ၢ်ကီး ရၤလီၤဃၥ်၀ဲ သုးအဂံၢ်အဘါ တစှၤန့ၣ်(၂၀၀)အဂ့ၢ် ပှၤ၀့ၢ်ဖိတဖၣ် စံး၀ဲန့ၣ်လီၤ.

မ့မ့ၢ်လၢ သုးခီၣ်မံးရှၢၣ်တပၤတခီ ဘၣ်ထွဲဒီး ရၤမတံ-ကီးတရံးအ့ရှၢကျဲမုၢ်အဖီခိၣ် တၢ်ဒုးတၢ်အိၣ်သးတဖၣ် ထုးထီၣ်ပၥ်ဖျါ၀ဲတအိၣ်နီတမံၤဒံးဘၣ်န့ၣ်လီၤ.

Ref: BBC