လါအီကူၥ်(၂၇)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးခီၣ်မံးရှၢၣ်အသုး ကရဲၣ်ကျဲၤမၤ၀ဲတၢ်ဃုထၢအံၤအဖီခိၣ် ကီၢ်ရ့ၣ်မုၢ်တြီၢ်, သုးက့နီၣ်ဂံၢ်(၅) ဘိးဘၣ်ရၤလီၤ၀ဲ အတၢ်အိၣ်ဆၢထၢၣ်လံၥ်ဘိးဘၣ်ရၤလီၤတဘ့ၣ်ဖဲ လါအီကူၥ်(၂၆)သီအနံၤန့ၣ်လီၤ.
တၢ်ဃုထၢလၢကရဲၣ်ကျဲၤမၤ၀ဲအံၤမ့ၢ်ဒ်သိးသုးမီၤစိရိၤကဒိးန့ၢ်ဘၣ်အဖိးသဲစးဒီးသုးမီၤစိရိၤအတၢ်အိၣ်မူအအၢအသီအဆၢကတီၢ်ကထီထီၣ်အဂီၢ်အဃိကီၢ်ရ့ၣ်မုၢ်တြီၢ်,သုးက့နီၣ်ဂံၢ်(၅)တခီတတူၢ်လိၥ်အီၤဘၣ်ဒီး လ့ၤတက့ၤတၢ်သုတပၣ်ဃုၥ်မၤသကိးတၢ်တဂ့ၤအဂီၢ် သုးက့နီၣ်ဂံၢ်(၅) ပၥ်ဖျါထီၣ်၀ဲအတၢ်ပၥ်သးန့ၣ်လီၤ.
တၢ်အိၣ်ဆၢထၢၣ်လံၥ်ဘိးဘၣ်ရၤလီၤအပူၤ တၢ်ဂ့ၢ်ပၣ်ဃုၥ်၀ဲ(၆)ထံၣ်ဒီး တၢ်ဂ့ၢ်လၢတၢ်ပၥ်ဖျါထီၣ်၀ဲတဖၣ် ပှၤလၢတဒိကနၣ်လူၤပိၥ်ထွဲ၀ဲဘၣ်န့ၣ်တၢ်ကကိးထံၣ်ဟ့ၣ်သ့ၣ်ညါနၢ်ပၢၢ်ဒီးဟ့ၣ်ပလီၢ်အီၤ,ပၢၤဃၣ်အီၤလၢတၢ်လီၢ်လၢအကြၢးအဘၣ်တတီၤတီၤဒီး တၢ်ကဒုးဟးထီၣ်ကွံၥ်အီၤလၢ ကီၢ်ရ့ၣ်မုၢ်တြီၢ်ဟီၣ်က၀ီၤအပူၤအဂ့ၢ် ဟ့ၣ်ပလီၢ်ဃၥ်၀ဲန့ၣ်လီၤ.
ပယီၤသုးမီၤစိရိၤကရဲၣ်ကျဲၤမၤ၀ဲတၢ်ဃုထၢအံၤ တမ့ၢ်ထံရူၢ်ကီၢ်သဲးအဖုကရၢခဲလၢၥ်တၢ်တၢၣ်ပီၣ်တဲသကိးအတၢ်ဘၣ်သးဘၣ်အမဲၥ်ညါတမ့ၢ်စ့ၢ်ကီးတၢ်လၢအဖိးမံးဒီးဖဲၣ်ဒရၢၣ်ဒံၣ်မိၣ်ကရ့ၣ်စံၣ်တၢ်ဘျၢခိၣ်သ့ၣ်ပၥ်လီၤကျဲသနူအသိးဘၣ်အဃိ တၢ်ဃုထၢ၀ဲအံၤတမ့ၢ်တၢ်မၤကတၢၢ်ကွံၥ်ထံရူၢ်ကီၢ်သဲးတၢ်ဂ့ၢ်ကီဘၣ်ဒီးတမ့ၢ်စ့ၢ်ကီးတၢ်ကဒိးန့ၢ်ကတီၢ်ယံၥ်တၢ်မုၥ်တၢ်ခုၣ်ဘၣ်အဂ့ၢ် လံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
တၢ်ဃုထၢအံၤပှၤလၢအကြၢးပၣ်ဃုၥ်ပၥ်ဂီၢ်ဒ်အမ့ၢ်ထံရူၢ်ကီၢ်သဲးအဖုအကရၢတဖၣ်,ကလုၥ်ဒူၣ်စုက၀ဲၤတၢ်ပၢၢ်ဆၢအကရူၢ်တဖၣ်ဃုၥ်ဒီးကမျၢၢ်ထံဖိကီၢ်ဖိတဖၣ်တပၣ်ဃုၥ်ဘၣ်အမဲၥ်ညါမ့ၢ်ဒၣ်တၢ်ဃုထၢလၢသုးမီၤစိရိၤအဖုဧိၤကမၤ၀ဲဒ်အတၢ်လိၣ်ဘၣ်အဂီၢ်အဂ့ၢ် စံး၀ဲန့ၣ်လီၤ.
တကးဘၣ်တၢ်ဃုထၢအံၤတမ့ၢ်လၢအတြီအတြၢ်ဘၣ်အဃိ အတၢ်ကဲဘျူးကဲဖှိၣ်ကမ့ၢ်ဒၣ်သုးမီၤစိရိၤအခိၣ်အနၢ်ဒီးအဒူၣ်ဖိထၢဖိဒီး(ပၣ်တံၣ်)လၢအဆီၣ်ထွဲဟ့ၣ်ဂံၢ်ဟ့ၣ်ဘါအီၤတဖၣ်အဂီၢ်, မ့မ့ၢ်ပ၀ဲကလုၥ်ဒူၣ်ဒီးကမျၢၢ်ဖံဖိကီၢ်ဖိတဖၣ် အတၢ်ကဲဘျူးကဲဖှိၣ်တအိၣ်၀ဲနီတမံၤဘၣ်အဂ့ၢ်စ့ၢ်ကီး စံး၀ဲန့ၣ်လီၤ.
လၢတၢ်န့ၣ်အဃိ ကမျၢၢ်ထံဖိကီၢ်ဖိ, ပှၤဖီၣ်စုက၀ဲၤပၢၢ်ဆၢတၢ်ကရူၢ်,ထံရူၢ်ကီၢ်သဲး(ပၣ်တံၣ်)ဒီးပှၤဂ့ၢ်၀ီကရူၢ်ကရၢ(CBOs, CSOs)ဒီးတၢ်ဘူၣ်တၢ်ဘါခိၣ်နၢ်ခဲလၢၥ်လၢအအိၣ်လၢကီၢ်ရ့ၣ်မုၢ်တြီၢ်,သုးက့(၅)ဟီၣ်က၀ီၤပူၤတဖၣ်,လၢကျဲလိၤလိၤမ့ၢ်ဂ့ၤ, လၢကျဲတရံးမ့ၢ်ဂ့ၤ, တဘၣ်ပၥ်ဖှိၣ်မၤသကိးတၢ်ဒီးစီၤဆီၣ်ထွဲမၤစၢၤအီၤလ့ၤတက့ၤဘၣ်အဂ့ၢ် သုးက့နီၣ်ဂံၢ်(၅)ဟ့ၣ်ပလီၢ်ဃၥ်၀ဲန့ၣ်လီၤ.
