လါအီကူာ်(၂၆)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ဖဲလါဖ့ၤဘြူၤအါရံၤ (၁)သီ,၂၀၂၁နံၣ် တၫ်ဂုာ်န့ၫ်တၫ်စိတၫ်ကမီၤတၫ်ကဲထီၣ်အသး စးထီၣ်အကတီၫ် တုၤ ၂၀၂၅နံၣ်, လါအီကူာ်(၂၅)သီအနံၤ သုးကရူၫ်လၢမၤအၢတၫ်သီဒီးအစုတီၤဖီလာ်တၫ်ကရၢကရိတဖၣ်အဃိ နွ့ၣ်အူတၫ်ပၢၫ်ဆၢ အကတီၫ် ပှၤဟူးဂဲၤလၢဒံၣ်မိၣ်ကရ့ၣ်စံၣ်ဂ့ၫ်၀ီတဖၣ်ဒီးကမျၢၫ် ဘၣ်သံအိၣ်၀ဲခဲလၢာ်ပာ်ဖှိၣ် (၇,၁၂၈)ဂၤလံန့ၣ်လီၤ.
တကးဘၣ် ဘၣ်ထွဲဒီးတၫ်ဟံးန့ၫ်ဆူၣ်ထံကီၫ်တၫ်စိတၫ်ကမီၤတၫ်ကဲထီၣ်သးအပူၤ ပှၤလၢဘၣ်တၫ်ဖီၣ်ဃာ်၀ဲအိၣ်ခဲ လၢာ်(၂၉,၅၈၅)ဂၤဒီးလၢအကျါ (၂၂,၃၃၉)ဂၤန့ၣ် တၫ်ဖီၣ်ဃာ်အဖၢမုၫ်ဒီးလၢအကျါ(၁၁,၀၁၃)ဂၤန့ၣ် တၫ်ဟ့ၣ်လီၤ အီၤဃိၣ်တၫ်စံၣ်ညီၣ်န့ၣ်လီၤ.
နီၫ်ဂံၫ်နီၫ်ဒွးလၢတၫ်ပာ်ဖျါတဖၣ်န့ၣ် မ့ၫ်နီၫ်ဂံၫ်နီၫ်ဒွလၢ AAPPမၤနီၣ်ထၢဖှိၣ်ဃာ်၀ဲဒီးဟီၣ်ခိၣ်လိၤတၫ်ကဲထီၣ်အသးန့ၣ် အါဒိၣ်န့ၫ်ဒံးနီၫ်ဂံၫ်လၢတၫ်ပာ်ဖျါထီၣ်န့ၣ်လီၤ.တၫ်ဂ့ၫ်တၫ်ကျိၤလၢမၤန့ၫ်၀ဲတဖၣ် ပာ်ဂၢၫ်ပာ်ကျၢၫ်၀ဲမ့န့ၫ်ကဖၢနုာ်ပာ်ဖျါကဒီး န့ၣ်လီၤ.
အပူၤကွံာ်နွံအပူၤ သုးကရူၫ်န့ၣ် သူ၀ဲကလံၤကျါဂံၫ်ဘါဒီးဒုးဃီၤ၀ဲ စကဲကီၫ်ခီ,မကွ့ကီၫ်ခီ,ပကိကီၫ်ခီ,ရၢၫ်ခၢၣ်ကီၫ်စဲၣ်, ယိၤဒိၣ်ကီၫ်စဲၣ်ဒီးတလၢၤကီၫ်စဲၣ်တဖၣ်အဃိ ထံဖိကီၫ်ဖိကမျၢၫ်ဘၣ်သံ၀ဲ(၅၃)ဂၤဃၣ်ဃၣ်န့ၣ်လီၤ.လါအီကူာ် (၁၈ )သီနံၤ,စကဲကီၫ်ခီ,ဒံၣ်ပဲယ့ကီၫ်ဆၣ်,မူကါကၠံသ၀ီအပူၤ မိကီသီခါဖၠၣ် သုးကီၣ်ကးဒုးယီၤလၢကလံၤကျါအဃိ သီခါ(၂) ဂၤပာ်ဃုာ် ခဲလၢာ်(၆)ဂၤ,လါအီကူာ်(၁၉)သီနံၤ ပကိကီၫ်ခီ,ပီးခီကီၫ်ဆၣ်,ကၠီးပၠ့ၣ်သၣ်သ၀ီန့ၣ် တၫ်ဒုးတအိၣ်ဘၣ်မဲာ်ညါ ဒုးတ့ၫ်လီၤမ့ၣ်ပိၫ်အဃိ ပှၤဒီဖိပၫ်ခံဂၤဘၣ်သံ၀ဲန့ၣ်လီၤ.
တကးဘၣ် လါအီကူာ်(၂၂)သီအနံၤ လၢမကွ့ကီၫ်ခီ,ပီးကီၫ်ဆၣ်ဒီးယ့ၣ်နၣ်ခၠီကီၫ်ဆၣ်မ့ၫ်ဂ့ၤ,ရၢၫ်ခၢၣ်ကီၫ်စဲၣ်,ကၠီးဖၠူၣ်ကီၫ် ဆၣ်မ့ၤဂ့ၤ ဒုး၀ဲလၢကလံၤကျါအဃိ ဖိသၣ်ပာ်ဃုာ် ကမျၢၫ်(၅)ဂၤ,လါအီကူာ်(၂၃)သီနံၤ လဲၤဒုးတ့ၫ်လီၤမ့ၣ်ပိၫ်လၢ ယိၤ ဒိၣ်ကီၫ်စဲၣ်,ကၠီးမဲကီၫ်ဆၣ်,ကိစလါသ၀ီ သီခါဖၠၣ်အဃိ ဖိသၣ်ဘၣ်သံ(၁)ဂၤဒီး သီခါဖၠၣ်ဟးဂီၤဒီတဖျၢၣ်န့ၣ်လီၤ.
ဒ်န့ၣ် အသိး လါအီကူာ်(၂၄)သီအနံၤစ့ၫ်ကီး လၢတလၢၤကီၫ်စဲၣ်,ကၠဲးထိၣ်ကီၫ်ဆၣ်,ခၠါမၠ့းသ၀ီသီခါဖၠၣ်န့ၣ် ဒုး၀ဲလၢကလံၤကျါ အဃိ သီခါ(၂)ဂၤဘၣ်သံဒီး(၅)ဂၤဘၣ်ဒိဘၣ်ထံးနးနးကျံးကျံးအဂ့ၫ် တၫ်သ့ၣ်ညါဘၣ်န့ၣ်လီၤ.
