လါအီကူၥ်(၂၅)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
၂၀၂၅နံၣ်, လါအီကူၥ်(၂၁)သီအနံၤ, သုးခီၣ်မံးရှၢၣ်အသုး မၤဒုးယၤရဲၣ်ကျဲၤ ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆)ဟီၣ်က၀ီၤ, ကီးတရံးကီၢ်ဆၣ်, ကြုၢ်တု-တန့ခၠါ(နဘူ)ကျဲမုၢ်အဖီခိၣ်အဃိ တၢ်ဒုးဆူၣ်ထီၣ်၀ဲဒီး သုးက့(၇)သုးပၥ်ဖှိၣ်တဖၣ်အဘၢၣ်စၢၤ၀ံၤ ခီဖျိသုးခီၣ်မံးရှၢၣ်အသုး ခးလီၤကျိဖးဒိၣ်အဃိ သ၀ီတဖၣ်အပူၤ ဟံၣ်တနီၤဘၣ်ဟးဂီၤကွံၥ်၀ဲအဂ့ၢ် ကညီဂံၢ်ခီၣ်ထံးတၢ်ကစီၣ်တဖၣ် စံး၀ဲန့ၣ်လီၤ.
ဒ်သိး ကဒုးမၤန့ၢ်က့ၤ ဖၣ်အၣ်ကီၢ်ရ့ၣ်, တန့ခၠါ(နဘူ)၀့ၢ်, ကြုၢ်တု-တန့ခၠါကျဲမုၢ်အဂီၢ် စးထီၣ်လၢလါအီကူၥ်ခံနွံတနွံအတီၢ်ပူၤန့ၣ် သုးခီၣ်မံးရှၢၣ်စူးကါ၀ဲ ခီၣ်သုးအဂံၢ်အဘါအါအါဂီၢ်ဂီၢ်ဒီး ခးလီၤကျိဖးဒိၣ်, တ့ၢ်လီၤမ့ၣ်ပိၢ်လၢဒြိဒီး ဟဲခးစၢၤ၀ဲဒၣ်လၢ ကလံၤကျါ၀ံၤ မၤတၢ်ထီၣ်ဒုး ဒုးယၤရဲၣ်ကျဲၤတဖၣ်န့ၣ်လီၤ.
သုးခီၣ်မံးရှၢၣ်အသုး ဟဲထီၣ်သုးကျိၤအဃိ တၢ်ဘၣ်သဂၢၢ်ခးလိၥ်သးအိၣ်ထီၣ်၀ဲဒီး သုးက့(၇)တီခိၣ်ရိၣ်မဲသုးပၥ်ဖှိၣ်အဘၢၣ်စၢၤ ဖဲ ကြုၢ်တု-နဘူကျဲမုၢ် ကၠိၣ်ဘဲကစၢၢ်ဒီခိၣ် ဆူၣ်ဆူၣ်ကလဲၥ်အဂ့ၢ် ကညီဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ. ဖဲတၢ်ဒုးအပူၤ သုးခီၣ်မံးရှၢၣ်အသုး သံဒီးဘၣ်ဒိအိၣ်ထီၣ်၀ဲအါအါဂီၢ်ဂီၢ်အဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
သုးခီၣ်မံးရှၢၣ်အသုး ဟဲထီၣ်သုးကျိၤအဆၢကတီၢ် ခးကျိဖးဒိၣ်, တ့ၢ်လီၤမ့ၣ်ပိၢ်လၢဒြိ, ခးလီၤတၢ်လၢကလံၤကျါ ဆူကြုၢ်တု-တန့ခၠါကျဲမုၢ်အဖီခိၣ် သ၀ီတဖၣ်အပူၤအဃိ မ့ၣ်ပိၢ်လီၤတဲၥ်ပိၥ်ဖးထီၣ်၀ဲဒၣ် ဖဲကီးတ့ဆဲၣ်, ကၠိၣ်ဘဲ, နၢၤခလီၣ်, ကၠၣ်အ့စူးသ၀ီတဖၣ်အပူၤအဃိ သၣ်သနံးကတၢ်သူၣ်ထီၣ်ဒီးဟံၣ်ဃီတနီၤ ဘၣ်ဟးဂီၤကွံၥ်၀ဲန့ၣ်လီၤ.
ခီဖျိသုးခီၣ်မံးရှၢၣ် မၤဒုးယၤရဲၣ်ကျဲၤဒ်အံၤတဖၣ်အဃိ လီၢ်က၀ီၤကမျၢၢ်လၢအိၣ်ဖဲ ကီးတ့ဆဲၣ်, ကၠိၣ်ဘဲ, နၢၤခလီၣ်, ကၠၣ်အ့စူး, ကၠိၣ်ဒိခၠီဖၠါ, ကီးသၣ်စူးသ၀ီပူၤတဖၣ် ဘၣ်ဃ့ၢ်ပူၤဖျဲး လဲၤအိၣ်ဆူတၢ်လီၢ်လၢအပူၤဖျဲးလီၢ်တဖၣ်အဂ့ၢ် စံး၀ဲန့ၣ်ၣ်လီၤ.
သုးခီၣ်မံးရှၢၣ်အသုးန့ၣ် ပညိၣ်ဟဲထီၣ်၀ဲဆူ တန့ခၠါတၢ်တိၥ်ကူၣ်ကျဲၤ, ထိးကီၥ်ကိ-ရၤမတံ, တီနီၢ်ကစၢၢ်တကပၤသ့အသိး မၠးပတဲၣ်, ယ့ၣ်ကွဲတီၣ်ဒီး ကီးတရံး၀့ၢ်တပၤစ့ၢ်ကီး ပညိၣ်ဟဲထီၣ်၀ဲသ့အဂ့ၢ် ဂံၢ်ခီၣ်ထံးတၢ်ကစီၣ် ပဲၥ်ထံနီၤဖး၀ဲန့ၣ်လီၤ.
ဖဲအပူၤကွံၥ် လါယူၤလါလၢၥ်လံၤလံၤန့ၣ် သုးခီၣ်မံးရှၢၣ်အသုး ပၢဆှၢက့ၤ၀ဲ ကီးတရံး-ကြုၢ်တုကျဲမုၢ်၀ံၤအလီၢ်ခံ ဒ်သိးကပၢဆှၢက့ၤ ကြုၢ်တု-နဘူကျဲမုၢ်ဒီး အ့ရှၢကျဲမုၢ်အဂီၢ် စူးကါ၀ဲသုးအဂံၢ်အဘါအါအါဂီၢ်ဂီၢ်၀ံၤ ဟဲထီၣ်သုးကျိၤမၤဒုးယၤရဲၣ်ကျဲၤတဖၣ်အဃိ စးထီၣ်လၢလါအီကူၥ်စးထီၣ်သီသီန့ၣ် တၢ်ဒုးဆူၣ်တ့ၢ်လံလၢ အ့ရှၢကျဲမုၢ်အံၤအဖီခိၣ်န့ၣ်လီၤ.
Ref: PS
