ကတြီ၀ဲ သုးခီၣ်မံးရှၢၣ် အတၢ်ဃုထၢအဂ့ၢ် ကီၢ်ကရ့ၣ်နံၣ်တၢ်ကူၣ်လိၥ်ကီၣ်ကး ဘိးဘၣ်ရၤလီၤ

လါအီကူၥ်(၂၅)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

တဖိးသဲစးတၢ်ဃုထၢအယီၤအဘျၣ်လၢ သုးခီၣ်မံးရှၢၣ်ကမၤ၀ဲအံၤ သုတကဲထီၣ်လိၣ်ထီၣ်အဂီၢ် ကတြီ၀ဲအဂ့ၢ် ကီၢ်ကရ့ၣ်နံၣ်တၢ်ကူၣ်လိၥ်ကီၣ်ကး (KSCC) ထုးထီၣ်ဘိးဘၣ်ရၤလီၤဃၥ်၀ဲဖဲ လါအီကူၥ်(၂၄)သီအနံၤန့ၣ်လီၤ.

တၢ်သူၣ်ထီၣ်ထံကီၢ်ဂံၢ်ခီၣ်ထံးတၢ်ဘျၢသဲစးခိၣ်သ့ၣ်(၂၀၀၈)လၢ  ကီၢ်ပယီၤသုးမုၢ်ဒိၣ်ကွဲးလီၤပၥ်၀ဲဒ် အနီၢ်ကစၢ်တၢ်ဘၣ်သးအံၤ လူၤသ့ၣ်ခါပတၥ်က့ၤ၀ဲတၢ်ဘျၢသဲစးတဖၣ်၀ံၤ ဟံးန့ၢ်ဆူၣ်ထံကီၢ်တၢ်စိတၢ်ကမီၤ ဖဲ၂၀၂၁နံၣ်, လါဖ့ၤဘြူၤအါရံၤ(၁)သီအနံၤအဃိ တၢ်ဘျၢသဲစးခိၣ်သ့ၣ်ဟးဂီၤကွံၥ်လံဒီး တဖိးသဲစးတၢ်ဃုထၢလၢ ကမျၢၢ်တၢ်ပၥ်သးတပၣ်ဃုၥ်၀ဲအံၤ တၢ်ခွဲးတၢ်ယၥ်တအိၣ်လၢ ကရဲၣ်ကျဲၤမၤ၀ဲဘၣ်အဂ့ၢ် KSCC စံး၀ဲန့ၣ်လီၤ.

တၢ်ရဲၣ်ကျဲၤမၤတဖိးသဲစးတၢ်ဃုထၢအံၤန့ၣ် မ့ၢ်ဒၣ်တၢ်မၤကမၣ် ဒံၣ်မိၣ်ကရ့ၣ်စံၣ်တၢ်မၤအကျဲတဖၣ်၀ံၤ ကဟံးန့ၢ်ဆူၣ်ကမျၢၢ်အတၢ်စိတၢ်ကမီၤလၢ တဖိးသဲစးအဂီၢ် တၢ်ဂုၥ်ကျဲးစၢးလီၤအဂ့ၢ် ပၥ်ဖျါဃၥ်၀ဲန့ၣ်လီၤ.

သုးကရူၢ်အံၤ ကမၤစှၤလီၤ ထံရူၢ်ကီၢ်သဲးတၢ်ဃံးတၢ်စ့ၢ်လၢ ဟီၣ်ခိၣ်ဘီမုၢ်ထံကီၢ်တဖၣ်အမဲၥ်ညါအဂီၢ် ရဲၣ်ကျဲၤမၤ၀ဲတဖိးသဲစးတၢ်ဃုထၢအံၤ၀ံၤ တၢ်အဆၢလၢကဟဲဟးထီၣ်၀ဲတဖၣ်စ့ၢ်ကီးန့ၣ် တမ့ၢ်လၢဘှါရှဲ၀ဲ ကီၢ်ပယီၤထံရူၢ်ကီၢ်သဲးတၢ်ဂ့ၢ်ကီအံၤကန့ၢ်ဘၣ်ဒီး ကပညိၣ်လဲၤဆူ ထံလီၢ်ကီၢ်ပူၤ တၢ်ဒုးတၢ်ယၤလၢယံၤယံၤထၢထၢအဂ့ၢ် KSCC ဒုးသ့ၣ်ညါဃၥ်၀ဲန့ၣ်လီၤ.

ကီၢ်စဲၣ်တဖၣ်အပူၤ သုးခီၣ်မံးရှၢၣ်အသု မ့ၢ်ရဲၣ်ကျဲၤမၤ၀ဲ တဖိးသဲစးတၢ်ဃုထၢတဖၣ်န့ၣ် ကတြီ၀ဲလၢကျဲအဘိဘိ၀ံၤ ကရ့ၣ်နံၣ်ထံဖိကီၢ်ဖိကမျၢၢ်တဖၣ်စ့ၢ်ကီး တၢ်သုတပၣ်ဃုၥ်ပၣ်ဂီၤလၢ တၢ်ဃုထၢအယီၤအဘျၣ်အံၤအပူၤဘၣ်ဒီး ကထီဒါ၀ဲအဂ့ၢ် KSCC ဟ့ၣ်သဆၣ်ထီၣ်၀ဲန့ၣ်လီၤ.

KSCCန့ၣ် မၤဖျါထီၣ် ကီၢ်ကရ့ၣ်နံၣ် တၢ်ဘၢၣ်စၢၤတၢ်တိၥ်ကျဲၤတဖၣ်ဒ်အမ့ၢ် တၢ်ဘၢၣ်စၢၤဘျီၣ်ဒိၣ်, တၢ်ပၢတၢ်ပြး, စံၣ်ညီၣ်ပီတ့ဂ့ၢ်၀ီတဖၣ်အမိၢ်လံမိၢ်ပှၢ်၀ံၤကွဲးလီၤပၥ်လီၤ၀ဲကီၢ်ကရ့ၣ်နံၣ်တၢ်သူၣ်ထီၣ်ဂံၢ်ခီၣ်ထံးတၢ်ဘျၢသဲစးခိၣ်သ့ၣ်စ့ၢ်ကီးန့ၣ်လီၤ.

သုခီၣ်မံးရှၢၣ်အံၤ ကရဲၣ်ကျဲၤမၤ၀ဲတၢ်ဃုထၢတဖၣ်ဒ် အကူၥ်တဖၣ်အသိး၀ံၤ အကူၥ်(၁)န့ၣ် ကမၤ၀ဲဖဲ ခါလၢကဟဲလါဒံၣ်စ့ဘၢၣ်(၂၈)သီအနံၤအဂ့ၢ် ဘိးဘၣ်ရၤလီၤဃၥ်၀ဲန့ၣ်လီၤ.

သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးခီၣ်မံးရှၢၣ်လၢ ကရဲၣ်ကျဲၤမၤတၢ်ဃုထၢအယီၤအဘျၣ်အံၤ ကမၤဆူၣ်ထီၣ်ကီၢ်ပယီၤပူၤ တၢ်သဘံၣ်သဘုၣ်တဖၣ်တကးဘၣ် ကမၤဘၣ်ဒိ၀ဲစ့ၢ်ကီး လီၢ်က၀ီၤပူၤတၢ်အိၣ်ဂၢၢ်အိၣ်ကျၢၢ်တဖၣ်အဃိ တၢ်ကတြီမၤတံၥ်တၢ်အီၤအဂီၢ် ဒီကလုၥ်ဒံၣ်မိၣ်ကရ့ၣ်စံၣ်ကရၢခိၣ်ကျၢၢ်(NLD)လီၢ်ခၢၣ်သးပၢဆှၢတၢ်ကမံးတံၥ်စ့ၢ်ကီး ထုးထီၣ်ပၥ်ဖျါဃၥ်၀ဲဖဲ လါအီကူၥ်(၂၃)သီအနံၤန့ၣ်လီၤ.

လၢန့ၣ်အမဲၥ်ညါ သုးကီၣ်ကးအသုးန့ၣ် ပၥ်ထီၣ်တၢ်ဂ့ၢ်လၢတၢ်ဃုထၢ၀ံၤ ဒ်သိးကဟံးန့ၢ်က့ၤဟီၣ်က၀ီၤတဖၣ်အဂီၢ် မၤတၢ်ဂီၢ်စုဂီၢ်ခီၣ်, မၤဟးဂီၤတၢ်ဃူးတၢ်ဖိးဒီး ကကွဲန့ၢ်လွဲန့ၢ်ထံဖိကီၢ်ဖိကမျၢၢ်လၢကျဲအဘိဘိအဂ့ၢ် ကီၢ်ကရ့ၣ်နံၣ်သုးမုၢ်ဒိၣ်(KA)သုးရိၣ်မဲခိၣ်ကျၢၢ် သုးခိၣ်ကျၢၢ်ဖိအီၣ်မၠး ဟ့ၣ်ပလီၢ်ဃၥ်၀ဲန့ၣ်လီၤ.