သုးခီၣ်မံးရှၢၣ် လဲၤတ့ၢ်လီၤမ့ၣ်ပိၢ်ဖဲ ၀့ၢ်မိၤခံလီၢ်က၀ီၤ, တၢ်ဆါဟံၣ်အဃိ ကမျၢၢ်သံဒီးဘၣ်ဒိအိၣ်ထီၣ်အါ

လါအီကူၥ်(၁၈)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

သုးခီၣ်မံးရှၢၣ်အသုး လဲၤတ့ၢ်လီၤမ့ၣ်ပိၢ် ဖဲကီၢ်ကရ့ၣ်နံၣ်, ဖၣ်ဆီကီၢ်ဆၣ်, မိၤခံလီၢ်က၀ီၤအပူၤအိၣ်တၢ်ဆါဟံၣ်ဒီးမုၥ်ကၠိၣ်တၢ်သိၣ်လိကၠိအဃိ ကမျၢၢ်သံဒီးဘၣ်ဒိဘၣ်ထံးအိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.

လါအီကူၥ်(၁၇)သီ, ဂီၤ(၈)နၣ်ရံၣ်ဃၣ်ဃၣ်အဆၢကတီၢ် သုးခီၣ်မံးရှၢၣ်အသုး ပညိၣ်ဒုးခးလီၤမ့ၣ်ပိၢ် ဖဲ မိၤခံလီၢ်က၀ီၤ, လၢၢ်ဃါလိၥ်သ၀ီ ကမျၢၢ်တၢ်ဆါဟံၣ်ဒီး ဖဲမုၢ်ထူၣ်အဆၢကတီၢ် လဲၤတ့ၢ်လီၤကဒီး၀ဲ နီၣ်ဂံၢ်(၁၆)လူၢ်က၀ီၤဒ့ မုၥ်ကၠိၣ်ကၠိ တၢ်အီၣ်ကျးအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.

“ဘၣ်ဒိဘၣ်ထံးအါ၀ဲလီၤ. တသ့ၣ်ညါဘၣ်၀ဲလီၤတံၢ်ဒံးဘၣ်. တၢ်သံတၢ်ပှၢ်စ့ၢ်ကီးအိၣ်၀ဲလီၤ. ပၣ်ဃုၥ်စ့ၢ်ကီးဒီး ဖိသၣ်တဖၣ်အဂ့ၢ်” ပှၤလၢမၤစၢၤ၀ဲ ကရ့ၣ်နံၣ်ပှၤလီၤအိၣ်ကမှံဂ့ၢ်၀ီတဂၤ စံး၀ဲန့ၣ်လီၤ.

တၢ်ဒုးကဲထီၣ်သးတအိၣ်နီတမံၤဘၣ်ဒီး သုးခီၣ်မံးရှၢၣ်အသုး ပညိၣ်ဒုးခးလီၤ၀ဲ ကမျၢၢ်လိၤလိၤဒီး မၤသံမၤ၀ီတၢ်တဖၣ်အဂ့ၢ် မိၤခံလီၢ်က၀ီၤဖိတဂၤ ဟ့ၣ်ဒုးသ့ၣ်ညါ၀ဲန့ၣ်လီၤ.

“တနံၤအံၤန့ၣ် ခီဖျိမုၢ်အိၣ်ဘှံးနံၤအဃိ တၢ်မၤအိၣ်ဘှံး၀ံၤ လဲၤဘူၣ်ထူဘါယွၤဒီး အိၣ်ဘှံးအိၣ်သါလၢဟံၣ်လီၤ. တၢ်လီၢ်လၢဟဲတ့ၢ်၀ဲန့ၣ် ဟံၣ်ဃီအိၣ်ဘူးလိၥ်သးဒီးတၢ်ဆါတၢ်ပှ့ၤကျးအိၣ်အါအလီၢ်အဃိ တၢ်ဘၣ်ဒိဘၣ်ထံးအိၣ်အါထီၣ်သ့လီၤ. ပညိၣ်ဒုး၀ဲကမျၢၢ်လိၤလိၤ၀ံၤမၤသံမၤ၀ီတၢ်ရၢၢ်ရၢၢ်စၢၤစၢၤန့ၣ်လီၤ. မိၤခံန့ၣ်တၢ်ဒုးကဲထီၣ်သးတအိၣ်ဘၣ်. စၢၤပူၤထးပူၤပှၤမၤတၢ်ဖိဒီးလီၢ်က၀ီၤကမျၢၢ်ပှၤသ၀ီဖိတဖၣ်ဒီး ပှၤအိၣ်လၢလီၢ်ယံၤတဖၣ် ဟဲမၤမုၥ်ကျိၤ၀ဲၤကွၢ်တၢ်လီၢ်”အဂ့ၢ် စံး၀ဲန့ၣ်လီၤ.

ပှၤသံဒီးဘၣ်ဒိဘၣ်ထံးအိၣ်ထီၣ်၀ဲ တစှၤန့ၢ်(၁၀)ဂၤအဂ့ၢ် တၢ်သ့ၣ်ညါပၥ်၀ဲဒီး လီၢ်က၀ီၤဖိတနီၤတခီ စံး၀ဲလၢ ပှၤသံတဖၣ်အကျါ ဖိသၣ်တဖၣ်ပၣ်ဃုၥ် တစှၤန့ၣ်(၁၇)ဂၤဘၣ်သံ၀ဲအဂ့ၢ်န့ၣ်လီၤ.

တၢ်ဂီၤမူတနီၤလၢလီၢ်က၀ီၤဖိတဖၣ်တီၣ်ထီၣ်၀ဲအပူၤ တၢ်ဟးဂုၥ်ဟးဂီၤတဖၣ်အကျါ တၢ်ဃု၀ဲပှၤသံအစိၣ်တဖၣ်အဂ့ၢ် တၢ်ထံၣ်ဘၣ်၀ဲန့ၣ်လီၤ.

တကးဘၣ် သုးခီမံးရှၢၣ်လၢဘၣ်ပျၢ်ကွံၥ် မိၤခံလီၢ်က၀ီၤအံၤ ပညိၣ်ဒုး၀ဲ မိၤခံလီၢ်က၀ီၤဖိတဖၣ် ခဲအံၤခဲအံၤလၢ ဒုးခးလီၤမ့ၣ်ပိၢ်, မၤပျံၤမၤဖူး၀ဲကမျၢၢ်အိၣ်ဆိးတၢ်အိၣ်ဂၢၢ်အိၣ်ကျၢၢ်အဂီၢ်အဂ့ၢ် ကရ့ၣ်နံၣ်ဂံၢ်ခီၣ်ထံးးတၢ်ကစီၣ် စံး၀ဲန့ၣ်လီၤ.

“ဖၣ်ဆီတၢ်ဒုးအဃိ ပညိၣ်ဒုးခးလီၤ ကမျၢၢ်ဒီးပှၤလီၤအိၣ်ကမှံဖိတဖၣ်အသိး အ၀ဲသ့ၣ်ကရဲၣ်ကျဲၤမၤ၀ဲ တၢ်ဃုထၢအဃိ အဲၣ်ဒိးလၢကမျၢၢ်တဖၣ်ကသုးအိၣ်ဆူ၀့ၢ်ပူၤအဂ့ၢ်”အ၀ဲ စံး၀ဲန့ၣ်လီၤ.

တနံၣ်အံၤ စးထီၣ်လၢလါမးရှးန့ၣ် သုးခီၣ်မံးရှၢၣ် ဟဲဒုးခးလီၤတၢ်ဖဲ မိၤခံလီၢ်က၀ီၤအပူၤ အိၣ်ထီၣ်၀ဲတစှၤန့ၣ် (၇)ဘျီဃၣ်ဃၣ်အဃိ လီၢ်က၀ီၤကမျၢၢ်(၃၀)ဃၣ်ဃၣ် ဘၣ်သံ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.

ဒ်န့ၣ်အသိး မဟါလါအီကူၥ်(၁၇)သီအနံၤ, ဂီၤအဆၢကတီၢ် ခီဖျိသုးခီမံးရှၢၣ် လဲၤဒုးတ့ၢ်လီၤမ့ၣ်ပိၢ်ဖဲ ၀့ၢ်မိကိးအဃိ ဖိသၣ်(၁)ဂၤပၣ်ဃုၥ်(၃)ဂၤ ဘၣ်သံ၀ဲအဂ့ၢ် တအီသုးမုၢ်ဒိၣ် (TNLA) ဘိးဘၣ်ရၤလီၤဃၥ်၀ဲ တၢ်ကစီၣ်န့ၣ်လီၤ.

Ref: PS