လါအီကူၥ်(၁၈)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ဒီၣ်နၢၤထရၢးဟံးန့ၢ်မူဒါ ဒ်ကီၢ်ခိၣ်အဆၢကတီၢ် တရူးတဂုၢ်န့ၢ်ဆူၣ်ထၢၣ်၀ၣ်ဘၣ်အဂ့ၢ် တရူးကီၢ်ခိၣ်ရှံၣ်ကၠ့းဖၠ့ၣ် တဲ၀ဲအဂ့ၢ်န့ၣ် ဒီၣ်နၢၤထရၢးစံး၀ဲန့ၣ်လီၤ.
ဘၣ်ထွဲဒီးရှၢးရှါဂုၢ်ဒုးန့ၢ်ဆူၣ်ယူၣ်ကရ့ၣ်တၢ်ဒုးအဖီခိၣ်တချူးလၢထံၣ်လိၥ်သးဒီးရှၢးရှါကီၢ်ခိၣ်ဘလၣ်ဒံၣ်မၣ်ပူၣ်တ့ၣ်အဆၢကတီၢ် Fox Newsသံကွၢ်၀ဲအဆၢကတီၢ် ထရၢးတဲလီၤ၀ဲန့ၣ်လီၤ.
“ဖဲလၢယဟံးမူဒါဒ်ကီၢ်ခိၣ်အဆၢကတီၢ် တရူးန့ၣ် တဂုၢ်န့ၢ်ဆူၣ်ဒုး၀ဲထၢၣ်၀ၣ်ဘၣ်အဂ့ၢ် ကီၢ်ခိၣ်ရှံၣ်ကၠ့းဖၠ့ၣ်တဲလီၤ၀ဲန့ၣ်လီၤ. ယသူၣ်စူၤသးစူၤအသိး တရူးကီၢ်စ့ၢ်ကီးအိၣ်ဒီးတၢ်သူၣ်စူၤသးစူၤအဂ့ၢ်” အ၀ဲစံး၀ဲန့ၣ်လီၤ.
ထၢၣ်၀ၣ်တၢ်ဂ့ၢ်န့ၣ် တရူး-အမဲရကၤတၢ်ရ့လိၥ်မုၥ်လိၥ်အဂီၢ် အရ့ဒိၣ်အသိးဒီး ဟးဂီၤသ့ညီကဒၣ်လီၤအဂ့ၢ် တရူးမီၢ်သီ၀ဲၤဒၢးလၢအိၣ်ဖဲ ၀့ၢ်ခိၣ်၀ၣ်ရှ့ၣ်တၣ် စံး၀ဲန့ၣ်လီၤ.
“အမဲရကၤပဒိၣ်န့ၣ် ကလူၤပိၥ်မၤထွဲ၀ဲ တရူးထံကီၢ်တဘ့ၣ်သနူဒီးထံကီၢ်ခံဘ့ၣ် တၢ်အၢၣ်လီၤအီလီၤ၀ံၤ ကြၢးဘှါရှဲ၀ဲ ထၢၣ်၀ၣ်ဂ့ၢ်၀ီအဖီခိၣ် ဂ့ၤဂ့ၤဘၣ်ဘၣ်ဒီး ကဘၣ်ဒီသဒၢကဟုးကယၥ် ထၢၣ်၀ၣ်ပီၣ်လဲၣ်ဒ့စ့ၤဒီတကျိၤ ထံကီၢ်ခံဘ့ၣ်တၢ်ရ့လိၥ်မုၥ်လိၥ်, တၢ်မုၥ်တၢ်ခုၣ်ဒီးတၢ်ဂၢၢ်တၢ်ကျၢၢ်အဂ့ၢ်” တရူးမီၢ်သီ၀ဲၤဒၢး ပှၤကတိၤတၢ်ပၢ လၠူၣ်ပၣ်ယုး စံး၀ဲန့ၣ်လီၤ.
ဒီၣ်နၢၤထရၢးဒီးရှံၣ်ကၠ့းဖၠ့ၣ်ခံဂၤအံၤ အဆိကတၢၢ်ထံၣ်လိၥ်သးဖဲ လါယူၤလံအတီၢ်ပူၤ၀ံၤ ရှံၣ်ကၠ့းဖၠ့ၣ် ကိးသါလီတဲစိၤအဂ့ၢ် ဒီၣ်နၢၤထရၢး တဲလီၤ၀ဲဖဲ လါအ့ဖြ့ၣ်အတီၢ်ပူၤန့ၣ်လီၤ.
တရူးန့ၣ်ပၥ်၀ဲထၢၣ်၀ၣ်ဒ် အစုတီၤဖီလၥ်တၢ်ပၢဟီၣ်က၀ီၤတခါအသိးဒီး ကပၥ်ဖှိၣ်က့ၤဒီးတရူးကီၢ်မိၢ်ပှၢ်အဂီၢ် ဆၢတဲၥ်ဃၥ်၀ဲန့ၣ်လီၤ.ဘၣ်ဆၣ်ဒီးတၢ်ဂ့ၢ်အံၤအဖီခိၣ်ထၢၣ်၀ၣ်တခီတတူၢ်လိၥ်ဘၣ်ဒီးဂ့ၢ်လိၥ်၀ဲဆူၣ်ဆူၣ်ကိၥ်ကိၥ်န့ၣ်လီၤ.
ကီၢ်အမဲရကၤန့ၣ် မ့ၢ်ထံကီၢ်လၢအဆီၣ်ထွဲမၤစၢၤ ထၢၣ်၀ၣ် စုက၀ဲၤတဖၣ်ဒီး ဟီၣ်ခိၣ်ဘီမုၢ်ထံကီၢ်အပတီၢ် ဘၣ်ဆၣ် တၢ်ရ့လိၥ်မုၥ်လိၥ်တခီ တဒ်သိးဒီးဟီၣ်ခိၣ်ဘီမုၢ်ထံကီၢ်တဖၣ်အသိးဘၣ်န့ၣ်လီၤ.
Ref: AT
