လါအီကူၥ်(၅)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၢ်စဲၣ်အပူၤ ထံဒိၣ်နိယွၤကဲထီၣ်တ့ၢ်၀ဲ၂နွံအတီၢ်ပူၤ ကမျၢၢ်(၄)ဂၤဘၣ်သံ၀ဲ၀ံၤခီဖျိယီၢ်ဘၣ်မ့ၣ်ပိၢ်ဒီးသ့ၣ်လီၤတကုၢ်အဃိ ဖိသၣ်၁ဂၤပၣ်ဃုၥ် ဘၣ်ဒိ၀ဲ၂ဂၤအဂ့ၢ် တၢ်သ့ၣ်ညါဘၣ်လၢ ပှၤတဝၢတၢ်မၤစၢၤကရၢတဖၣ်အအိၣ်န့ၣ်လီၤ.
စးထီၣ်လၢလါယူၤလံ(၂၄)သီအနံၤ ထံဒိၣ်နိယွၤကဲထီၣ်တ့ၢ်၀ဲလၢ ကညီကီၢ်စဲၣ်အပူၤ၀ံၤပှၤသံဒီးဘၣ်ဒိဘၣ်ထံးတဖၣ်န့ၣ် အိၣ်ထီၣ်၀ဲစ့ၢ်ကီးလၢ ၀့ၢ်ခိၣ်ဖၣ်အၣ်, ကီးတရံး, လူပျဲၢ်ကီၢ်တဖၣ်အပူၤန့ၣ်လီၤ.
မူခိၣ်စူၤဒိၣ်၀ံၤအလီၢ်ခံ တၢ်ပိၥ်ထွဲထီၣ်အခံလၢအမ့ၢ် ကစၢၢ်ထံလီၤ,ကလံၤအူတၢ်, ဟီၣ်ခိၣ်လီၤပှီၢ်တၢ်တဖၣ်ဒီး ထံကျိထံဒိၣ်တဖၣ်အဃိ ကညီကီၢ်စဲၣ်၀့ၢ်ခိၣ်ဖၣ်အၣ်, ကီၢ်ဆၢတၢ်ကူလဲၢ်မၤကၤ၀့ၢ်ရၤမတံ, လူပျဲၢ်, ကြုၢ်တု, ကၠဲးဒိၣ်, ကမးမိၢ်, ကီးတရံးကီၢ်ဆၣ်တဖၣ်အပူၤစ့ၢ်ကီး ထံဒိၣ်နိယွၤကဲထီၣ်တ့ၢ်၀ဲန့ၣ်လီၤ.
ဘၣ်ကွၢ်ဆၢၣ်မဲၥ်ဘၣ်ဒီးခိၣ်ဃၢၤန့ဆၢၣ်တၢ်လီၤဘၣ်ယိၣ်အဆၢကတီၢ် ဖဲလါယူၤလံ(၂၄)သီအနံၤန့ၣ် ၀့ၢ်ကီးတရံးပှၤလီၤအိၣ်ကမှံပိၥ်ခွါတဂၤလၢ အလ့ၤလိၤဟးထီၣ်လၢ ကီးတရံးကီၢ်ဆၣ်, နဘူ-နီၣ်တးတပွဲကျဲမုၢ်အဖီခိၣ်အံၤစ့ၢ်ကီး လီၤထွိလၢထံကျါဒီးသံ၀ဲန့ၣ်လီၤ.
ဖၣ်အၣ်ကီၢ်ဆၣ် မ့စံၣ်ဒီးပီၤထီးသ၀ီအဘၢၣ်စၢၤစ့ၢ်ကီး လါယူၤလံ(၂၉)သီအနံၤန့ၣ် ချံလၢပိၥ်ခွါ၆ဂၤဟဲဒိးပိၥ်အံၤ လီၤအုးကွံၥ်အပူၤ တၢ်မၤပူၤဖျဲးထီၣ်န့ၢ်(၅)ဂၤဘၣ်ဆၣ် အဂၤတဂၤတခီ လီၤအုးလၢထံဒီးသံ၀ဲအဂ့ၢ် ပှၤတ၀ၢတၢ်မၤစၢၤကရၢ ထုးထီၣ်ပၥ်ဖျါဃၥ်၀ဲတၢ်ကစီၣ်န့ၣ်လီၤ.
လါယူၤလံ(၃၁)သီအနံၤစ့ၢ်ကီး ဖၣ်အၣ်၀့ၢ်,နီၣ်ဂံၢ်(၂)က၀ီၤဒ့, ထံဖီခိၣ်ကျးမုၢ်နုၥ်တပၤ ချံလၢပိၥ်မုၣ်၁ဂၤဒီးပိၥ်ခွါ၂ဂၤဟဲဒိးပိၥ်အံၤစ့ၢ်ကီး လီၤတကျၢၢ်ကွံၥ်အဃိ ပိၥ်ခွါ၁ဂၤ ဘၣ်သံ၀ဲအဂ့ၢ် စံး၀ဲန့ၣ်လီၤ.
တကးဘၣ် လါအီကူၥ်၃သီအနံၤ ထံဒိၣ်နိယွၤကဲထီၣ်တ့ၢ်၀ဲလၢ ၀့ၢ်ဖၣ်အၣ်နီၣ်ဂံၢ်(၁)က၀ီၤဒ့, လယၣ်ကမၠ့ၣ်ကျဲနၢၤဒီးရွ့ၣ်န့စံၣ်၇ကျဲနၢၤအပူၤစ့ၢ်ကီး ပိၥ်ခွါ၁ဂၤ လီၤအုးလၢထံသံ၀ဲအဂ့ၢ် တၢ်သ့ၣ်ညါဘၣ်လၢ ပှၤတ၀ၢတၢ်မၤပူၤဖျဲးကရၢတဖၣ်အအိၣ်န့ၣ်လီၤ.
ထံဒိၣ်နိယွၤအဃိ တၢ်သံတၢ်ပှၢ်တဖၣ်အိၣ်ထီၣ်၀ဲအသိး လူပျဲၢ်ကီၢ်ဆၣ်အပူၤတခီ ထံဒိၣ်နိယွၤကဲထီၣ်အဆၢကတီၢ် ယီၢ်ဘၣ်မ့ၣ်ပိၢ်၀ံၤ ပိၥ်ခွါ၁ဂၤဘၣ်ဒိ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ. ၀့ၢ်ရၤမတံပူၤစ့ၢ်ကီး ခီဖျိသ့ၣ်ထူၣ်လီၤတကူၢ်အဃိ ဖိသၣ်၁ဂၤ ဘၣ်ဒိ၀ဲန့ၣ်လီၤ.
ကတီၢ်ခဲအံၤန့ၣ် ဖၣ်အၣ်၀့ၢ်အပူၤ ဃိၥ်လိကျိထံက့ၤလီၤကွံၥ်လံဘၣ်ဆၣ် တၢ်လီၢ်လီၤဖုၣ်က၀ီၤဒ့တနီၤအပူၤတခီ ထံအိၣ်ဒံး၀ဲဒီး တစိၢ်တလီၢ်တၢ်မၤပူၤဖျဲးသုးကလၢၤတဖၣ်အပူၤ ပှၤနီၣ်ဂံၢ်(၁)ကလးဘျဲၣ် ဟဲအိၣ်ကဒု၀ဲန့ၣ်လီၤ.
Ref: PS
