လါယူၤလံ(၂၄)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကလံၤမုၢ်လၢဘၣ်တၢ်ကိးအီၤလၢ ၀ံၤဖၤကလံၤမုၢ်(Cyclone Wipha)တဖျၢၣ်အံၤ ဟဲဃီၤ၀ဲချ့သဒံးအဖီခိၣ် လၢတၢ်ဟ့ၣ်ပလီၢ် ကီၢ်သူလ့ၤထံဖိကီၢ်ဖိအဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ထုးထီၣ်ရၤလီၤ၀ဲ ဂ့ၢ်ဂီၤအူလံၥ်ဘိးဘၣ်ရၤလီၤ ဖဲလါယူၤလံ(၂၃)သီအနံၤန့ၣ်လီၤ.
၀ံၤဖၤကလံၤမုၢ်အံၤ ကဟဲနုၥ်လီၤ၀ဲဒၣ်လၢ ကီၢ်ပယီၤမုၢ်ထီၣ်ကလံၤထံးတကပၤဒီး ကဟဲနုၥ်လီၤဘၣ်စ့ၢ်ကီး ကီၢ်သူလ့ၤဟီၣ်က၀ီၤအပူၤ ဖဲလါယူၤလံ၂၃သီတုၤ၂၄သီအနံၤအဂ့ၢ် မူခိၣ်ကလံၤသီၣ်ဂီၤပှၤကူၣ်ဘၣ်ကူၣ်သ့တဖၣ် စံး၀ဲအဂ့ၢ် ဒီး ကလံၤမုၢ်အံၤ အဂံၢ်အဘါဆူၣ်ထီၣ်၀ဲဒၣ်ကွ့ၢ်ကွ့ၢ်အဃိ မ့ၢ်တၢ်လီၤပျံၤလီၤဘၣ်ယိၣ်ဒိၣ်မးလၢ ဒူသ၀ီတဖၣ်အဂီၢ်အဂ့ၢ် လံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
၀ံၤဖၤကလံၤမုၢ်အံၤ ဟဲ၀ဲဒၣ်အဃိ မူခိၣ်ကစူၤဖးဒိၣ်, ကလံၤကဆူၣ်ဒီးထံဒိၣ်, ထံလုၢ်ဘၢတၢ်တဖၣ် ကဲထီၣ်သးသ့အဃိ တၢ်လီၢ်လီၤဖုၣ်တဖၣ်, တၢ်လီၢ်လၢအိၣ်ဘူးဒီးထံကျိကၢၢ်နံၤတဖၣ်ဒီး ကစၢၢ်ထီၣ်ထီတၢ်လီၢ်တဖၣ် လၢသတူၢ်ကလၥ်အပူၤ ထံဒိၣ်နိယွၤဒီး ဟီၣ်လၥ်/ကၢၢ်လၥ်ကဲထီၣ်အသးသ့အဂ့ၢ် ဟ့ၣ်ပလီၢ်ဃၥ်၀ဲန့ၣ်လီၤ.
တကးဘၣ် ခီဖျိကလံၤအူတၢ်အသဟီၣ်ဆူၣ်အဃိ ဟံၣ်ဃီတဖၣ်, လီမ့ၣ်အူပျံၤတဖၣ်, သ့ၣ်မုၢ်၀ၣ်ဘိတဖၣ်ဒီးစံၥ်ဧိၤပှဲၤဧိၤတဖၣ် ဟးဂုၥ်ဟးဂီၤ၀ဲသ့၀ဲဒၣ်အဃိ ကဲထီၣ်တၢ်ဘၣ်ဒိဘၣ်ထံးလၢ တၢ်ဘံၣ်တၢ်ဘၢ, တၢ်အီၣ်တၢ်အီဒီး တၢ်လဲၤတၢ်က့ၤ/၀ံစိၥ်တီဆှၢတၢ်ဖံးတၢ်မၤတဖၣ် ဒိၣ်ဒိၣ်မုၢ်မုၢ်သ့၀ဲဒၣ်အဂ့ၢ် လံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
လၢတၢ်န့ၣ်အဃိ ကီၢ်သူလ့ၤထံဖိကီၢ်ဖိခဲလၢၥ် ကပၥ်သူၣ်ပၥ်သးလၢ ကလံၤမုၢ်အံၤအဖီခိၣ်ဒီး ကအိၣ်ဒီးတၢ်ပလီၢ်ပဒီ, ကအိၣ်ကတဲၥ်ကတီၤအသးဒီး ဟံပၥ်ဃၥ်တၢ်လိၣ်လၢအရ့ဒိၣ်တဖၣ် ဒ်အမ့ၢ် ထံအီ, တၢ်အီၣ်တၢ်အီ, ကသံၣ်ကသီ, လီမ့ၣ်အူ, ဘဲၣ်ထြံၤဒီး လံၥ်လဲၢ်လၢအရ့ဒိၣ်တဖၣ် ကပၥ်ကီၤဃၥ်လၢ တၢ်လီၢ်လၢအတံၥ်ထံ, တကးဒံးဘၣ် ကတဲၥ်ကတီၤဃၥ်စ့ၢ်ကီး ဂ့ၢ်ဂီၤအူတၢ်ပီးတၢ်လီတဖၣ်အဂီၢ် KNU ဟ့ၣ်ပလီၢ်ဃၥ်၀ဲန့ၣ်လီၤ.
ဒ်န့ၣ်အသိး ကကတီၤဃၥ်စ့ၢ်ကီး ကျဲလၢ ဒ်သိး တၢ်ကသုးကစီၤထီၣ် ဟံၣ်ဖိဃီဖိလၢတၢ်ပူၤဖျဲးအလီၢ်အဆိအချ့လၢ အလီၢ်အိၣ်အဆၢကတီၢ်ဒီး ကသုးပၥ်ဃၥ်စ့ၢ်ကီး တၢ်ထူးတၢ်တီၤဒီး ဆၣ်ဖိကီၣ်ဖိတဖၣ်လၢ တၢ်ပူၤဖျဲးအလီၢ်အဂီၢ် ဟ့ၣ်သဆၣ်ထီၣ်ဃၥ်၀ဲန့ၣ်လီၤ.
တကးဒံးဘၣ်ကအိၣ်ဒီးတၢ်ဒိကနၣ်တၢ်ကစီၣ်လၢကလံၤဒၢပူၤမ့ၢ်ဂ့ၤ,မ့တမ့ၢ်ဒိကနၣ်လၢတၢ်ကစီၣ်လၢအဟဲလၢတၢ်ကစီၣ်သန့အမ့ၢ်အတီတဖၣ် ဒ်သိး ကဒိးန့ၢ်ဘၣ်တၢ်ဂ့ၢ်တၢ်ကျိၤ, တၢ်ကဲထီၣ်သးတဘိယူၥ်ဃီ တကးဘၣ် လၢဟံၣ်ခိၣ်ဟံၣ်ဃၢၤ ဟံၣ်ဖိဃီဖိလၢအအိၣ်ဒီး ပှၤသူၣ်က့သးပှၢ်တဖၣ်, ဖိဒံဖိသၣ်ဒီးပှၤက့ပှၤကွဲၣ်တဖၣ် မ့ၢ်အိၣ်တခီ ဒ်သိး ကကွၢ်ထွဲစၢၤဒီးကမၤစၢၤလိၥ်သးတဂၤဒီးတဂၤလၢ ဒ်သိးပှၤခဲလၢၥ် ကပူၤဖျဲးထီၣ်အဂီၢ်စ့ၢ်ကီး KNU ဟ့ၣ်သဆၣ်ထီၣ်ဃၥ်၀ဲန့ၣ်လီၤ.
လၢန့ၣ်အမဲၥ်ညါ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အတၢ်ဟ့ၣ်ပလီၢ်အံၤ ဆၢမုၢ်လၢ်လၢ တၢ်ကပၥ်သူၣ်ပၥ်သးအီၤဃၢဃၢစုၥ်စုၥ် ဒ်သိးန့ဆၢတၢ်မၤဟးဂုၥ်ဟးဂီၤကလီၤစှၤကွံၥ်အဂီၢ် ဒီး တၢ်ကဒီသဒၢထံဖိကီၢ်ဖိကမျၢၢ်အဂီၢ် အလီၢ်အိၣ်လၢ ကဘၣ်ပၥ်ဖှိၣ်မၤသကိးတၢ်အဂ့ၢ်စ့ၢ်ကီး လၢအလံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
