ကဒိစိက့ၤ အ့ၣ်ယၣ်၀တံၣ်ကီၢ်ခီပူၤဟီၣ်က၀ီၤတဖၣ် အလၢအပှဲၤကန့ၢ်အဂီၢ် သုးကီၣ်ကးမၤပှဲၤဃၥ် ထံသုးအဂံၢ်အဘါ

လါယူၤလံ(၂၄)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

အ့ၣ်ယၣ်၀တံၣ်ကီၢ်ခီအပူၤ သုးကီၣ်ကးဘၣ်ပျၢ်ကွံၥ်၀ဲ ဟီၣ်က၀ီၤတနီၤအဃိ သုးကီၣ်ကးအသုး မၤပှဲၤဃၥ်ထံသုးအဂံၢ်အဘါ၀ံၤ ဆီၣ်လီၤဃၥ်အသုးတဖၣ်န့ၣ်လီၤ.

သုးကီၣ်ကးအသုးန့ၣ် အဟီၣ်က၀ီၤတနီၤလၢဘၣ်တၢ်ပျၢ်ကွံၥ်၀ဲတဖၣ် ဒိၣ်စိက့ၤ၀ဲကန့ၢ်အဂီၢ် ထုးထီၣ်၀ဲထံသုးကဘီတဖၣ်ဖဲ ပသံၣ်ထံသုးအပူၤ၀ံၤ နီၤလီၤ၀ဲဆူသ၀ီတနီၤအပူၤ၀ံၤ ဆီၣ်လီၤဃၥ်အသးန့ၣ်လီၤ.

“အၣ်ယၣ်၀တံၣ်ကီၢ်ခီအပူၤ တၢ်လီၢ်အါတီၤန့ၣ် ပၣ်ဃုၥ်လံ. ပသံၣ်ကီၢ်ရ့ၣ်, ဟီကတးကီၢ်ရ့ၣ်အပူၤ ဒူသ၀ီတနီၤန့ၣ် ဘၣ်ပျၢ်ကွံၥ်၀ဲလီၤ. မ့ၢ်မၤ၀ဲတၢ်ဃုထၢလၢ အ့ၣ်ယၣ်၀တံၣ်ကီၢ်ခီအပူၤဒၣ်လဲၥ် ဒိစိ၀ဲဟီၣ်က၀ီၤတန့ၢ်ဘၣ်အဃိ မၤ၀ဲတန့ၢ်လၢလၢပှဲၤပှဲၤဘၣ်. တၢ်န့ၣ်အဃိ ဟဲတီၣ်၀ဲသုးသိလ့ၣ်ထးတဖၣ်၀ံၤ မၤပှဲၤဂံၢ်ဘါဃုၥ်ဒီးထံကျါ”အဂ့ၢ် ငသဲခၠီလီၢ်က၀ီၤကမျၢၢ်တဂၤ စံး၀ဲန့ၣ်လီၤ.

ဖဲအပူၤကွံၥ် လါယူၤလံ(၁၄)သီအနံၤ သုးကီၣ်ကးထံသုးကဘီ(၃)ခိၣ်လၢ ဟဲတီၣ်သုးသိလ့ၣ်ထးန့ၣ် အိၣ်ဟးထီၣ်၀ဲဒၣ်ဖဲပသံၣ်ထံသုးဒီးလဲၤထီၣ်ဆူ င၀ၣ်ထံကျိၤအသိး၀ံၤအလီၢ်ခံ ကတီၢ်ခဲအံၤန့ၣ် လဲၤနုၥ်လီၤဆီလီၤဃၥ်အသးဖဲ လ့မၠဲးနၣ်ကီၢ်ဆၣ်, အဲၣ်သပၠူၣ်သ၀ီပူၤအဂ့ၢ် တၢ်သ့ၣ်ညါဘၣ်န့ၣ်လီၤ.

သုးကီၣ်ကးအသုး ကးတံၥ်ကွံၥ်တၢ်လဲၤပှ့ၤတၢ်ဖိတၢ်လံၤအခွဲးလၢ ကတီၢ်အံၤ တၢ်ဒုးကဲထီၣ်သးအလီၢ် လ့မၠဲးနၣ်ကီၢ်ဆၣ်ဒီးအကပိၥ်ကပၤသ၀ီတဖၣ်, ယ့ၣ်ကၠံၣ်ကီၢ်ဆၣ် မုၢ်နုၥ်သ၀ီကရူၢ်တဖၣ်အပူၤအိၣ် လီၢ်က၀ီၤကမျၢၢ်ဖိတဖၣ် ဖဲလါယူၤလံ(၁၉)သီအနံၤအဂ့ၢ် တၢ်သ့ၣ်ညါဘၣ်န့ၣ်လီၤ.
“သ၀ီတဖၣ်အံၤန့ၣ် ဘၣ်ဟဲ၀ဲဒၣ်လၢထံကျဲဒီးဘၣ်ဟဲပှ့ၤတၢ်န့ၣ်လီၤ. သ၀ီလၢဘၣ်ဟဲလၢထံကျဲတဖၣ် ကးတံၥ်ကွံၥ်၀ဲခဲလၢၥ်လီၤ. ၀ံၤ သ၀ီတဖျၢၣ်ဒီးတဖျၢၣ် တၢ်လ့ၤလိၤဟးထီၣ်မးတအဲၣ်၀ဲဘၣ်. မၤဃံးဃၥ်၀ဲ တၢ်နုၥ်လီၤဟးထီၣ်အဂ့ၢ်” လီၢ်က၀ီၤဖိတဂၤ စံး၀ဲန့ၣ်လီၤ.

လ့မၠဲးနၣ်ကီၢ်ဆၣ် အကပၤ ကွ့တီးကွ့, ရှီးကိဒီးသၣ်ပယၣ်ကိသ၀ီတဖၣ်လၢ တၢ်ဒုးတကဲထီၣ်သးအလီၢ်တဖၣ်အပူၤဒၣ်လဲၥ် သုးကီၣ်ကးအသုး ပၥ်ပနီၣ်တၢ်ဆၢကတီၢ်အဒူၣ်အဆၢ၀ံၤ တၢ်တပျဲလဲၤ၀ဲဆူ ပ့နဲကိသ၀ီတကပၤလၢၤဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကတီၢ်ခဲၤအံၤန့ၣ် AAဒီးတၢ်ပၢၢ်ဆၢသုပၥ်ဖှိၣ်တဖၣ် လဲၤထီၣ်ဘူးအသးတုၤဆူ အ့ၣ်ယၣ်၀တံၣ်ကီၢ်ခီ, အ့ၣ်ကပူၣ်ကီၢ်ဆၣ်, နီၣ်ဂံၢ်(၃၄၄)မျိၥ်သုးအကပၤ၀ံၤ မၤ၀ဲတၢ်ဒုးထီၣ်သုးကလၢၤဒုးယၤရဲၣ်ကျဲၤတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးသုးတပၤစ့ၢ်ကီး ဘၣ်ပျၢ်ကွံၥ်၀ဲ သုးကလၢၤဒီသဒၢ(ကၣ်က့သုးကလၢၤ)တဖျၢၣ်၀ံၤတဖျၢၣ်အဃိ အ့ၣ်ယၣ်၀တံၣ်ကီၢ်ခီအပူၤ မၤ၀ဲကလံၤကျါဒုးယၤရဲၣ်ကျဲၤတဖၣ် ကိးမုၢ်နံၤဃၣ်ဃၣ်န့ၣ်လီၤ.

Ref: Ayeyarwaddy Times