ပယီၤသုးမီၤစိရိၤအသုး လဲၤတ့ၢ်လီၤမ့ၣ်ပိၢ် ဆူ ကၠီးဖၠူၣ်, ပှၤစံၣ်သုးပှၤလီၢ်အိၣ်ကမှံဖိတဖၣ်ဟဲအိၣ်ကဒုသ၀ီ

လါယူၤလံ(၂၃)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

လါယူၤလံ(၂၂)သီအနံၤ, ဂီၤအဆၢကတီၢ် သုးကီၣ်ကးအသုး အကဘီယူၤဒုးသုး ဟဲတ့ၢ်လၢမ့ၣ်ပိၢ် ဆူ တၢ်ဒုးတဖၣ်ဆူၣ်လၢ ရၢၢ်ခၢၣ်ကီၢ်စဲၣ်, ကၠီးဖၠူၣ်ကီၢ်ဆၣ်အပူၤအိၣ်ပှၤစံၣ်သုးပှၤလီၢ်အိၣ်ကမှံဖိဟဲအိၣ်ကဒုသ၀ီလၢအမ့ၢ် ကၠီးပၠီးသ၀ီပူၤအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.

ကၠီးပၠီးသ၀ီလၢ သုးကီၣ်ကးအသုးလဲၤတ့ၢ်လီၤမ့ၣ်ပိၢ်အံၤ အိၣ်၀ဲဒၣ်ဖဲ ကၠီးဖၠူၣ်ကီၢ်ဆၣ်ကလံၤထံးတပၤ၀ံၤ အိၣ်စီၣ်စုၥ်ယံၤ(၁၀)မံၤလၤဃၣ်ဃၣ်ဒီး တၢ်ဒုးကဲထီၣ်သးလၢ ဒညး၀တံၣ်ထံသုး၀ဲၤလီၢ်ခိၣ်သ့ၣ်, ပၢၤကီၢ်သုးရ့ၣ်တဖၣ်၀ံၤ ပှၤစံၣ်သုးပှၤလီၢ်အိၣ်ကမှံဖိတဖၣ် ဟဲအိၣ်ကဒုသ၀ီတဖျၢၣ်န့ၣ်လီၤ.

“ဟဲတ့ၢ်လီၤမ့ၣ်ပိၢ် ဖဲပှၤမံအဆၢကတီၢ် မုၢ်နၤခီန့ၣ်လီၤ. မ့ၣ်ပိၢ်လီၤတဲၥ် ဖဲသီခါဖၠၣ်ပူၤ(၂)ဖျၢၣ်, လီၤတဲၥ်ဖဲ သီခါဖးဒိၣ်အိၣ်တၢ်သူၣ်ထီၣ်တဖျၢၣ်ဒီး တၢ်သူၣ်ထီၣ်အဂၤတဖျၢၣ်အဃိ ဟးဂီၤကွံၥ်၀ဲအဂ့ၢ်” ကၠီးဖၠူၣ်လီၢ်က၀ီၤဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.

တကးဘၣ် သးနံၣ်(၉၀)နံၣ်ဘျဲၣ်အိၣ် စံၣ်ခၠီသ၀ီသီခါဖၠၣ် သီခါဖးဒိၣ်ဒီးသီခါတဖၣ် လၢဟဲအိၣ်ကဒုဖဲကၠီးပၠီးသ၀ီအံၤ အပျဲၢ်သးစၢ်ဖိတဂၤစ့ၢ်ကီး မ့ၣ်ပိၢ်အက့ၢ်အခီဘၣ်အီၤဒီး ဘၣ်ဒိ၀ဲအဂ့ၢ် လီၢ်က၀ီၤဖိစံး၀ဲန့ၣ်လီၤ.

ကၠီးပၠီးသ၀ီသီခါဖၠၣ်တၢ်သူၣ်ထီၣ်ဒီး သီခါဖၠၣ်အကရၢၢ်အပူၤအိၣ် တမၣ်ယိၣ်တၢ်သူၣ်ထီၣ်စ့ၢ်ကီး ခီဖျိ မ့ၣ်ပိၢ်အဃိ ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.

ကၠီးဖၠူၣ်ကီၢ်ဆၣ်အပူၤအိၣ် သုးကီၣ်ကး ထံသုး၀ဲၤလီၢ်ခိၣ်သ့ၣ်ဒီးသုးကလၢၤတဖၣ်လၢ ဘၣ်တၢ်ဒုးအီၤအံၤ စူးကါ၀ဲ ဒုးယၤဒြိတဖၣ်, ကဘီယူၤဒုးသုးတဖၣ်၀ံၤ ပညိၣ်ဒုးတ့ၢ်လီၤမ့ၣ်ပိၢ် ဆူလီၢ်က၀ီၤကမျၢၢ်တဖၣ် အိၣ်ထီၣ်၀ဲခဲအံၤခဲအံၤအသိး ဖီၣ်န့ၢ်ဆူၣ်, မၤတၢ်သမံသမိး ကမျၢၢ်ပှၤဖီၣ်ညၣ်ဖိတဖၣ်ဒီး ကမျၢၢ်တဖၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.

ကတီၢ်ခဲအံၤန့ၣ် ရၢၢ်ခၢၣ်သုးမုၢ်ဒိၣ်(AA) မၤတၢ်ထီၣ်ဒုး ဖဲကၠီးဖၠူၣ်ကီၢ်ဆၣ်အပူၤအိၣ် ထံသုး၀ဲၤလီၢ်ခိၣ်သ့ၣ်အကပၤ ကၣ်က့သုးကလၢၤတဖၣ်,နီၣ်ဂံၢ်(၃၂)ပၢၤကီၢ်သုးရ့ၣ်ကၣ်က့သုးကလၢၤတဖၣ်ဒီးတၢ်ပၥ်ကီၤန့ဆၢၣ်ဂၥ်သ၀ံအလီၢ် (OGT) ကၣ်က့သုးကလၢၤတဖၣ်အဃိ တၢ်ဒုးတဖၣ် ဆူၣ်ထီၣ်၀ဲဒီး သုးကီၣ်ကးတပၤ မၤပှဲၤဃၥ်အသုးအဂံၢ်အဘါလၢ ထံသုးကဘီတဖၣ်န့ၣ်လီၤ.

Ref: The Irrawaddy