လါယူၤလံ(၁၆)သီ,၂၀၂၅နံၣ်
ကညီဒီကလုာ်စၢဖှိၣ်ကရၢ(KNU)ဘျံး-ဒ၀ဲၫ်ကီၫ်ရ့ၣ်,သုးက့နီၫ်ဂံၫ်(၄)ဟီၣ်က၀ီၤပူၤ သုးကီၣ်ကးအသုးကျိၤလၢဟဲမၤ ပှဲၤဂံၫ်ဘါဖဲပယီၤ-ကၠီၣ်တဲၣ်ကီၫ်ဆၢ နးအ့ၣ်တီၣ်သုးကလၢၤတဖၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA) သုးပာ်ဖှိၣ်တဖၣ် ဒုးဃီၤ၀ဲဖဲမဟါ လါယူၤလံ(၁၅)သီအနံၤဒီးတၫ်မၤန့ၫ်၀ဲတၣ်စုက၀ဲၤဒီးဖီၣ်န့ၫ်သုးဖိတဖၣ်အဂ့ၫ် KNUဘျံး-ဒ၀ဲၫ်ကီၫ်ရ့ၣ် ထုးထီၣ်ဘိးဘၣ်ရၤလီၤတၫ်ကစီၣ်န့ၣ်လီၤ.
သုးကီၣ်ကးအပီၣ်လဲၣ်နံၤသုး၀ဲၤလီၫ်ခိၣ်သ့ၣ် အစုတီၤဖီလာ် ခလရ ၂၇၃,ခလရ ၂၈၂,ခမရ ၄၀၈,ခမရ ၄၀၉ဒီးခမရ ၄၁၀တဖၣ် ခိဖျိလၢသုးရ့ၣ်(၅)ရ့ၣ်,ဒုးအိၣ်ထီၣ်သုးကျိၤ၀ံၤ ဟဲထီၣ်ဒုးဃီၤတၫ်လၢ နးအ့ၣ်တီၣ်ဟီၣ်က၀ီၤ ဖဲလါယူၤလံအဆိကတၢၫ်တနွံအပူၤဒီး ဖဲလါယူၤလံ(၁၁)သီဒီး(၁၂)သီအနံၤတဖၣ်န့ၣ် KNLAသုးပာ်ဖှိၣ်တဖၣ်ဒုးဃီၤအီၤလီၤ.တၫ် ဒုးတဘျီအံၤအပူၤ သုးကီၣ်ကးအသုးတကပၤ သုးဒ့ခိၣ် သုးခိၣ်ဒိၣ်ဖိ အီၣ်ကိၣ်ဟ့ပာ်ဃုာ်ဘၣ်သံ(၄)၀ံၤ တၫ်မၤန့ၫ်တၫ်စုက၀ဲၤ(၂)ခိၣ်အဂ့ၫ် ဟ့ၣ်ဒုးသ့ၣ်ညါဃာ်၀ဲလီၤ.
သုးကျိၤ၀ဲအံၤန့ၣ် ဖဲလါယူၤလံ(၁၄)သီဒီး(၁၅)သီအနံၤတဖၣ်အပူၤ KNLAသုးက့နီၫ်ဂံၫ်(၄),သုးက့နီၫ်ဂံၫ်(၆),ဒုးယၤလီၤဆီ(၂)ဒီးသုးပာ်ဖှိၣ်တဖၣ် ဒုးကဒီး၀ဲအဃိ မၤန့ၫ်တၫ်စုက၀ဲၤတဖၣ်၀ံၤ ဖီၣ်န့ၫ်သုးကီၣ်ကးအသုးဖိ(၄)ဂၤအဂ့ၫ် ဟ့ၣ်ဒုးသ့ၣ်ညါ၀ဲလီၤ.စုက၀ဲၤလၢတၫ်မၤန့ၫ်၀ဲတဖၣ် တၫ်ဂီၤတၫ်မၤနီၣ်မၤဃါ တၫ်ပာ်ဖျါအဖီခိၣ် တၫ်ထံၣ်ဘၣ်လၢတၫ်မၤန့ၫ်၀ဲ ကျိအဒိၣ်,အဆံး(၉)ခိၣ်န့ၣ်လီၤ.
တၫ်ဒုးတဘျီအံၤအပူၤ သုးကီၣ်ကးအသုးဖိ(၁)ဖဲဘၣ်ဒိအကတီၫ် သုးကီၣ်ကးတကပၤ ဟံးန့ၫ်ကွံာ်တၫ်စုက၀ဲၤ၀ံၤ ပာ် တ့ၫ်ကွံာ်၀ဲအဃိ သုးပာ်ဖှိၣ်တကပၤဘၣ်ဟ့ၣ်ဃာ်၀ဲဆူၣ်ချ့တၫ်ကဟုကယာ်တဖၣ်ဒီးဒ်ထံဂုၤကီၫ်ဂၤတၫ်ဖီၣ်န့ၫ်သုးဖိတၫ်ဘျၢအသိးကွၫ်ထွဲဃာ်၀ဲအဂ့ၫ် ပာ်ဖျါ၀ဲလီၤ.
“တပာ်လုၫ်ပာ်ပှ့ၤ ပ၀ဲသုးဖိတဖၣ် အသးသမူဘၣ်.ထံၣ်ဘၣ်လၢနီၫ်ကစၫ်လီၤ.တၫ်ဒုးအပူၤမ့ၫ်ဘၣ်ဒိဘၣ်ထံးန့ၣ် ကတဲ၀ဲ လၢပသုးဖိလီၤ၀ံၤကက့ၤစိာ်ကဒါက့ၤ၀ဲ ဟ့ၣ်ဆူၣ်ချ့တၫ်မၤစၢၤန့ၣ် တဘၣ်မုၫ်လၫ်နီတစဲးတဂ့ၤ.ကဘၣ်တၫ်ပာ်တ့ၫ်ကွံာ် ဒ်သိးယၤလီၤအဂ့ၫ်”ဖဲဘၣ်ဒိအကတီၫ် သုးကီၣ်ကးအသုးဖိလၢဘၣ်တၫ်ပာ်တ့ၫ်ကွံာ်တဂၤ တဲ၀ဲလီၤ.တၫ်န့ၣ်အဃိ သုး ကီၣ်ကးအသုးဖိတကပၤ တၫ်ခွဲးတၫ်ယာ်မ့ၫ်အိၣ်န့ၣ် ကဟဲပာ်ဖှိၣ်မၤသကိးဘၣ်တၫ်ဒီးတၫ်ပၢၫ်ဆၢသုးဖိတဖၣ်အဂီၫ် အ၀ဲတဲဆီၣ်တခူထီၣ်၀ဲန့ၣ်လီၤ.
KNU,သုးက့နီၫ်ဂံၫ်(၄)သုးပာ်ဖှိၣ်တဖၣ် ဖဲလါယူၤ(၇)သီအနံၤ ထီၣ်ဒုးမၤန့ၫ်၀ဲ ပယီၤ-ကၠီၣ်တဲၣ်ကီၫ်ဆၢ သူးခးသုးကလၢၤ န့ၣ်လီၤ.ဖဲတချူးတၫ်ဒုး သူးခးသုးကလၢၤလၢတနွံအတီၫ်ပူၤ လါယူၤ(၁)သီနံၤန့ၣ် သူးခးသုးကလၢၤ ပှၤဘၣ်မူဘၣ်ဒါ သုးခိၣ်စိ မၠိဆွ့ၣ်အူ(ကိး)စီၤမိစဲးန့ၣ် ဆဲးကျိးလိာ်အသးဒီး KNLAသုးက့နီၫ်ဂံၫ်(၄)ဟဲက့ၤအိၣ်ကဒုက့ၤလၢ ကမျၢၫ်အိၣ် တကပၤန့ၣ်လီၤ.အလီၫ်ခံ လၢစှၤသီအတီၫ်ပူၤ နးအ့ၣ်တီၣ်သုးကလၢၤ သုးဒ့ခိၣ် သုးခိၣ်စိစီၣ်စီၣ်အီၣ်စ့ၫ်ကီး ခီဖျိလၢ သုးခိၣ်စိ မၠိဆွ့ၣ်အူတဆီ ဆဲးကျိးဒီးKNUသုးက့နီၫ်ဂံၫ်(၄)၀ံၤ ဟဲအိၣ်ကဒုလၢကမျၢၫ်အိၣ်တကပၤန့ၣ်လီၤ.
သုးကီၣ်ကးအသုးန့ၣ် ဟဲထီၣ်ဆူ နးအ့ၣ်တီၣ်သုးကလၢၤဃုာ်ဒီးသုးဖိဂံၫ်ဘါ(၁၀၀)ဂၤဃၣ်ဃၣ် လၢကဟဲမၤပှဲၤဂံၫ်ဘါအကတီၫ် တၫ်ပၢၫ်ဆၢသုးပာ်ဖှိၣ်တဖၣ် ဒုးဃီၤ၀ဲဒီးသုးကီၣ်ကးအသုးလီၫ်လၤအိၣ်ပာ်ဃုာ် ဘၣ်ဒိဘၣ်ထံးဘၣ်သံဘၣ်ပှၫ်ဒီးတၫ်ဖီၣ်န့ၫ်သုးဖိတဖၣ်အိၣ်၀ဲန့ၣ်လီၤ.
