Radio တၢ်ကစီၣ် တၢ်ကစီၣ် ထံဂုၤကီၫ်ဂၤ

ကမၤကတၢၢ်ကွံၥ်တၢ်ဒုးအဂီၢ် အသီ(၅၀)အတီၢ်ပူၤ မ့ၢ်တန့ၢ်၀ဲ တၢ်အၢၣ်လီၤအီလီၤဘၣ်န့ၣ် ကထၢအါထီၣ်ခိသွဲဆူၣ်ဆူၣ်ကိၤကိၤလၢ ရှၢးရှါအဖီခိၣ်အဂ့ၢ် ထရၢးတဲပျံၤတဲဖုး

လါယူၤလံ(၁၆)သီ, ၂၀၂၅နံၣ်

ကမၤကတၢၢ်ကွံၥ် ယူၣ်ကရ့တၢ်ဒုးအဂီၢ် အသီ(၅၀)အတီၢ်ပူၤမ့ၢ်တဒိးန့ၢ်၀ဲတၢ်အၢၣ်လီၤအီလီၤဘၣ်န့ၣ် ကထၢအါထီၣ်ခိသွဲဆူၣ်ဆူၣ်ကိၤကိၤလၢရှၢးရှါအဖီခိၣ်အဂ့ၢ် အမဲရကၤကီၢ်ခိၣ် ဒီၣ်နၢၤထရၢး တဲပျံၤတဲဖုးလီၤ၀ဲန့ၣ်လီၤ.

ထရၢးထံၣ်လိၥ်သးဒီး န့ၢ်တိပတီၢ်ထီပှၤဘၣ်မူဘၣ်ဒါ ဖဲ၀ၣ်ရှ့ၣ်တၣ်၀ံၤအလီၢ်ခံ တဲပျံၤတဲဖုးလီၤ၀ဲဒ်သိးအံၤဒီး ကဆီၣ်ထွဲမၤစၢၤ ချူးစိၤစုက၀ဲၤတဖၣ်ဆူ ယူၣ်ကရ့အအိၣ်အဂ့ၢ် စံး၀ဲန့ၣ်လီၤ. ပဲးထရံယီးမျိၥ်ပၣ်ဃုၥ် တၢ်ဆီၣ်ထွဲမၤစၢၤတဖၣ်န့ၣ် ကဟ့ၣ်လီၤ၀ဲဆူန့ၢ်တိကရၢတဆီအဂ့ၢ် မးရူးတံၣ်စ့ၢ်ကီး စံး၀ဲန့ၣ်လီၤ.

လၢရှၢးရှါတခီ အသီ(၅၀)အတီၢ်ပူၤ မ့ၢ်တန့ၢ် တၢ်မုၥ်တၢ်ခုၣ်တၢ်အၢၣ်လီၤအီလီၤဒီးယူၣ်ကရ့ဘၣ်န့ၣ် အမဲရကၤန့ၣ် ကပညိၣ်ထၢခိသွဲ(၁၀၀)မျးကယၤဆူ ထံကီၢ်လၢအမၤတၢ်ကူလဲၢ်မၤကၤဒီးကီၢ်ရှၢးရှါအဂ့ၢ် ဒီၣ်နၢၤထရၢးစံး၀ဲန့ၣ်လီၤ.

အဒိ ကီၢ်အ့ဒံယါန့ၣ် ကပှ့ၤကဒီးကျဲတံး(ရ့ၣ်နီၣ်)သိတဖၣ်လၢကီၢ်ရှၢးရှါအအိၣ်ဆူညါန့ၣ် ကထၢ၀ဲခိသွဲအမျးကယၤ(၁၀၀)လၢ ကီၢ်အ့ဒံယါပနံၥ်တၢ်တီၣ်သွီနုၥ်တဖၣ်အဖီခိၣ်န့ၣ်လီၤ. အမဲရကၤပနံၥ်တၢ်မၤကစၢ်တဖၣ်န့ၣ် ပနံၥ်တၢ်ဖိတၢ်လံၤလၢအ့ဒံယါတီၣ်သွီနုၥ်၀ဲအလီၢ် ဃုပှ့ၤန့ၢ်လၢတၢ်လီၢ်လၢအပှ့ၤကလံၤစှၤတဖၣ်သ့အဃိ ကီၢ်အ့ဒံယါအဂီၢ်တခီ ကဘၣ်ဒိဘၣ်ထံး၀ဲန့ၣ်လီၤ.

ကျဲတံး(ရ့ၣ်နီၣ်)ဒီးန့ဆၢၣ်သ၀ံစ့တၢ်ဟဲနုၥ်လီၤန့ၣ် ရှၢးရှါအကျိၥ်စ့တၢ်ဟဲနုၥ်လီၤသၢပူတပူဃၣ်ဃၣ်ဒီး အတၢ်တီၣ်သွီဆူကီၢ်ချၢ(၆၀)မျးယကၤအိၣ်၀ဲအဃိ အမဲရကၤအတၢ်တဲပျံၤတဲဖုးခိသွဲတၢ်ဂ့ၢ်န့ၣ် ကီၢ်ရှၢးရှါအဂီၢ် စ့ပၥ်ကီၤဂ့ၢ်၀ီဟဲဘၣ်ဒိဘၣ်ထံး၀ဲသ့အဂ့ၢ် ပှၤလၢပဲၥ်ထံနီၤဖး၀ဲတဖၣ် ပဲၥ်ထံနီၤဖးဃၥ်၀ဲန့ၣ်လီၤ.

ကတီၢ်ခဲအံၤတခီ ဒ်သိးကခီၣ်ဆၢက့ၤ ရှၢးရှါအကလံၤကျါတၢ်ဒုးအဂီၢ် အမဲရကၤသုးဂ့ၢ်၀ီတၢ်ဆီၣ်ထွဲမၤစၢၤတဖၣ်အကျါ ပၣ်ဃုၥ်၀ဲစ့ၢ်ကီးဒီး ပတီၢ်ထီပဲးထရံးယီးမျိၥ်တဖၣ်ဒီးချူးစိၤကျိချံပှၥ်သၣ်တဖၣ်အဂ့ၢ် န့ၢ်တိပှၤဘၣ်မူဘၣ်ဒါ မးရူးတံၣ်စံး၀ဲန့ၣ်လီၤ.

Ref:BBC

 

    X