လါယူၤလံ(၁၆)သီ, ၂၀၂၅နံၣ်
ပှၤကီၢ်ပယီၤဖိလၢဟဲဃ့ၢ်ဟးထီၣ်လၢ ကီၢ်ပယီၤသုးမီၤစိရိၤအသုးအတၢ်မၤပျံၤမၤဖုးတဖၣ်အံၤ ကၠီၣ်တဲၣ်ဘၣ်မူဘၣ်ဒါတဖၣ် မၤပျံၤမၤဖုး, ဃ့န့ၢ်ဆူၣ်ကျိၥ်စ့, ဖီၣ်န့ၢ်ဆူၣ်၀ဲတဖၣ် မၤ၀ဲအဂ့ၢ်န့ၣ် တၢ်အိၣ်ခိးပှၤဂ့ၢ်၀ီခွဲးယၥ်ကရၢ(HRW) ထုးထီၣ်ပၥ်ဖျါဃၥ်၀ဲန့ၣ်လီၤ.
နယူးယီးအိၣ်သူၣ်လီၤ တၢ်အိၣ်ခိးကွၢ်ပှၤဂ့ၢ်၀ီခွဲးယၥ်ကရၢ(HRW) ယူၢ်န့ၢ်လံၥ်ပၥ်ဖျါအံၤအခိၣ်တီလၢ ကၠီၣ်တဲၣ်-ကီၢ်ပယီၤထံဖိကီၢ်ဖိကမျၢၢ်တဖၣ်အဖီခိၣ် ပှၤဘၣ်မူဘၣ်ဒါတဖၣ် အတၢ်ဆီၣ်ဘံၣ်ဆီၣ်ဘၢ, ဟံးန့ၢ်တၢ်ဘၣ်ဘျူး၀ံၤ ထုးထီၣ်ဘိးဘၣ်ရၤလီၤဃၥ်၀ဲဖဲ လါယူၤလံ(၁၄)သီအနံၤန့ၣ်လီၤ.
၂၀၂၁နံၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤလံၤလံၤ ပှၤကီၢ်ပယီၤဖိလၢဟဲဃ့ၢ်ဟးထီၣ်လၢကီၢ်ပယီၤတဖၣ် တၢ်ကဒီသဒၢန့ၢ်သနူတခါ တၢ်ကမၤဖျါထီၣ်၀ဲအမိၢ်လံမိၢ်ပှၢ်အဂီၢ် (HRW)ဟ့ၣ်သဆၣ်ထီၣ်၀ဲဆူ ကီၢ်ကၠီၣ်တဲၣ်အအိၣ်န့ၣ်လီၤ.
တၢ်ကမၤဖျါထီၣ် သနူတခါလၢအဒီသဒၢန့ၢ် အဖိးသဲစးလံၥ်အုၣ်သး, တၢ်သဘျ့အပူၤတၢ်သုးလီၢ်သုးကျဲခွဲးယၥ်, တၢ်ဒိးဟံးန့ၢ်ဆူၣ်ချ့ကဟုးကယၥ်ခွဲးယၥ်,တၢ်ဒိးမၤလိသးခွဲးယၥ်ဒီးတၢ်ဃုဖံးဃုမၤတၢ်မၤခွဲးယၥ်တဖၣ်အမိၢ်လံမိၢ်ပှၢ်အဂီၢ် ဟ့ၣ်သဆၣ်ထီၣ်၀ဲန့ၣ်လီၤ. တကးဘၣ်တၢ်ကထုးထီၣ်န့ၢ်ပှၤမၤတၢ်ဖိခိၣ်ဂီၤကးလၢပှၤကီၢ်ပယီၤတဖၣ်အဂီၢ်ဒီး ကပတုၥ်ကွံၥ်တၢ်သံသမိးတၢ်ဖံးတၢ်မၤတဖၣ်လၢပၥ်ဖှိၣ်မၤသကိးတၢ်ဒီးသုးကီၣ်ကးအဂီၢ်ဟ့ၣ်သဆၣ်ထီၣ်ဃၥ်၀ဲန့ၣ်လီၤ.
တၢ်ကရၢကရိတဖၣ်ဒီးထံကီၢ်တဖၣ်လၢ အမၤ၀ဲ တၢ်ရဲၣ်ကျဲၤန့ၢ်ပှၤဘၣ်ကီဘၣ်ခဲဖိတၢ်လီၢ်တၢ်ကျဲဂ့ၢ်၀ီတဖၣ်စ့ၢ်ကီး ကမၤစၢၤဆီၣ်ထွဲဘၣ် ဒ်သိးကၠီၣ်တဲၣ်ပဒိၣ်ကတူၢ်လိၥ်ဘၣ် တစိၢ်တလီၣ်တၢ်ဟ့ၣ်တၢ်ဒီသဒၢသနူတခါအဂီၢ်, ဖဲလၢတၢ်ပၥ်လီၤပှၤဘၣ်ကီဘၣ်ခဲဖိတၢ်လီၢ်တၢ်ကျဲဂ့ၢ်၀ီန့ၣ် ကၠီၣ်တဲၣ်ကဟ့ၣ်ဘၣ်တၢ်လီၢ်လၢပှၤကီၢ်ပယီၤဘၣ်ကီဘၣ်ခဲဖိတဖၣ်အဂီၢ်စ့ၢ်ကီး ထၢနုၥ်ဟ့ၣ်သဆၣ်ထီၣ်ဃၥ်၀ဲဖဲ အလံၥ်ပၥ်ဖျါအပူၤန့ၣ်လီၤ.
