လါယူၤလံ(၁၅)သီ, ၂၀၂၅နံၣ်, အ့ၣ်ထူခ့ၣ်တၢ်ကစီၣ်
သုးမီၤစိရိၤသုးကီၣ်ကးအသုးကဘီယူၤ ဟဲတ့ၢ်လီၤမ့ၣ်ပိၢ် ဖဲကီၢ်ကရ့ၣ်နံၣ်, ဘီလခဲကီၢ်ဆၣ်, ၀့ၢ်မိၤခံ, စဲးစယၣ်က၀ီဒ့အဃိ ဖိသၣ်(၁)ဂၤပၣ်ဃုၥ်ကမျၢၢ်(၇)ဂၤသံ၀ဲ၀ံၤ (၂၀)ဂၤဃၣ်ဃၣ်ဘၣ်ဒိ၀ဲအဂ့ၢ် တၢ်သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤ.
လါယူၤလံၤ(၁၄)သီအနံၤ, မုၢ်ထူၣ်(၂)နၣ်ရံၣ်ဃၣ်ဃၣ်အဆၢကတီၢ် သုးကီၣ်ကးအသုးဟဲတ့ၢ်လီၤမ့ၣ်ပိၢ်ဆူ စဲးစယၣ်က၀ီၤဒ့ ပှၤအါအါဂီၢ်ဂီၢ်သူWifiအကျါအဃိ ဖိသၣ်(၁)ဂၤပၣ်ဃုၥ်ကမျၢၢ်(၇)ဂၤဘၣ်သံ၀ဲဒီး (၂၀)ဂၤဃၣ်ဃၣ်ဘၣ်ဒိ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“ဟဲတ့ၢ်လီၤမ့ၣ်ပိၢ် ဖဲမိၤခံ၀့ၢ်, စဲးစယၣ်က၀ီၤဒ့ ပှၤဟဲသူ Wifi တၢ်လီၢ်အဃိ ကျးကစၢ်ဒီးဖိသၣ်(၁)ဂၤပၣ်ဃုၥ်(၇)ဂၤသံ၀ဲန့ၣ်လီၤ. ပှၤဘၣ်ဒိန့ၣ်ကအိၣ်၀ဲ(၂၀)ဂၤဃၣ်ဃၣ်အဂ့ၢ်” လီၢ်က၀ီၤကမျၢၢ်ဖိတဂၤ စံး၀ဲန့ၣ်လီၤ.
ဒ်န့ၣ်အသိး ဖဲအပူၤကွံၥ်လါယူၤ(၉)သီ, ဟါ(၇း၃၀)နၣ်ရံၣ်အဆၢကတီၢ် သုးကီၣ်ကးအသုး ဟဲတ့ၢ်လီၤမ့ၣ်ပိၢ် ဖဲ၀့ၢ်မိၤခံ, လိၣ်လီၢ်ထံသ၀ီပူၤ လၢပီၣ်(၂၀၀)အိၣ်မ့ၣ်ပိၢ် (၂)ဖျၢၣ်အဃိ ကမျၢၢ်(၆)ဂၤသံ၀ဲ၀ံၤ ဟံၣ်ဃီတဖၣ်စ့ၢ်ကီး ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
