လါယူၤလံ(၁၅)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တၢ်ယူၢ်န့ၢ်အမံၤလၢ Talisman Sabreလၢအဒိၣ်ကတၢၢ်သုးတၢ်ဂဲၤလိတခါန့ၣ်ကီၢ်အီစတြ့လယါကတူၢ်လိၥ်မၤ၀ဲလၢအထံကီၢ်ပူၤ ဖဲစးထီၣ်လၢလါယူၤလံ(၁၃)သီအနံၤဒီး ဖဲလၢသုးတၢ်ဂဲၤလိအပူၤ ထံကီၢ်(၁၉)ဘ့ၣ် အပှၤသုးဖိ(၃၅,၀၀၀)ဘျဲၣ် ကပၣ်ဃုၥ်ဂဲၤလိတၢ်အဂ့ၢ် APတၢ်ကစီၣ်ပၥ်ဖျါဃၥ်၀ဲန့ၣ်လီၤ.
သုးတၢ်ဂဲၤလိအံၤန့ၣ် အမဲရကၤဒီးအီစတြ့လယါအဘၢၣ်စၢၤ ပၥ်ဖှိၣ်ဂဲၤလိ၀ဲ (၂)နံၣ်တဘျီအသိးဒီး စးထီၣ်ဂဲၤလိ၀ဲဖဲ ၂၀၀၅နံၣ်န့ၣ်လီၤ.
တနံၣ်ညါအံၤအတီၢ်ပူၤန့ၣ် ခန့ဒၣ်, ဖံၣ်ကၠံၣ်, ဖြၣ်စ့ၣ်, ကၠၢၣ်မနံၣ်, အ့ဒံယါ, အ့ၣ်ဒိၣ်နံရှၢၣ်, ယပၣ်, နၢၤသၣ်လဲၣ်,နယူစံၣ်လၣ်, နီၢ်၀့, ပၣ်ပူၣ်၀ၣ်နယူဂံၣ်နံး, ဖ့းလံးပ့း, ကလံၤထံးခိရံယါ, စ့ၣ်ကပူၣ်, ကၠီၣ်တဲၣ်, တိၣ်ကၣ်ဒီး ကီၢ်အဲကလံးထံကီၢ်ပၣ်ဃုၥ် ထံကီၢ်(၁၉)ဘ့ၣ်ပၣ်ဃုၥ်၀ဲ၀ံၤ ကယံၤ၀ဲသၢနွံအတီၢ်ပူၤအဂ့ၢ် အီစတြ့လါတၢ်ဒီသဒၢ၀ဲၤကျိၤ ဘိးဘၣ်ရၤလီၤဃၥ်၀ဲဖဲလါယူၤလံ(၁၃)သီအနံၤန့ၣ်လီၤ.
မလ့ရှါဒီး ဘံးယဲးနၣ်ထံကီၢ်တဖၣ်တခီ ကဟဲထီၣ်၀ဲသုးတၢ်ဂဲၤလိအံၤ ဒ်ပှၤဟဲထီၣ်မၤလိတၢ်ဖိအသိးအဂ့ၢ်န့ၣ်လီၤ.
Talisman Sabre သုးတၢ်ဂဲၤလိအံၤတၢ်ကမၤ၀ဲစ့ၢ်ကီးလၢပၣ်ပူၣ်၀ၣ်နယူဂံၣ်နံးလၢအအိၣ်ဘူးဒီးကီၢ်အီစတြ့လယါအဃိ တၢ်ကဂဲၤလိ၀ဲလၢ အီစတြ့လယါကီၢ်အချၢ အဆိကတၢၢ်တဘျီန့ၣ်လီၤ.
အပူၤကွံၥ် တၢ်မၤတ့ၢ် Talisman Sabreသုးတၢ်ဂဲၤလိ(၄)ဘျီလၢၥ် လၢအီစတြ့လယါ ပီၢ်လဲၣ်နံၤအကပၤအံၤန့ၣ် တရူးကဘီတဖၣ် အိၣ်ခိးကွၢ်၀ဲ၀ံၤ ကတီၢ်ခဲသုးတၢ်ဂဲၤလိအံၤစ့ၢ်ကီးန့ၣ် အိၣ်ခိးကွၢ်၀ဲသ့အဂ့ၢ် တၢ်ဒီသဒၢစဲးဖီကဟၣ်ကိတိၥ် ပဲးကိၣ်ရွဲ စံး၀ဲန့ၣ်လီၤ.
“တရူးသုးမုၢ်ဒိၣ်အံၤ ၂၀၁၇နံၣ်လံၤလံၤန့ၣ် အိၣ်ခိးကွၢ်၀ဲသုးတၢ်ဂဲၤလိအံၤန့ၣ်လီၤ. အ၀ဲသ့ၣ်မ့ၢ်တအိၣ်ခိးကွၢ်၀ဲန့ၣ် တၢ်အံၤမ့ၢ်တၢ်လီၤဆီဖးဒိၣ်တခီလီၤ”အဂ့ၢ် ပဲးကိၣ်ရွဲ တဲလီၤ၀ဲဆူ Australian Broadcasting Corpအအိၣ်န့ၣ်လီၤ.
“ပတၢ်လိၣ်ဘၣ်အသိး ပကထီၣ်ထံထီၣ်ဆးဒီးကမၤ၀ဲန့ၣ်လီၤ. ကဘၣ်အိၣ်ခိးကွၢ်တရူးအတၢ်ဟူးတၢ်ဂဲၤတဖၣ်အသိး အ၀ဲသ့ၣ်သုတအိၣ်လၢ အီစတြ့ယယါအခိၣ်အဃၢၤစ့ၢ်ကီး ပကဘၣ်အိၣ်ခိးကွၢ်၀ဲလီၤ. သုးတၢ်ဂဲၤလိအံၤ ပကဂဲၤလိ၀ဲဒ်လဲၣ်န့ၣ် ကထိၣ်ထံထိၣ်ဆးဒီးကမၤ၀ဲအဂ့ၢ်” ပဲးကိၣ်ရွဲ စံး၀ဲန့ၣ်လီၤ.
