လါယူၤ(၂၄)သီ,၂၀၂၄နံၣ်
ထီဒါကီၫ်ပယီၤထံဖိကီၫ်ဖိအတၫ်ဘၣ်သးဒီးသုးကီၣ်ကးဟံးန့ၫ်ထံကီၫ်တၫ်စိတၫ်ကမီၤ၀ံၤအလီၫ်ခံ လၢကတီၫ်အံၤ ကီၫ်ပယီၤတၫ်လီၫ်သကုၤအပူၤ တၫ်ဒုးလီၤပှီၫ်သုးမီၤစိရိၤတၫ်ဒုး ကဲထီၣ်ကိးမုၫ်နံၤဒဲးန့ၣ်လီၤ.ပှၤလီၫ်က၀ီၤဖိ လၢအိၣ်ဖဲတၫ်ဒုးကဲထီၣ်အလီၫ်တဖၣ် ဘၣ်ပာ်တ့ၫ်ကွံာ်ဟံၣ်ဃီဘၣ်ဃ့ၫ်ပူၤဖျဲးသးလီၤ.
ကညီကီၫ်စဲၣ်,၀့ၫ်ကြူၫ်တု ပှၤလီၫ်က၀ီၤဖိတဖၣ်,သ၀ီအိၣ်ဘူးတဖၣ်အပူၤ ပှၤလီၫ်က၀ီၤဖိတဖၣ်စ့ၫ်ကီး ဘၣ်စံၣ်သုးအိၣ် ထီၣ်လၢအလါဃၣ်ဃၣ်လံအဃိ ကွၫ်ဆၢၣ်မဲာ်ဘၣ်တၫ်ကီတၫ်ခဲလၢတၫ်အိၣ်ဆိးအီၣ်အီအဂီၫ်န့ၣ်လီၤ. ပှၤလီၫ်အိၣ်ကမှံဖိ တဖၣ်အဂီၫ် ကိးလါဒဲး တၫ်ဆီၣ်ထွဲမၤစၢၤတၫ်အီၣ်တၫ်အီအိၣ်တဆံးတက့ၫ်ဘၣ်ဆၣ် ဟံၣ်ဖိဃီဖိအါအဃိ တလၢပှဲၤ ဘၣ်န့ၣ်လီၤ.
“တလါတဘျီမၤစၢၤ၀ဲအိၣ်လီၤ.ဘၣ်ဆၣ် ဟံၣ်ဖိဃီဖိအါအဃိတလၢဘၣ်.ဘၣ်ပှ့ၤအီၣ်ကဒါက့ၤလီၤ. တၫ်မၤစ့ၫ်ကီးတအိၣ်ဘၣ်အဃိ ဘၣ်စံၣ်သုးတၫ်ဆၢကတီၫ်မ့ၫ်ယံာ်ထီၣ်ဒု ကအီၣ်အဂီၫ် ကဘၣ်မၤဒ်လဲၣ်မးတသ့ၣ်ညါဘၣ်အဂ့ၫ် ပှၤလီၫ်အိၣ်ကမှံဖိတဂၤတဲ၀ဲလီၤ.
လၢကတီၫ်အံၤ ကြူၫ်တုကပိာ်ကပၤ ပှၤလီၫ်က၀ီၤဖိတနီၤလၢ ဘၣ်စံၣ်သုးတဖၣ်န့ၣ်လၢတချူးတၫ်ဒုးကဲထီၣ်လံၤလံၤ မ့ၫ်ပတီၫ်မုၫ်ပှၤမၤအီၣ်မုၫ်ဆ့ၣ်မုၫ်ဂီၤဖိတဖၣ်အဃိ အခဲအံၤ အိၣ်ဆိးအီၣ်အီအဂီၫ် ကွၫ်ဆၢၣ်မဲာ်ဘၣ်တၫ်ကီတၫ်ခဲဖးဒိၣ် န့ၣ်လီၤ.
“ဂ့ၤတမံၤလၢ တၫ်လီၫ်လၢအိၣ်၀ဲန့ၣ် တဘၣ်ဟ့ၣ်အပှ့ၤဘၣ်.မ့ၫ်လၢဘူးတံၫ် ကရၢၫ်အဃိလီၤ.မ့တမ့ၫ်ဘၣ်န့ၣ် ဆိမိၣ်မးတဘူၣ်ဘၣ်.ပတၫ်ဖံးတၫ်မၤတအိၣ်ဒ်သိးဒီးပှၤဂၤဘၣ်.မၤတနံၤအီၣ်တနၤဒီးကဲထီၣ်ဒ်သိးအံၤအဃိ သးဘၣ်ဖှိၣ်ဒိၣ်မးအဂ့ၫ်”တဲ၀ဲလီၤ.
ပနံာ် အံသၣ်,သိခၠါ,ပသဲ ဖၣ်ကပူၤတၫ်ဖိတၫ်လံၤတဖၣ် လၢကတီၫ်အံၤအပှ့ၤကလံၤဒိၣ်ထီၣ်တပယူာ်ဃီအဃိ ပှ့ၤအီၣ်တၫ်ဒ်သိးဒီးအပူၤကွံာ်အသိးတန့ၫ်လၢၤဘၣ်အဂ့ၫ် ပိာ်မုၣ်တဂၤတဲ၀ဲလီၤ.
“အပူၤကွံာ်ပသဲဂီၤန့ၣ်ပှ့ၤဃာ်ဒီထၢၣ်လီၤ.တလါဂီၫ်မ့ၫ်ဂ့ၤလီၤ.အခဲအံၤပှ့ၤတန့ၫ်လၢၤဘၣ်.တၫ်အပှ့ၤကလံၤဘၣ်တအိၣ်နီတခါဘၣ်.အပူၤကွံာ် ထံချီဆၢတဘိၣ် အိၣ်ဒၣ် ၁၀၀ကၠးလီၤ.အခဲအံၤအိၣ်လၢ ၄၀၀ကၠး,၅၀၀ကၠးညါလံအဂ့ၫ်”တဲ၀ဲ လီၤ.
ပနံာ်အပှ့ၤကလံၤဒိၣ်ထီၣ်အဃိ ဒိသူၣ်ဒိသးဘၣ်လၢ ပှၤပှ့ၤတၫ်ဖိတဖၣ်အဂီၫ်ဘၣ်ဆၣ် ပှၤဆါတၫ်ဖိတဖၣ်စ့ၫ်ကီး မ့ၫ်လၢတၫ်အိၣ်သးတသ့တဘၣ်အဃိအဂ့ၫ် ပှၤဆါပနံာ်ဖိတဂၤတဲ၀ဲလီၤ.
“ပနံာ်တၫ်ဖိတၫ်လံၤမ့ၫ်လၢာ် မ့ၫ်ဘၣ်ပှ့ၤပသးတံာ်တာ်လီၤ.တဘျီတခီၣ် ပှၤပှ့ၤတၫ်ဖိမ့ၫ်ဟဲသံကွၫ်အပှ့ၤကလံၤန့ၣ် တဲဘၣ်အီၤကီလီၤ.ပမၤတသ့နီတမံၤဘၣ်.မ့ၫ်တၫ်အပှ့ၤကလံၤလၢတနၫ်ဟူဘၣ်နီတဘျီလီၤ.အပူၤကွံာ် တၫ်မ့ၫ်ပှ့ၤ တၫ်ဖိတၫ်လံၤတဘျီ သိလ့ၣ်(၁)ခိၣ်အပှဲၤန့ၣ် အိၣ်ဒၣ်ထဲ ၃၀,၄၀ကလီၫ်ဃၣ်ဃၣ်လီၤ.အလဲအံၤ မ့ၫ်ပှ့ၤ အကလီၢ် ၁၀၀ဒၣ်လဲၣ် သိလ့ၣ်တပှဲၤလၢၤဘၣ်.”
အပူၤကွံာ်လါအ့ဖြ့ၣ်အပူၤ ၀့ၫ်ကြူၫ်တုဒီးအကပိာ်ကပၤသ၀ီတဖၣ် သုးကီၣ်ကးဒုးခးလီၤလၢကလံၤကျါ၀ံၤအလီၫ်ခံ တၫ်ဘၣ်သဂၢၫ်ခးလိာ်သးအိၣ်ထီၣ်၀ဲတုၤလၢခဲကနံၤအံၤန့ၣ်လီၤ.တၫ်ဒုးအဃိ ကြူၫ်တုအကပိာ်ကပၤ ကၠိကလ့,နွါခၠၣ် ကိ,ကီး၀ါလဲ,ခၠီဖၠါ သ၀ီ ပှၤလီၫ်က၀ီၤဖိတဖၣ် ဘၣ်ဃ့ၫ်ပူၤဖျဲးအသးန့ၣ်လီၤ.
ဖဲလါယူၤ(၂၀)သီနံၤ ၀့ၫ်ကြူၫ်တုကပၤ သုးကီၣ်ကးဒီးကညီဒီကလုာ်တၫ်ထူၣ်ဖျဲးသုးမုၫ်ဒိၣ်သုးပာ်ဖှိၣ်တဖၣ်အဘၢၣ်စၢၤ တၫ်ဒုးကဲထီၣ်ဒီးသုးကီၣ်ကအသုးသံ(၃၀)ဂၤအသိး သုးခိၣ်ဒိၣ်ဖိဒီးသုးခိၣ်ဒိၣ်ဂီၫ်ဂ့ၫ် ဘၣ်ဒိဘၣ်ထံးဒီး သုးဂ့ၫ်၀ီတၫ်အိၣ် သးဖ့ၣ်ဆၢအဂ့ၫ် တၫ်သ့ၣ်ညါဘၣ်လၢKNLAသုးဖိတဖၣ်အိၣ်န့ၣ်လီၤ.
ref:မောင်း
