လါယူၤ(၂၃)သီ,၂၀၂၅နံၣ်
KNU-ကညီဒီကလုာ်စၢဖှိၣ်ကရၢ,ကီၫ်သူလ့ၤတၫ်ပၢဟီၣ်က၀ီၤ,သုးက့နီၫ်ဂံၫ်(၆)ပယီၤ-ကၠီၣ်တဲၣ်ကီၫ်ဆၢ သုးကလၢၤအိၣ် တ့ၫ်(၄)ဖျၢၣ်အကျါ သုးကီၣ်ကး ထံကပျၢၤသုးကလၢၤန့ၣ် ဖဲလါယူၤ(၂၂)သီနံၤ ဟါခီအကတီၫ်န့ၣ် ထီၣ်ဒုးမၤန့ၫ်၀ဲအဂ့ၫ် KNUဂ့ၫ်ခီၣ်ထံးတၫ်ကစီၣ်တဖၣ်တဲ၀ဲလီၤ.
တၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်ထံကပျၢၤသုးကလၢၤဒီးသုးကီၣ်ကးအသုးဖိတဖၣ် ဃ့ၫ်ဖျိးကွံာ်၀ဲန့ၣ်လီၤ.
“တၫ်ထီၣ်မၤပျီအီၤဒၢး အ၀ဲသ့ၣ်ဃ့ၫ်လီၤ.ပပှၤတဖၣ် ထီၣ်မၤန့ၫ်သုးကလၢၤလံအဂ့ၫ်”ဂ့ၫ်ခီၣ်ထံးတၫ်ကစီၣ်တဲ၀ဲလီၤ.
ထံကပျၢၤသုးကလၢၤလီၤကွံာ်လံအဃိ ၀့ၫ်ရၤမတံကလံၤထံး ကီၫ်ဆၢအပူၤ အိၣ်တ့ၫ်ဒၣ်ထဲ အူကရ့ၣ်ထၣ်သုးကလၢၤ, ၀ီၫ်လ့ၤတၫ်တိာ်ကူၣ်ကျဲၤသုးကလၢၤဒီးထံသၢလၢၫ်သုးကလၢၤတဖၣ်ဧိၤန့ၣ်လီၤ.
ဂ့ၫ်ခီၣ်ထံးတၫ်ကစီၣ်အဂၤတဂၤစ့ၫ်ကီး တဲ၀ဲလၢ”သုးကီၣ်ကးအသုးတဖၣ် ပာ်တ့ၫ်ကွံာ်သုးကလၢၤဃ့ၫ်ဖျိးကွံာ်ဆူ ကၠီၣ် တဲၣ်တကပၤလီၤ.တၫ်ပၢၫ်ဆၢသုးတဖၣ်မၤန့ၫ်သုးကလၢၤလံ.သုးဖိလၢလၢဃ့ၫ်ဖျိးတဖၣ်တတုၤလၢကၠီၣ်တဲၣ်ဒံးဘၣ်.တၫ်ပၢၫ်ဆၢသုးဖိတဖၣ်လူၤမၤပျီကွံာ်၀ဲလီၤ.သုးကီၣ်ကးသုးဖိတဖၣ်စ့ၫ်ကီး လၢကျဲဒီတကျိၤန့ၣ် ဆဲလီၤဃာ်မ့ၣ်ပိၫ်တဖၣ်အဂ့ၫ်နၫ်ဟူဘၣ်လီၤ.သ့ၣ်ညါဘၣ်လၢကၠီၣ်တဲၣ်တကပၤစ့ၫ်ကီး အိၣ်ခိးလီၤပာ်စၢၤအခိၣ်လီၤ.အ၀ဲသ့ၣ်န့ၣ် ပှၤဘၣ်ဒိဘၣ်ထံး တဖၣ်ပာ်ဃုာ်အဃိ လဲၤတၫ်တတုၤယံၤယံၤဘၣ်.တတၫ်ဟူလၢတုၤဆူကၠီၣ်တဲၣ်ဒံးဘၣ်အဂ့ၫ်”တဲ၀ဲန့ၣ်လီၤ.
ref: people spring
