လါယူၤ(၂၃)သီ,၂၀၂၅နံၣ်
ကၠီၣ်တဲၣ်-ကီၢ်သူလ့ၤကီၢ်ဆၢဟီၣ်က၀ီၤ သုးကီၣ်ကးအူကတရံးထၣ်သုးကလၢၤအံၤ တၢ်ပၢၢ်ဆၢသုးပၥ်ဖှိၣ်တဖၣ် က၀ီၤကးတံၥ်ဒုးအီၤဒီး ကၠီၣ်တဲၣ်တပၤအိးထီၣ်ဃၥ်(Jammer)အဃိ တၢ်ကဒုးအီၤလၢဒြိအဂီၢ် တၢ်ကီတၢ်ခဲအိၣ်၀ဲအဂ့ၢ် ကညီဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
သုးကီၣ်ကးန့ၣ် အပူၤကွံၥ်(၃)နံၣ်လံၤလံၤ အသုးကလၢၤလၢအမ့ၢ် အူကရံးထၣ်သုးကလၢၤသုတလီၤအဂီၢ် ဒီသဒၢခီၣ်ဆၢန့ၢ်၀ဲဒီးတလါအံၤစးထီၣ်လၢလါယူၤ(၁၁)သီအနံၤန့ၣ်တၢ်ပၢၢ်ဆၢသုးပၥ်ဖှိၣ်တဖၣ်က၀ီၤကးတံၥ်ဒုးကဒီး၀ဲန့ၣ်လီၤ.
ကတီၢ်ခဲအံၤန့ၣ် (KNU)အစုတီၤဖီလၥ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ကညီဒီကလုၥ်ဂၢၤသးကရၢ(KNDO)ဒီး PDFသုးပၥ်ဖှိၣ်သုးကျိၤတဖၣ် က၀ီၤကးတံၥ်ဒီၣ်တဲၥ်ဃၥ်၀ဲ သုးကီၣ်ကးအူကရံးထၣ်သုးကလၢၤအံၤအဂ့ၢ် ကညီဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
“အဒီၣ်တဲၥ်ဃၥ်၀ဲ ခဲလၢၥ်လံ. အ၀ဲသ့ၣ်လဲၤက့ၤတန့ၢ်နီတပူၤလၢၤဘၣ်. တၢ်ဒုးတခီတကဲထီၣ်ဖးဒိၣ်ဒံးဘၣ်. တၢ်က၀ီၤဃၥ်အီၤ အဖၢမုၢ်ဒံးလီၤ. သုးမၤစၢၤတဖၣ်စ့ၢ်ကီး ဟဲ၀ဲတန့ၢ်လၢၤဘၣ်. တၢ်ဒီၣ်တဲၥ်ဃၥ် တၢ်အီၣ်တၢ်အီခဲလၢၥ်လံ. အ၀ဲသ့ၣ်ကဆှၢ၀ဲဒီးမနုလဲၣ်”အဂ့ၢ် ကညီဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
ဘၣ်ဆၣ်ဒီး သုးကလၢၤအံၤန့ၣ် အအိၣ်ဖဲကၠီၣ်တဲၣ်-ကီၢ်သူလ့ၤကီၢ်ဆၢအဃိ ကၠီၣ်တဲၣ်တပၤအိးထီၣ်ဃၥ် (Jammer)အဃိ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးလၢဒြိတဖၣ်တန့ၢ်ဘၣ်အဂ့ၢ် စံး၀ဲန့ၣ်လီၤ.
“ခီဖျိအကဲကီၢ်ဆၢအဃိန့ၣ် အိးထီၣ်ဃၥ်၀ဲလီၤ. လၢန့ၣ်တပၤမ့ၢ်အိးထီၣ်န့ၣ် လၢအံၤတပၤယူၢ်ထီၣ်ဒြိတန့ၢ်ဘၣ်. သနၥ်က့အဆၢကတီၢ်မ့ၢ်ဘၣ်က၀ံၤလီၤ. အ၀ဲသ့ၣ်တၢ်အီၣ်တၢ်အီမ့ၢ်တအိၣ်ဘၣ်န့ၣ် ခီၣ်ဆၢက့ၤကန့ၢ်တုၤထဲလဲၣ်အဂ့ၢ်” အ၀ဲတဲအါထီၣ်၀ဲန့ၣ်လီၤ.
အူကရံးထၣ်သ၀ီန့ၣ်အိၣ်၀ဲဒၣ်ဖဲရၤမတံ၀့ၢ်ကလံၤထံးတပၤလ့က့ၣ်ကိၥ်ဟီၣ်က၀ီၤဒီးရၤမတံ၀့ၢ်မုၢ်ထီၣ်ကလံၤထံးတပၤ ၀ီလ့ၢ်ဟီၣ်က၀ီၤကျဲမုၢ်လၢအဘျးစဲဃၥ်အဖီခိၣ်၀ံၤ သုးကီၣ်ကးအသုးကလၢၤန့ၣ်အိၣ်၀ဲဒၣ်ဖဲ အူကရံးထၣ်သ၀ီ ကလံၤစိးတပၤ ကျဲမုၢ်အဖီခိၣ်အကပၤန့ၣ်လီၤ.
KNLAဒီးတၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်ဃၥ် ကၠီၣ်တဲၣ်-ကီၢ်သူလ့ၤဟီၣ်က၀ီၤအပူၤ သုးကီၣ်ကးအသုးကလၢၤတဖၣ်လၢအမ့ၢ် ဘျဲၣ်ဒိၣ်, ကနဲလ့, ရွ့ၣ်အ့မၠဲၣ်(၀ၣ်မံၤထၣ်), ဘယ့းနီၣ်, မီၥ်ခံ, သ့ၣ်ဘီဘိ, ထံကပျၢၤသုးကလၢၤတဖၣ်လၢ တလါအံၤလါယူၤအတီၢ်ပူၤန့ၣ်လီၤ.
လၢတၢ်န့ၣ်အဃိ ရၤမတံ၀့ၢ်ကလံၤထံး ကၠီၣ်တဲၣ်-ကီၢ်သူလ့ၤကီၢ်ဆၢဟီၣ်က၀ီၤအပူၤ သုးကီၣ်ကးအသုးကလၢၤအိၣ်တ့ၢ်ဒၣ် အူကရံးထၣ်, ၀ီလ့ၢ်သုးတၢ်တိၥ်ကူၣ်ကျဲၤသုးကလၢၤဒီး တံးသဲလၢၤသုးကလၢၤတဖၣ်န့ၣ်လီၤ.
ref: people spring
