လါယူၤ(၁၉)သီ, ၂၀၂၅နံၣ်
ကၠီၣ်တဲၣ်-ပယီၤကီၫ်ဆၢ သုးကလၢၤလၢတၫ်ထီၣ်ဒုးမၤန့ၫ်တဖၣ် သုးကီၣ်ကးထီၣ်ဒုးမၤန့ၫ်က့ၤ၀ဲသုတန့ၫ်အဂီၫ် ကညီဒီ ကလုာ်စၢဖှိၣ်ကရၢ(KNU)တီခိၣ်ရိၣ်မဲသုးပာ်ဖှိၣ်တဖၣ်န့ၣ် ဆ့ၣ်နီၤသုးကလၢၤ,က၀ီၤကးတံာ်ဃာ်၀ဲအိၣ်၀ဲအဂ့ၫ် တၫ်မဲာ် ညါဂ့ၫ်ခီၣ်ထံးတၫ်ကစီၣ်တဲ၀ဲလီၤ.
သုးဂ့ၫ်၀ီဂ့ၫ်ခီၣ်ထံးတၫ်ကစီၣ်တဲ၀ဲလၢ”သုးကလၢၤလၢထီၣ်ဒုးမၤန့ၫ်၀ဲခဲလၢာ်ထီၣ်ဆ့ၣ်နီၤ၀ဲလီၤ. တဟ့ၣ်က့ၤဆူဒုၣ်ဒါအစုပူၤဘၣ်.အပူၤကွံာ် ထီၣ်ဒုးမၤန့ၫ်၀ံၤ ဂုၤက့ၤခံအဃိ ဒုၣ်ဒါန့ၣ်ဟဲက့ၤကိးဆၢကတီၫ်ဒဲးန့ၣ်လီၤ. အခဲအံၤဒုတမၤဒ်န့ၣ် လၢၤဘၣ်.သုးကလၢၤလၢတၫ်မၤန့ၫ်တဖၣ် သုးဖိတဖၣ်ဆ့ၣ်နီၤ၀ဲဒီးကးတံာ်ဃာ်၀ဲဒ်သိး ဒုၣ်ဒါဟဲသုတန့ၫ်တဂ့ၤအဂီၫ်” အဂ့ၫ် တဲ၀ဲလီၤ.
တၫ်ဒုးအဃိ ဆိၣ်ဆံမၠဲၣ်,အူးကရ့းထၣ်,တီၣ်နံၣ်,သ့ၣ်ဘီဘိ,၀ၣ်မံၤထၣ်သ၀ီ လီၫ်က၀ီၤကမျၢၫ် ၂,၀၀၀ဂၤဃၣ်ဃၣ် ဘၣ်ဃ့ၫ်ပူၤဖျဲးသးလၢကၠီၣ်တဲၣ်ကီၫ်ဆၢ,သူမှဲကျိကၢၫ်နံၤဒီးလၢတၫ်ပူၤဖျဲးအလီၫ်န့ၣ်လီၤ.
ကလုာ်ဒူၣ်တဖၣ်အဟီၣ်က၀ီၤပူၤ သုးကီၣ်ကးအသုးကလၢၤမ့ၫ်အိၣ်န့ၣ် တၫ်လဲၤထီၣ်က့ၤလီၤကီခဲ၀ဲဒီးသးသမူတၫ်လီၤ ဘၣ်ယိၣ်တဖၣ်အိၣ်အဂ့ၫ် ကညီပိာ်မုၣ်ကရၢ(KWO)အပှၤပၢၤလီၫ်ဆ့ၣ်နီၤ(၂) နီၫ်စ့စ့ဟဲတဲ၀ဲလီၤ.
“ကလုာ်ဒူၣ်တဖၣ်အဟီၣ်က၀ီၤအပူၤ သုးကီၣ်ကးသုးကလၢၤမ့ၫ်အိၣ်န့ၣ် တၫ်ဟးထီၣ်ဟးလီၤကီခဲ၀ဲလီၤ. မ့ၫ်လဲၤလၢ စံာ်ပူၤခုးပူၤန့ၣ် ဘၣ်ယိၣ်တၫ်လီၤ.သုးမ့ၫ်အိၣ်လၢဒူသ၀ီကပၤမ့ၫ်ဂ့ၤ,လၢတၫ်လီၫ်အဂၤမ့ၫ်ဂ့ၤန့ၣ် အခဲအံၤအၢထီၣ်၀ဲလီၤ. သုးကီၣ်ကးအသုးမ့ၫ်ခးစိဃီၤတၫ်လၢ တၫ်လီၫ်အယံၤန့ၣ် တၫ်ဘၣ်ယိၣ်အိၣ်ထီၣ်၀ဲလၢသးသမူအဂီၫ်”န့ၣ်လီၤ.
သုးကီၣ်ကးအသုးကလၢၤတၫ်လီၫ်တဖၣ် KNUမ့ၫ်က့ၤဆ့နီၤသုးကလၢၤန့ၣ် နာ်န့ၫ်ဘၣ်၀ဲတကးဘၣ် တူၫ်ဘၣ်၀ဲလၢ အိၣ်ဘၣ်ဘံၣ်ဘံၣ်ဘၢဘၢအဂ့ၫ် နီၫ်စ့စ့ဟဲတဲ၀ဲလီၤ.
“သုးကီၣ်ကးသုးကလၢၤမ့ၫ်တအိၣ်လၢၤ,မ့ၫ်အိၣ်ထဲKNUသုးကလၢၤန့ၣ် မ့ၫ်ပကလုာ်,ပပှၤဖီၣ်စုက၀ဲၤကရၢစ့ၫ်ကီးအဃိ ပနာ်န့ၫ်၀ဲလီၤ.တူၫ်ဘၣ်လၢအိၣ်ဘၣ်ဘံၣ်ဘံၣ်ဘၢဘၢလီၤ.ဆီၣ်ထွဲမၤစၢၤစ့ၫ်ကီးဒူသ၀ီဖိတဖၣ်အိၣ်၀ဲလီၤ.ဟံးန့ၫ်တၫ်ဘံၣ်တၫ်ဘၢလၢပဂီၫ်ဒီတလိၣ်လၢပဘၣ်ပျံၤတၫ်လၢၤဘၣ်အဂ့ၫ်”န့ၣ်လီၤ.
ဖဲလါမ့ၤ(၂၃)သီ,ဟါ(၅)နၣ်ရံၣ်န့ၣ် ထီၣ်ဒုးမၤန့ၫ် သုးကီၣ်ကးအဘၢၣ်ဒိၣ်သုးကလၢၤ၀ံၤ လါမ့ၤ(၂၈)သီ,ဟါကတီၫ် ထီၣ်ဒုး မၤန့ၫ်ကဒီးကနဲလ့သုးကလၢၤန့ၣ်လီၤ.ဒ်န့ၣ်အသိး လါမ့ၤ(၂၉)သီ,ဟါ(၆)နၣ်ရံၣ်ဃၣ်ဃၣ်အကတီၫ် မၤန့ၫ်ကဒီး၀ဲဘယ့းနီၣ်သုးကလၢၤလၢအိၣ်ဘူးဒီး၀ီၫ်လ့ၤဒုးယၤသုးကလၢၤအံၤန့ၣ်လီၤ.
ကညီကီၫ်စဲၣ်,၀့ၫ်ရၤမတံကလံၤထံး သုးကီၣ်ကးအသ့ၣ်ဘီဘိသုးကလၢၤစ့ၫ်ကီး ဖဲလါယူၤ(၂)သီနံၤ,မုၫ်ဃ့ၫ်လီၤ (၃)နၣ် ရံၣ်ဃၣ်ဃၣ်န့ၣ် KNUတီခိၣ်ရိၣ်မဲ သုးပာ်ဖှိၣ်တဖၣ် စးထီၣ်က၀ီၤကးတံာ်ဒုး၀ဲဒီးလါယူၤ(၃)သီနံၤ, ဟါ(၇)နၣ်ရံၣ် ဃၣ် ဃၣ်အကတီၫ် ထီၣ်ဒုးမၤန့ၫ်သုးကလၢၤဒီတဖျၢၣ်န့ၣ်လီၤ.
ref:DVB
