လါယူၤ(၁၉)သီ,၂၀၂၅နံၣ်
ဖဲလါယူၤ(၁၈)သီနံၤ,မုၫ်နၤယိာ်အကတီၫ် ဟ့သဒးကီၫ်ဆၣ်အကပၤ သုးကီၣ်ကးအသုးဒုးခးလီၤတၫ်လၢကလံၤကျါ၀ံၤ တၫ်ပိၫ်ဖးတဖၣ်အဃိ ၀့ၫ်ဖီခိၣ်,ဟံၣ်လၢက၀ီၤဒ့ပူၤတဖၣ် ကနိးဘၣ်အသးအဂ့ၫ် ပှၤလီၫ်က၀ီၤဖိတဖၣ်တဲ၀ဲလီၤ.
ဒုးခးလီၤတၫ်လၢတၫ်လီၫ်ဖဲလဲၣ်ဒု တၫ်တသ့ၣ်ညါဒံးဘၣ်ဆၣ် ဟ့သဒးကီၫ်ရ့ၣ်,လၢလ့မၠဲးနၣ်န့ၣ် ရၢၫ်ခၢၣ်သုးမုၫ်ဒိၣ်(AA)သုးပာ်ဖှိၣ်ဒီးသုးကီၣ်ကးသုးအဘၢၣ်စၢၤ တၫ်ဒုးကဲထီၣ်၀ဲအိၣ်န့ၣ်လီၤ.
တၫ်ပိၫ်ဖးလၢအကလုၫ်သီၣ်ဒိၣ်တဖၣ် ဖဲအပူၤကွံာ်အသီတဖၣ်လံၤလံၤန့ၣ် တၫ်နၫ်ဟူတ့ၫ်၀ဲဘၣ်ဆၣ် ဖဲမနၤန့ၣ် ဆူၣ်ထီၣ်၀ဲအဂ့ၫ် လီၫ်က၀ီၤဖိတနီၤတဲ၀ဲလီၤ.
၀့ၫ်လ့မၠဲးနၣ်န့ၣ် အိၣ်စီၤစုာ်ယံၤဒီး၀့ၫ်ဟ့သဒး(၈၀)မဲၣ်ဃၣ်ဃၣ်န့ၣ်လီၤ.စးထီၣ်ဖဲ(၈)နၣ်ရံၣ်ဃၣ်ဃၣ်အကတီၫ်န့ၣ် နၫ်ဟူ ဘၣ်ကဘီယူၤဒုးသုးအကလုၫ်၀ံၤအလီၫ်ခံ တၫ်ပိၫ်ဖးထီၣ်လၢအကလုၫ်ဖးဒိၣ်တဖၣ် သီၣ်ထီၣ်၀ဲအဂ့ၫ် ပှၤ၀့ၫ်ဖိတဖၣ်တဲ ၀ဲလီၤ.မုၫ်နၤ(၁၁း၂၄)နၣ်ရံၣ်အကတီၫ်န့ၣ် နၫ်ဟူဘၣ်၀ဲတၫ်ပိၫ်ဖးထီၣ်၀ဲ(၁၀)ဖျၢၣ်ဃၣ်ဃၣ်၀ံၤအလီၫ်ခံ အိၣ်ဘှ့ၣ်၀ဲအဂ့ၫ် ပှၤ၀့ၫ်ဖိတဖၣ်တဲ၀ဲလီၤ.
လၢယ့ၣ်ကၠံၣ်ကီၫ်ဆၣ်,(၃၄၄)သုးကီၣ်ကးအကျိဖးဒိၣ်သုးကလၢၤကပၤစ့ၫ်ကီး AAသုးပာ်ဖှိၣ်တဖၣ်ဒီးသုးကီၣ်ကးသုးအဘၢၣ်စၢၤ တၫ်ဒုးဆူၣ်၀ဲလီၤ.၀့ၫ်လ့မၠဲးနၣ်န့ၣ် အိၣ်ဖဲ ပသံၣ်-မိၣ်ယွၣ်ကျဲမုၫ်ကပၤ၀ံၤ ဒူသ၀ီတနီၤAAဒီးသုးပာ်ဖှိၣ်တဖၣ် ပၢဆှၢဃာ်၀ဲန့ၣ်လီၤ.
