လါယူၤ(၁၆)သီ,၂၀၂၅နံၣ်
တၫ်ကသူၣ်ထီၣ် ကညီကီၫ်ကီၫ်သူလ့ၤအဂီၫ် သးစၫ်ပှၤကူၣ်သ့တဖၣ်န့ၣ် လိၣ်လၢကနုာ်လီၤမၤသကိးတၫ်လၢ သနၢၣ်ကိးကလုာ်ဒဲးအပူၤ၀ံၤ ခါလၢကဟဲ ပနီၫ်ကစၫ်အဘူၣ်အတီၫ်န့ၣ် ပကဘၣ်စံၣ်ညီၣ်ဒၣ်ပ၀ဲလီၤဒီးပပၢဆှၢ၀ဲကဘၣ်န့ၫ်အဂ့ၫ် ကညီဒီကလုာ်စၢဖှိၣ်ကရၢ -KNU ပှၤပၢၤလီၫ်ဆ့ၣ်နီၤ ပဒိၣ်စီၤကွဲၤထူ၀့တဲ၀ဲလီၤ.
ဖဲလါယူၤ(၁၄)သီနံၤ လီၤဘၣ်(၇၆)၀ီတ၀ီ ကီၫ်သူလ့ၤအမုၫ်နံၤအပူၤ ကညီဒီကလုာ်စၢဖှိၣ်ကရၢ-KNU ပှၤပၢၤလီၫ်ဆ့ၣ်နီၤ ပဒိၣ်စီၤကွဲၤထူ၀့ အတၫ်ကတိၤလီၤအပူၤ ဖၢနုာ်တဲလီၤဃုာ်၀ဲဒ်သိးအံၤန့ၣ်လီၤ.
KNUန့ၣ် ကီၫ်ပယီၤတၫ်ဘှီဘၣ်ဆီတလဲအဂီၫ် ဃုာ်ဒီးကလုာ်ဒူၣ်တၫ်ပၢၫ်ဆၢတၫ်ကရၢကရိတဖၣ်,ကပာ်ဖှိၣ်လိာ်သးဒီး တၫ်ကရၢကရိလၢထီဒါသုးမီၤစိရိၤတဖၣ်ဒီးကဂဲၤလိာ်သူၣ်ထီၣ် ဖဲၣ်ဒရၢၣ်ဒံၣ်မိၣ်ကရ့ၣ်စံၣ်၀ံၤKNUတၫ်ပၢဟီၣ်က၀ီၤပူၤ ကပာ်လီၤတၫ်ပၢတၫ်ဆှၢဒီးတၫ်ပၢဆှၢရဲၣ်ကျဲၤကမျၢၫ်ဂ့ၫ်၀ီတဖၣ်အဂ့ၫ် ပဒိၣ်စီၤကွဲၤထူ၀့တဲ၀ဲလီၤ.
ခဲကနံၤအံၤန့ၣ် မ့ၫ်တၫ်ပၢၫ်ဆၢအကတီၫ်ဒီး ပှၤလၢသူ၀ဲကလုာ်ဒိၣ်စိသနူဒီးသုးမီၤစိရိၤသနူတဖၣ်၀ံၤ ဒုးအိၣ်ထီၣ်ကီၫ် ပူၤတၫ်သဘံၣ်သဘုၣ်တဖၣ် ဒုးလီၤပှီၫ်ကွံာ်၀ဲကန့ၫ်အဂီၫ် မ့ၫ်ကညီကလုာ်အမူအဒါအဂ့ၫ် KNUပှၤပၢၤလီၫ်ဆ့ၣ်နီၤ တဲ၀ဲလီၤ.
တၫ်သူၣ်ထီၣ်ကညီကီၫ်ကီၫ်သူလ့ၤလၢတၫ်ဃူတၫ်ဖိးအပူၤ တကတီၫ်ဃီ ကလုာ်တဖၣ်ဒီးကမျၢၫ်ခဲလၢာ်ကအိၣ်ဆိးဘၣ် မုာ်မုာ်ခုၣ်ခုၣ်အဂီၫ် ဖဲၣ်ဒရၢၣ်ဒံၣ်မိၣ်ကရ့ၣ်စံၣ်လၢအုၣ်ကီၤတၫ်အံၤ တၫ်ကသူၣ်ထီၣ်၀ဲအဂီၫ်စ့ၫ်ကီး ကဂဲၤလိာ်၀ဲဒ်သိးသိး အဂ့ၫ် တဲ၀ဲလီၤ.
ပသူ၀ဲနီၫ်ကစၫ်တၫ်စံၣ်ညီၣ်ပၢလီၤသးန့ၣ် တၫ်ပၢၫ်ဆၢအကတီၫ် မ့ၫ်ထံရူၫ်ကီၫ်သဲးတၫ်နဲၣ်ကျဲတခါလၢ တၫ်ကဘၣ်ဖီၣ် ဃာ်၀ဲလၢအမ့ၫ် နီၫ်ကစၫ်အဘူၣ်အတီၫ်နီၫ်ကစၫ်ကဘၣ်စံၣ်ညီၣ်ပၢလီၤဒီးကညီကလုာ်တကးဘၣ် ကလုာ်ခဲလၢာ် ကဂုၤ ထီၣ်ပသီထီၣ်အဂီၫ် မ့ၫ်တၫ်ဟံးစုနဲၣ်ကျဲ ပၢပြးဂ့ၫ်၀ီဒီးတၫ်ပၢဆှၢရဲၣ်ကျဲၤကမျၢၫ်ဂ့ၫ်၀ီတဖၣ်လီၤအဂ့ၫ် ပဒိၣ်စီၤကွဲၤထူ၀့ တဲ၀ဲလီၤ.
ဒ်ခ့ခါစိၤဆၢကတီၫ်ခဲအံၤအသိး ထံရူၫ်ကီၫ်သဲးတၫ်အိၣ်သးတၫ်ဆီတလဲတဖၣ်, ပၢပြးဂ့ၫ်၀ီဒီးတၫ်ပၢဆှၢရဲၣ်ကျဲၤကမျၢၫ် ဂ့ၫ်၀ီတဖၣ်န့ၣ် တၫ်ကသ့ၣ်ညါနၫ်ပၢၫ်ဘၣ်အဂီၫ် တၫ်ကဘၣ်မၤလိန့ၫ်ဃာ်ဒီးခါဆူညါ ပနီၫ်ကစၫ်အဘူၣ်အတီၫ်န့ၣ် ပနီၫ် ကစၫ်ဒၣ်၀ဲ ပကဘၣ်စံၣ်ညီၣ်၀ံၤ ပၢဆှၢကန့ၫ်အဂီၫ် တၫ်ကဘၣ်ဒုးအိၣ်ဖျဲၣ်ထီၣ် ခါဆူညါစၢၤသွဲၣ်သီတဖၣ်အဂ့ၫ် တဲဃာ်၀ဲလီၤ.
ကညီဒီကလုာ်တၫ်ပၢၫ်ဆၢတၫ်ဟူးတၫ်ဂဲၤန့ၣ် ဒ်ကညီကလုာ်အတၫ်မုၫ်လၫ်ဒီးတၫ်မံမီၫ်လၢအမ့ၫ် တၫ်သူၣ်ထီၣ်ကီၫ်သူလ့ၤ ဒီးကညီကလုာ်အသးပူၤကီၫ်သူလ့ၤအိၣ်၀ဲန့ၣ် တၫ်ဂ့ၫ်လိာ်၀ဲတန့ၫ်ဘၣ်အဂ့ၫ် ကညီဒီကလုာ်စၢဖှိၣ်ကရၢ KNUပှၤပၢၤလီၫ် ဆ့ၣ်နီၤ ပဒိၣ်စီၤကွဲၤထူ၀့တဲ၀ဲလီၤ.
