လါယူၤ(၁၆)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူသထူၣ်, ကၠဲးထိၣ်ကီၢ်ဆၣ်အပူၤ ခီဖျိသုးကီၣ်ကးအသုး ခးလီၤကျိဖးဒိၣ်အဃိ လီၢ်က၀ီၤကမျၢၢ်ပိၥ်ခွါ(၁)ဂၤသံ၀ဲ၀ံၤ (၄)ဂၤဘၣ်ဒိ၀ဲအဂ့ၢ် KNUလီၢ်ခၢၣ်သးပၥ်ဖျါဃၥ်၀ဲတၢ်ကစီၣ်န့ၣ်လီၤ.
လါယူၤ(၁၁)သီအနံၤန့ၣ် ခီဖျိသုးကီၣ်ကးအသုး (ခမရ-၃)သုးရ့ၣ်သုးကလၢၤခးလီၤကျိဖးဒိၣ်ဆူ ကၠဲးထိၣ်ကီၢ်ဆၣ်, အလူကၠံသ၀ီအပူၤအဃိ ကမျၢၢ်ပိၥ်ခွါလၢသးနံၣ်အိၣ်(၃၄)နံၣ်တဂၤ သံ၀ဲဒီးပှၤ(၄)ဂၤဘၣ်ဒိ၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
ခီဖျိကျိဖးဒိၣ်အဃိ ဟံၣ်ဃီတနီၤဒီးသိလ့ၣ်(၁)ခိၣ် ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ. သုးကီၣ်ကးအသုးန့ၣ် ခးလီၤ၀ဲကျိဖးဒိၣ်တဖၣ်ဆူ ကၠဲးထိၣ်ကီၢ်ဆၣ်, မဲလၣ်သ၀ီကရူၢ်, ဘယါသ၀ီအပူၤခဲအံၤခဲအံၤလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါမ့ၤအလၢၥ်စ့ၢ်ကီးန့ၣ် ကီၢ်ရ့ၣ်ဒူသထူၣ်, သထူၣ်ကီၢ်ဆၣ်အပူၤ ပ့နဲတီသ၀ီဖိလၢ အလဲၤဃုအီၣ်ကုၤတလးအီဒံၣ်လၢပှၢ်ပူၤတဂၤအံၤ သုးကီၣ်းအသုးကျိၤဖီၣ်အီၤ၀ံၤမၤဆူၣ်မၤဆါမၤသံကွံၥ်အီၤအဂ့ၢ် ခ့ၣ်အဲၣ်ယူၣ်-ဒူသထူၣ် ပၥ်ဖျါဃၥ်၀ဲတၢ်ကစီၣ်န့ၣ်လီၤ.
လါမ့ၤအတီၢ်ပူၤ ပယီၤသုးမီၤစိရိၤသုး မၤကလံၤကျါတၢ်ဒုးခးကျိဖးဒိၣ်တဖၣ်လၢ သထူၣ်ကီၢ်ဆၣ်ဒီးကၠဲးထိၣ်ကီၢ်ဆၣ်အပူၤအိၣ်ဒူသ၀ီတဖၣ်အပူၤဃိလီၢ်က၀ီၤကမျၢၢ်သံဒီးဘၣ်ဒိတဖၣ်အိၣ်ထီၣ်၀ဲအသိး တကးဘၣ်ကၠဲးထိၣ်ကီၢ်ဆၣ်အပူၤလီၢ်က၀ီၤကမျၢၢ်ဖိ(၈)ကထိဘျဲၣ်ဘၣ်ဃ့ၢ်ပူၤဖျဲးသးအဃိလိၣ်ဘၣ်၀ဲပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤတဖၣ်န့ၣ်လီၤ.
ဒ်န့ၣ်အသိး ဖဲအပူၤကွံၥ် လါယူၤ(၉)သီအနံၤန့ၣ် သုးကီၣ်ကးအသုး ဟဲတ့ၢ်လီၤမ့ၣ်ပိၢ် ဆူသုးက့(၆), ကီၢ်ရ့ၣ်ဒူပျၥ်ယၥ်, ကြုၢ်တုကီၢ်ဆၣ်, ပဲၢ်ယဲးသ၀ီတၢ်သိၣ်လိကၠိပူၤအဃိ ဖိသၣ်(၃)ဂၤပၣ်ဃုၥ် ကမျၢၢ်ဖိ(၅)ဂၤဘၣ်သံ၀ဲ၀ံၤ (၂၂)ဂၤဘၣ်ဒိ၀ဲန့ၣ်လီၤ.
