လါမ့ၤ(၁၃)သီ,၂၀၂၅နံၣ်
ခံခီခံကပၤ ဘိးဘၣ်ရၤလီၤဃာ်၀ဲလၢ ပတုာ်တၫ်ခးဘၣ်ဆၣ် လၢကၠီးဖၠူၣ် သုးကီၣ်ကးဒီးရၢၫ်ခၢၣ်သုးမုၫ်ဒိၣ်(AA)တဖၣ်အဘၢၣ်စၢၤ တၫ်ဒုးဆူၣ်ထီၣ်၀ဲန့ၣ်လီၤ.
ကၠီးဖၠူၣ်-မအံၣ်ကျဲမုၫ်ဒီတဘိ သုးကီၣ်ကးအသုးဖိအစိၣ်တဖၣ် အိၣ်ပှဲၤကျဲမုၫ်ပူၤ၀ံၤ တွံၫ်က့ၤ၀ဲတန့ၫ်ဘၣ်အမဲာ်ညါ သုးကီၣ်ကးအသုးန့ၣ် ဘၣ်ဃ့ၫ်လီၤမုၫ်ပြံပြါအဂ့ၫ် တၫ်သ့ၣ်ညါဘၣ်လၢပှၤလီၫ်က၀ီၤဖိတဖၣ်အိၣ်န့ၣ်လီၤ.
ဖဲပၠဲၣ်စ့ၣ်က့ၣ်သ၀ီကပၤ တၫ်ဒုးကဲထီၣ်အပူၤ သုးကီၣ်ကးန့ၣ် ဘၣ်ပာ်တ့ၫ်ကွံာ်အသုးဖိအစိၣ်တဖၣ်၀ံၤ ဘၣ်ဃ့ၫ်ပူၤဖျဲးသးအဂ့ၫ် တၫ်သ့ၣ်ညါဘၣ်လီၤ.
ဖဲလါယူၤ(၁၀)သီအနံၤ,ဟါခီအကတီၫ် သုးကီၣ်ကးန့ၣ် ဒုးတ့ၫ်လီၤမ့ၣ်ပိၫ် ဖဲပၢၤကီၫ်သုးရ့ၣ်(၃၂)အကပၤ၀ံၤ အိၣ်လၢကဘီပူၤ ခးစိတၫ်လၢကျိဖးဒိၣ်တဖၣ်အဂ့ၫ် တၫ်သ့ၣ်ညါဘၣ်လီၤ.
“လၢ(၃)သီနံၤဟါခီဒီးတုၤလၢကနံၤအံၤ တၫ်ဒုးကဲထီၣ်၀ဲလီၤ.ကလံၤကျါမ့ၫ်ဂ့ၤ,ဒြိဒီးကျိဖးဒိၣ်မ့ၫ်ဂ့ၤ သုးကီၣ်ကးခးစၢၤ၀ဲလီၤ.သုးကီၣ်ကးတကပၤသံအါလီၤ.နုာ်လီၤဃ့ၫ်လၢသုးရ့ၣ်ပူၤ,ပာ်ဖှိၣ်လိာ်သးဒီးဟးထီၣ်ဒုးတၫ် မၤ၀ဲဒ်န့ၣ်အသိးအဂ့ၫ် ရၢၫ်ခၢၣ်ဂ့ၫ်ခီၣ်ထံးတၫ်ကစီၣ်တဲ၀ဲလီၤ.
သုးကီၣ်ကးန့ၣ် သူ၀ဲ ခိ,ထံ,ကလံၤသုးတဖၣ်၀ံၤ ဒုးတၫ်ဖဲကၠီးဖၠူၣ်တၫ်ဒုးဘၣ်ဆၣ် လၢတၫ်မဲာ်ညါတၫ်ဒုးပျီအပူၤ သုးကီၣ်ကးအသုးဖိတဖၣ် ဘၣ်ဂုၤက့ၤအခံဃ့ၫ်ပြံဃ့ၫ်ပြါ၀ံၤ နုာ်လီၤဆူ နီၫ်ဂံၫ်(၃၂)ပၢၤကီၫ်သုးကလၢၤအပူၤဒီး ဘၣ်ပာ်ဖှိၣ်ထီၣ်အသးအဂ့ၫ် ဂ့ၫ်ခီၣ်ထံးတၫ်ကစီၣ်တဲ၀ဲလီၤ.
သုးကီးကးန့ၣ် လၢဒညး၀တံၣ်ထံသုး၀ဲၤလီၫ်ခိၣ်သ့ၣ်အပူၤ သုးဟံၣ်ဖိဃီဖိဒီးပၢပြးဟံၣ်ဖိဃီဖိတဖၣ်ဒီး ထံယိာ်ကဘီသန့တၫ်တိာ်ကျဲၤအပူၤ ပှၤတရူးဖိတဖၣ် သုးက့ၤ၀ဲဆူ ၀့ၫ်တကူၣ်န့ၣ်လီၤ.
သုးကီၣ်ကးဟီၣ်က၀ီၤကပၤ အိတီ,ကိခၠ့ၣ်သ၀ီတဖၣ်အပူၤ ပှၤလီၫ်က၀ီၤဖိ လွံၫ်ကထိဂၤဃၣ်ဃၣ် အိၣ်ကးတံာ်သးအဂ့ၫ် တၫ်သ့ၣ်ညါဘၣ်လီၤ.
