လါယူၤ(၁၃)သီ,၂၀၂၅နံၣ်
ကဘီယူၤတခိၣ်လၢအိၣ်ဟးထီၣ်ဖဲကီၢ်အ့ဒံယါ မုၢ်နုၢ် Ahmedabad၀့ၢ်ဒီးကလဲၤဆူ ၀့ၢ်လိဒိၣ်ကဲး၀ဲးကဘီယူၤသန့အံၤ လီၤတဲၥ်ကွံၥ်၀ဲဖဲAhmedabadကဘီယူၤသန့အကပၤ က၀ီၤဒ့အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
ကဘီယူၤနီၣ်ဂံၢ် AI171လၢအလီၤတဲၥ်ကွံၥ်အပူၤ ပှၤဟးကသုၣ်ဖိ(၂၃၂)ဂၤဃုၥ်ဒီးကဘီယူၤပှၤမၤတၢ်ဖိ(၁၂)ဂၤ လဲၤဒိးဃုၣ်၀ဲအဂ့ၢ် ကီၢ်အ့ဒံယါ, ကလံၤကျါတၢ်နဲၣ်လီၤ၀ဲၤကျိၤ ပှၤဘၣ်မူဘၣ်ဒါ တဲပၥ်ဂၢၢ်ပၥ်ကျၢၤ၀ဲဆူ APတၢ်ကစီၣ်သန့အအိၣ်န့ၣ်လီၤ.
တၢ်ဒိးန့ၢ်ဘၣ်တၢ်ကစီၣ်တဖၣ်အဖီခိၣ် ဖဲကဘီယူၤလီၤတဲၥ်အပူၤန့ၣ် အစှၤကတၢၢ်ပှၤဘၣ်သံ၀ဲ(၂၀၄)ဂၤအဂ့ၢ် ကီၢ်အ့ဒံယါပၢၤကီၢ်သုး ပှၤဘၣ်မူဘၣ်ဒါ တဲပၥ်ဂၢၢ်ပၥ်ကျၢၢ်၀ဲဆူ ဘံၣ်ဘံၣ်စံၣ်တၢ်ကစီၣ်သန့အအိၣ်န့ၣ်လီၤ. ဘၣ်ဆၣ်ဒီး ပှၤသံတဖၣ်အံၤန့ၣ် မ့ၢ်ပှၤလၢဟဲဒိးကဘီယူၤတဖၣ်ဧါ မ့တမ့ၢ် ပှၤလၢအိၣ်လၢက၀ီၤဒ့ပူၤတဖၣ်ဧါန့ၣ် တၢ်ပၥ်ဂၢၢ်ပၥ်ကျၢၢ်အီၤတန့ၢ်ဒံးဘၣ်.
ကဘီယူၤအံၤန့ၣ် ယူၢ်ထီၣ်လၢကလံၤကျါယံၤအစဲးကး၀ံၤ လီၤတဲၥ်ကွံၥ်အဂ့ၢ် တၢ်သ့ၣ်ညါဘၣ်န့ၣ်လီၤ. ကဘီယူၤန့ၣ် လီၢ်ခံကတၢၢ်တၢ်ဆဲးကျိးအီၤန့ၢ် ဖဲ၆၂၅ပ့ၣ်အယံၤ၀ံၤ လီၤတဲၥ်ကွံၥ်၀ဲဒၣ် ဖဲပှၤအိၣ်က၀ီၤဒ့အပူၤအဂ့ၢ် Flightradar24 ထုးထီၣ်ပၥ်ဖျါဃၥ်၀ဲန့ၣ်လီၤ.
ကဘီယူၤလီၤတဲၥ်ကွံၥ်အပူၤ ကီၢ်အ့ဒံယါထံဖိကီၢ်ဖိ (၁၆၉)ဂၤ, ယူၣ်က့ၣ်ထံဖိကီၢ်ဖိ(၅၃)ဂၤ, ခန့ဒၣ်ထံဖိကီၢ်ဖိ(၁)ဂၤဒီး ပီၣ်တူၣ်ကံၣ်ထံဖိကီၢ်ဖိ(၇)ဂၤ ဟဲဒိးဃုၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ပှၤလၢအဘၣ်ဒိဘၣ်ထံးတဖၣ်တခီ တၢ်လဲၤဆှၢအီၤဆူ တၢ်ဆါဟံၣ်လၢအဘူးဒီးဖဲန့ၣ်တဖၣ်အပူၤ၀ံၤ ဂ့ၢ်ဂီၤအူဘၣ်ဒိးကူစါယါဘျါအသးအဂ့ၢ် Air Indiaကလံၤကျိၤ တဲပၥ်ဂၢၢ်ပၥ်ကျၢၢ်၀ဲန့ၣ်လီၤ.
