လါယူၤ(၉)သီ,၂၀၂၅နံၣ်
တလၢၤ,ကညီပာ်ဃုာ် ကီၫ်ခီဒီးကီၣ်စဲၣ်တနီၤအပူၤ တၫ်ဖီၣ်သမံသမိး၀ဲ သိလ့ၣ်လၢတအိၣ်ဒီးလဲၣ်စ့ၣ်တဖၣ်အဃိ ကမျၢၫ်ပှၤတ၀ၢတၫ်မၤစၢၤကရၢအါတက့ၫ် ဘၣ်အိၣ်ပတုာ်ဃာ်သးအဂ့ၫ် ပှၤတ၀ၢတၫ်မၤစၢၤကရၢတဖၣ်တဲ၀ဲလီၤ.
သုးကီၣ်ကးအခိၣ် မ့အီၣ်လဲၣ်န့ၣ် အပူၤကွံာ်လါမ့ၤ(၂၀)သီနံၤ လၢန့ၣ်ပၠံၣ်ဒီၣ်တၫ်အိၣ်ဖှိၣ်အပူၤ တၫ်ဒိးသိလ့ၣ်ဒီးမီၣ်တီၣ် တုၤလၢတအိၣ်ဒီးလဲၣ်စ့ၣ်တဖၣ်သုတအိၣ်တဂ့ၤအဂီၫ် တၫ်ကဘၣ်ပၢဆှၢရဲၣ်ကျဲၤ၀ဲအဂ့ၫ် ဟ့ၣ်လီၤတၫ်ကလုၫ်နဲၣ်လီၤ၀ဲ ၀ံၤအလီၫ်ခံ စးထီၣ်ဖဲလါယူၤ(၁)သီအနံၤန့ၣ် ပာ်လီၤတၫ်ရဲၣ်တၫ်ကျဲၤ စးထီၣ်ဖီၣ်တၫ်န့ၣ်လီၤ.
တလၢၤကီၫ်စဲၣ်ပူၤ ၀့ၫ်မီၣ်လမၠဲၣ်,ပီၣ်,သထူၣ်,ကၠဲးထိၣ်,ကညီကီၫ်စဲၣ်ပူၤ ဖၣ်အၣ်,လူၫ်ပျဲၫ်ကီၫ်ဆၣ်တဖၣ်အပူၤ ကျဲမုၫ်ဖီ ခိၣ်တၫ်သမံသမိးတြဲၤတဖၣ်,ကျဲသဂၢၫ်ဒီးကျဲဖးဒ့တဖၣ်အပူၤ ဖီၣ်သမံသမိး၀ဲ သိလ့ၣ်ဒီးမီၣ်တီၣ်တုၤလၢတအိၣ်ဒီး လဲၣ်စ့ၣ်တဖၣ်န့ၣ်လီၤ.
ဒ်န့ၣ်အသိး,လၢမကွ့,ပကိ,မါတလ့ကီၫ်ခီတဖၣ်အပူၤစ့ၫ်ကီး တၫ်ဖီၣ်၀ဲသိလ့ၣ်လၢတအိၣ်ဒီးလဲၣ်စ့ၣ်တဖၣ်အိၣ်၀ဲအဂ့ၫ် ဂ့ၫ်ခီၣ်ထံးတၫ်ကစီၣ်တဖၣ်တဲ၀ဲအဖီခိၣ် တၫ်သ့ၣ်ညါဘၣ်လီၤ.
တၫ်ဖီၣ်တၫ်ဒ်သိးအံၤအဃိ ပှၤတ၀ၢတၫ်မၤစၢၤကရၢလၢ သူ၀ဲသိလ့ၣ်လၢတအိၣ်ဒီးလဲၣ်စ့ၣ်တဖၣ် ဘၣ်ပတုာ်ကွံာ်တၫ် ဆီၣ်ထွဲမၤစၢၤတၫ်ဖံးတၫ်မၤတဖၣ်၀ံၤ ဂ့ၫ်ဂီၫ်အူတၫ်ဂ့ၫ်မ့ၫ်အိၣ်ထီၣ်န့ၣ် ဘၣ်မၤစၢၤ၀ဲခီဖျိလၢသိလ့ၣ်လၢအိၣ်ဒီး လဲၣ်စ့ၣ် တဖၣ်အဂ့ၫ်န့ၣ်လီၤ.
“တၫ်ဖံးတၫ်မၤတဘၣ်လိာ်ဖိးဒ့ဘၣ်.ပှၤဆူးပှၤဆါတဖၣ်အဂီၫ်ဒုကီခဲ၀ဲလီၤ.သိလ့ၣ်တဖၣ်န့ၣ် ဆှၢပှၤဆါတုၤ ဖဲဃိၣ်လိၣ်ကျိတိၤအကပၤဒီးဖဲန့ၣ်တဆီ ဘၣ်ဆှၢ၀ဲဆူဖၣ်အၣ်တၫ်ဆါဟံၣ်လၢသိလ့ၣ်အဂၤအဂ့ၫ်”ကညီကီၫ်စဲၣ်ပူၤ ပှၤတ၀ၢတၫ် မၤစၢၤကရၢတခါ အပှၤဘၣ်မူဘၣ်ဒါတဂၤတဲ၀ဲလီၤ.
သုးကီၣ်ကးအတၫ်ရဲၣ်တၫ်ကျဲၤလၢတၫ်ဖီၣ်သိလ့ၣ်လၢတအိၣ်ဒီးလဲၣ်စ့ၣ်န့ၣ် တမ့ၫ်ဒ်သိးအပူၤကွံာ် သိလ့ၣ်လၢဟးထီၣ် ဟးလီၤတဖၣ်ဖီၣ်၀ဲဘၣ်အမဲာ်ညါ နုာ်လီၤဖီၣ်၀ဲလၢဟံၣ်ကရၢၫ်ပူၤဒၣ်လဲၣ်အိၣ်၀ဲအဂ့ၫ် ပှၤလီၫ်က၀ီၤဖိတနီၤတဲ၀ဲလီၤ.
“လၢမါတလ့တခီ အၢဒိၣ်မးလီၤ.နုာ်လီၤသမံသမိး၀ဲတုၤလၢကျးပူၤလီၤ. လၢဂီၤခီတကပၤန့ၣ်ဖီၣ်တၫ်အၢမးလီၤ.ဟး ထီၣ်ဘူၣ်ဒၣ်လၢမုၫ်ဆါဒီးဟါခီလီၤသီတကပၤလီၤအဂ့ၫ်”ပှၤ၀့ၫ်မါတလ့ဖိတဂၤတဲ၀ဲလီၤ.
လၢမီၣ်လမၠဲၣ်,ပီၣ်,ဖၣ်အၣ်န့ၣ် တၫ်ဖီၣ်သိလ့ၣ်လၢတအိၣ်ဒီးလဲၣ်စ့ၣ်တဖၣ်အပူၤ ဖီၣ်ဟံးန့ၫ်ဃာ်သိလ့ၣ်တဖၣ်တကး ဘၣ်,သိလ့ၣ်ကစၫ်တဖၣ်စ့ၫ်ကီးဖီၣ်ဃုာ်၀ဲဒီးလိာ်ဘၢလိာ်ကွီၫ်၀ဲဒၣ်လဲၣ်အိၣ်အဂ့ၫ် လီၫ်က၀ီၤဖိတနီၤတဲ၀ဲဘၣ်ဆၣ် တၫ် ပာ်ဂၢၫ်ပာ်ကျၢၤ၀ဲတန့ၫ်ဒံးဘၣ်.
တၫ်ဖီၣ်သိလ့ၣ်လၢတအိၣ်ဒီးလဲၣ်စ့ၣ်တဖၣ်အပူၤ ပၢၤကီၫ်လၢကွၫ်ထွဲသိလ့ၣ်တၫ်ဟးထီၣ်က့ၤလီၤ, ပၢၤကီၫ်,သုးဖိ, ပၠူၣ် စီထံ,ဂၢၤကီၫ်သုးတဖၣ် မၤ၀ဲ၀ံၤ မ့မ့ၫ်လၢ၀ဲၤကျိၤ၀ဲၤဒ့ပဒိၣ်ပှၤမၤတၫ်ဖိသိလ့ၣ်ဒီးတၫ်ကရၢကရိလၢဖီၣ်လိာ်စုဒီးသုးကီၣ် ကးအသိလ့ၣ်တဖၣ်တခီ တၫ်ဖီၣ်၀ဲတအိၣ်ဘၣ်အဂ့ၫ် ပှၤလီၫ်က၀ီၤဖိတဖၣ်တဲ၀ဲအဖီခိၣ် တၫ်သ့ၣ်ညါဘၣ်န့ၣ်လီၤ.
Ref: Mizzima
