လါယူၤ(၉)သီ,၂၀၂၅နံၣ်
ပယီၤသုးကီၣ်ကးအသုး ဆှၢအါထီၣ်သုးမၤစၢၤတဖၣ်အါအါဂီၢ်ဂီၢ်ဆူ ကညီကီၢ်စဲၣ်, ကီးတရ့းကီၢ်ဆၣ်အပူၤ၀ံၤ တၢ်ဒုးတဖၣ်စ့ၢ်ကီးဆူၣ်၀ဲအဂ့ၢ် တၢ်ပၢၢ်ဆၢသိၣ်ဒူတဂၤ စံး၀ဲန့ၣ်လီၤ.
“ဆှၢသုးအဂံၢ်အဘါအါအါဂီၢ်ဂီၢ်ဆူကီးတရံး၀့ၢ်အနုၥ်လီၤသုးကီၣ်ကးအနီၣ်ဂံၢ်(၁၂)သုးတၢ်နဲၣ်လီၤ၀ဲၤလီၢ်ခိၣ်သ့ၣ်(စကခ၁၂)ဒီး ၀့ၢ်ပူၤအိၣ် အသုးနီၣ်ဂံၢ်(၉၇)ခီၣ်သုးရ့ၣ်တဖၣ်အအိၣ်န့ၣ်လီၤ. (စကခ-၁၂)အသုးဂံၢ်ဘါတဖၣ် ဆှၢပၥ်သုးကျိၤဆူ ကီးတရံး-ကြုၢ်တုကျဲမုၢ်အဖီခိၣ်၀ံၤ မ့မ့ၢ်လၢ(ခလရ-၉၇)သုးရ့ၣ်တခီ ဆှၢပၥ်၀ဲဆူ အ့ရှၢၣ်ကျဲမုၢ်အဖီခိၣ် အီၣ်စ့ၣ်ယၣ်သုးကျိၤအအိၣ်အဂ့ၢ် တၢ်ပၢၢ်ဆၢသိၣ်ဒူတဖၣ်စံး၀ဲန့ၣ်လီၤ.
လါယူၤ(၇)သီအနံၤန့ၣ် တၢ်ဒုးကဲထီၣ်တ့ၢ်၀ဲလၢ ကီးတရံး၀့ၢ်အနုၥ်လီၤ အ့ရှၢၣ်ကျဲမုၢ်အဖီခိၣ် ကီးနွဲး, တတၣ်ကူသ၀ီတဖၣ်အပူၤအဂ့ၢ် စံး၀ဲန့ၣ်လီၤ. ဖဲလၢတၢ်ဒုးအံၤအပူၤ ခံခီယၢ်ပၤ တၢ်ဘၣ်ဒိဘၣ်ထံးအိၣ်ထီၣ်၀ဲ၀ံၤ သုးကီၣ်ကးအပှၤသုးဖိတၢ်သံအစိၣ်ခံစိၣ် အိၣ်တ့ၢ်၀ဲအဂ့ၢ် စံး၀ဲန့ၣ်လီၤ.
“အဆှထီၣ်သုးအဂံၢ်အဘါ(၂၀၀)ဆူအီၣ်စ့ၣ်ယၣ်သုးကျိၤအအိၣ်န့ၣ်လီၤ.အဃိန့ၣ်အမ့ၢ်ပၥ်ဖှိၣ်ဒီးအသုးလၢအိၣ်လၢကစၢၢ်ခိၣ်တဖၣ်န့ၣ် ခဲလၢၥ်ကအိၣ်၀ဲ(၄၀၀)ဃၣ်ဃၣ်”အဂ့ၢ် တၢ်ပၢၢ်ဆၢသိၣ်ဒူတဂၤ စံး၀ဲန့ၣ်လီၤ.
ဖဲလါယူၤ(၈)သီအနံၤ, ဂီၤအဆၢကတီၢ်စ့ၢ်ကီး တၢ်ဒုးကဲထီၣ်တ့ၢ်၀ဲလၢ ကီးတရံးဒီးရၤမတံကီၢ်ဆၣ်အဆၢ ကွ့ကလ့သ၀ီပူၤအဂ့ၢ် အ၀ဲတဲအါထီၣ်၀ဲန့ၣ်လီၤ.
တကးဘၣ်အသုးကျိၤလၢကလဲၤမၤစၢၤတၢ်ဆူ(စကခ၁၂)တဖၣ်တၢ်ဘၣ်သဂၢၢ်ခးလိၥ်သးအိၣ်ထီၣ်၀ဲဒီးတၢ်ပၢၢ်ဆၢသုးအဘၢၣ်စၢၤ ဖဲကိတဲၣ်ဒီးနွံတဲၣ်သ၀ီကျဲမုၢ်အဖီခိၣ်န့ၣ်လီၤ. သုးကီၣ်ကးန့ၣ် ဒ်သိး ၀့ၢ်ကြုၢ်တုသုတလီၤအဂီၢ် ဆှၢပၥ်သုးအဂံၢ်အဘါကတီၤဃၥ်၀ဲတၢ်ခီၣ်ဆၢတၢ်ဒုးအဂီၢ်န့ၣ်လီၤ. KNLA, PDFသုးပၥ်ဖှိၣ် အမၤဒုးယၤရဲၣ်ကျဲၤတဖၣ်အပူၤ သုးကီၣ်ကးတပၤ ဟဲတ့ၢ်လီၤမ့ၣ်ပိၢ်လၢကလံၤကျါအဘျီတဖၣ်အဘျီအသိး သူ၀ဲပတီၢ်ထီဒြိတဖၣ်၀ံၤ ခီၣ်ဆၢဒုးက့ၤတၢ်အဂ့ၢ် စံး၀ဲန့ၣ်လီၤ.
ဖဲအပူၤကွံၥ် လါအ့ဖြ့ၣ်လံၤလံၤန့ၣ် တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုး၀ဲ သုးကီၣ်ကးအသုးကလၢၤလၢအိၣ်ဖဲ အ့ရှၢၣ်ကျဲမုၢ်အဖီခိၣ် ကီးတရံးကီၢ်ဆၣ်ဒီဘ့ၣ်အပူၤတဖၣ်န့ၣ်လီၤ.
သုးကီၣ်ကးအအီၣ်စ့ၣ်ယၣ်သုးကျိၤလၢ အဟဲဟံးဃၥ်တၢ်လီၢ်ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆)ဟီၣ်က၀ီၤအပူၤအိၣ် ကီးတရံး၀့ၢ်အခိၣ်အဃၢၤဒီးကီးတရံး၀့ၢ်တုၤတီနီၢ်ကစၢၢ်အဖီခိၣ် တီနီၢ်ထံလီၤဆူတဖၣ်အံၤ (KNLA)ဒီးတၢ်ပၢၢ်ဆၢသုးပၥ်ဖှိၣ်တဖၣ် က၀ီၤကးတံၥ်ဒီၣ်တဲၥ်ဃၥ်၀ဲန့ၣ်လီၤ. ၀ံၤအလီၢ်ခံတၢ်မၤဆူၣ်ထီၣ်ဒုးယၤရဲၣ်ကျဲၤတဖၣ်အဃိ စးထီၣ်လၢအပူၤကွံၥ်လါလံၤလံၤန့ၣ် တၢ်လီၢ်တဖၣ်အံၤအပူၤ တၢ်ဒုးတဖၣ်ဆူၣ်ထီၣ်၀ဲန့ၣ်လီၤ.
ကီးတရံး၀့ၢ်ကလံၤထံးဒီးကလံၤစိးတၢ်လီၢ်တဖၣ်, ကီးတရံးဒီးကြုၢ်တု၀့ၢ် ကျဲမုၢ်ဒီတကျိၤအဖီခိၣ်န့ၣ် တၢ်ဒုးတဖၣ်ဆူၣ်၀ဲအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
ကတီၢ်ခဲအံၤစှၤသီအတီၢ်ပူၤ ကၠီၣ်တဲၣ်-ကညီကီၢ်ဆၢ၀့ၢ်လၢအမ့ၢ် ၀့ၢ်ရၤမတံအပူၤအိၣ် သုးခိး၀့ၢ်လၢအမ့ၢ် (ခလရ-၂၇၅)သုးရ့ၣ်အပူၤအံၤစ့ၢ်ကီး တၢ်ပၢၢ်ဆၢသုးတဖၣ် ခးစိဃီၤတၢ်တဖၣ်အိၣ်ထီၣ်၀ဲန့ၣ်လီၤ.
လါမ့ၤ(၃၁)သီအနံၤ, ဟါလီၤခီအဆၢကတီၢ်န့ၣ် တၢ်ပၢၢ်ဆၢသုးပၥ်ဖှိၣ်တဖၣ် ခးစိဃီၤ၀ဲကျိဖးဒိၣ်တဖၣ်ဆူ (ခလရ-၂၇၅)သုးရ့ၣ်အပူၤ အိၣ်ထီၣ်၀ဲတပယူၥ်ဃီအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
Ref: hlaing info
