လါယူၤ(၅)သီ,၂၀၂၅နံၣ်
အ့ၣ်ယၣ်၀တံၣ်ကီၫ်ခီ,မအူၣ်ပ့ၣ်ဒီးကၠဲးလးကီၫ်ဆၣ်အပူၤ ဘုအ့ကၢၫ်(၁,၀၀၀)ဘျဲၣ်န့ၣ် ချိၣ်ထူတဖၣ်နုာ်လီၤမၤဟးဂီၤ၀ဲအဂ့ၫ် လီၫ်က၀ီၤပှၤထူစံာ်ဖိတဖၣ်တဲ၀ဲလီၤ.
ဖဲချိၣ်ထူတဖၣ်နုာ်လီၤမၤဟးဂီၤတၫ်အကတီၫ် လၢတကပၤ ကသံၣ်မၤသံတၫ်ဖိဃၣ်တဖၣ် အပှ့ၤကလံၤဒိၣ်ထီၣ်တလၢအဃိ ပှၤထူစံာ်ဖိတဖၣ်ကနီဖျိးကွံာ် ချိၣ်ထူတဖၣ်အဂီၫ် ကွၫ်ဆၢၣ်မဲာ်ဘၣ်တၫ်ကီတၫ်ခဲအဂ့ၫ် တဲ၀ဲလီၤ.
မအူၣ်ပ့ၣ်ကီၫ်ဆၣ် ပှၤလီၫ်က၀ီၤဖိတဂၤတခီ”ဖဲဘုထီၣ်သီအကတီၫ် ချိၣ်ထူတဖၣ်လီၤအဃိ ဘၣ်ဒိဆါမးလီၤ.ကပှ့ၤကသံၣ်မၤသံတၫ်ဖိဃၣ်အဂီၫ် တၫ်လၢာ်ဘူၣ်လၢာ်စ့ၤအါအဃိ ကီဒိၣ်မးလၢတၫ်ကဘှါဆှဲအဂီၫ်န့ၣ်လီၤ.အၢဒိၣ်မးလၢချိၣ် ထူတဖၣ်န့ၣ်ဒံၣ်လီၤချ့မးလီၤ.ကဘၣ်မၤဒ်လဲၣ်တသ့ၣ်ညါလၢၤဘၣ်အဂ့ၫ်”တဲ၀ဲလီၤ.
ချိၣ်ထူလၢမၤဟးဂီၤဘုတဖၣ်န့ၣ် မအူၣ်ပ့ၣ်ဒီးကၠဲးလးကီၫ်ဆၣ်ပူၤ လၢတနံၣ်အံၤတၫ်ကသူၣ်ဘုအဂီၫ် ဘုဖိလၢတၫ်သူၣ်လီၤဃာ်၀ဲတဖၣ် မၤဟးဂီၤကွံာ်၀ဲအဃိ တၫ်နီဟးထီၣ်၀ဲတန့ၫ်ဘၣ်ဒီးတၫ်အိၣ်သးအိၣ်ထီၣ်လၢ ဘုဖိတဖၣ်ကဘၣ်ဟးဂီၤ ၀ဲန့ၣ်လီၤ.
ကၠဲးလးကီၫ်ဆၣ် ပှၤထူစံာ်ဖိတဂၤတခီ”ချိၣ်ထူမၤဟးဂီၤအဃိ ဘၣ်က့ၤသူၣ်က့ၤအိၣ်လံ(၂)ဘျီလံ.အခဲအံၤကက့ၤသူၣ် အဂီၫ် စ့တအိၣ်လၢၤဘၣ်.ချိၣ်ထူသုတလီၤအဂီၫ် ဘှါဆှဲ၀ဲလၢကျဲအကလုာ်ကလုာ်ဘၣ်ဆၣ် အါထီၣ်ကွ့ၫ်ကွ့ၫ်အဂ့ၫ်” တဲ၀ဲလီၤ.
မအူၣ်ပ့ၣ်ဒီးကၠဲးလးကီၫ်ဆၣ် ပှၤလီၫ်က၀ီၤဖိတဖၣ်န့ၣ် ဘၣ်ပာ်ဂံၫ်ပာ်ဘါဒၣ် တၫ်သူၣ်တၫ်ဖျးတၫ်ဖံးတၫ်မၤတဖၣ်၀ံၤ စံာ်တၫ်မၤကစၫ်လၢအခဲအံၤ ချိၣ်ထူလီၤလၢအစံာ်ပူၤတဖၣ်စ့ၫ်ကီး အပူၤကွံာ်ကူ၀ဲတၫ်ယီၤဘုအကတီၫ် ဘုအပှ့ၤကလံၤတဂ့ၤဘၣ်အဃိ ကွၫ်ဆၢၣ်မဲာ်ဘၣ်တၫ်ဆံးလီၤစှၤလီၤတဖၣ်တကးဘၣ် လၢအခဲအံၤ ကွၫ်ဆၢၣ်မဲာ်ဘၣ်ကဒီးချိၣ်ထူ လၢမၤဟးဂီၤတၫ်တဖၣ်န့ၣ်လီၤ.
သုးဟံးန့ၫ်ထံကီၫ်တၫ်စိတၫ်ကမီၤ(၄)နံၣ်ဘျဲၣ်အတီၫ်ပူၤ လၢတၫ်သူၣ်ဘုအပူၤ တၫ်ဘၣ်သူ၀ဲဂာ်တဖၣ်,ကသံၣ်မၤသံတၫ်ဃၣ်,ကသံၣ်မၤသံနီၣ်,ထူၣ်ဒီးစဲးသိတဖၣ် အပှ့ၤကလံၤဒိၣ်ထီၣ်တလၢအခၢးအဃိ ပှၤမၤစံာ်ဖိတဖၣ် သူ၀ဲကသံၣ်မၤသံတၫ်ဃၣ်ဒီးနီၣ်တဖၣ်တန့ၫ်ဒ်သိးအပူၤကွံာ်လၢၤဘၣ်အဂ့ၫ် ပှၤထူစံာ်ဖိတဖၣ်တဲ၀ဲလီၤ.
Ref: DVB
