လါယူၤ(၅)သီ,၂၀၂၅နံၣ်
ကီၢ်ကရ့ၣ်နံၣ်,ဘီလခဲကီၢ်ဆၣ်အပူၤအိၣ်သုးကီၣ်ကးကၣ်က့သုးကလၢၤတဖျၢၣ်အံၤကရ့ၣ်နံၣ်ဒီကလုၥ်တၢ်ဒီသဒၢသုး(KNDF)ဒီးတၢ်ပၢၢ်ဆၢသုးပၥ်ဖှိၣ်တဖၣ်ထီၣ်ဒုးမၤန့ၢ်၀ဲအဂ့ၢ်ဒီးတၢ်ထီၣ်ဒုးမၤန့ၢ်သုးကလၢၤအပူၤသုးကီၣ်ကးအပှၤသုးဖိသံ (၂၀)ဂၤ၀ံၤတၢ်မၤန့ၢ်စ့ၢ်ကီဒီးစုက၀ဲၤကျိချံပှၥ်သၣ်တဖၣ်အဂ့ၢ် ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဃၥ်၀ဲန့ၣ်လီၤ.
ကရ့ၣ်နံၣ်သုးမုၢ်ဒိၣ်(KA)ဒီး KNDFသုးပၥ်ဖှိၣ်တဖၣ် စးထီၣ်ထီၣ်ဒုး ဘီလခဲ၀့ၢ် ယ့ၣ်နံၣ်ပီးကၣ်က့သုးကလၢၤအံၤ ဖဲလါမ့ၤ(၂၂)သီအနံၤဒီးဒုးမၤန့ၢ်၀ဲဖဲလါယူၤ(၄)သီအနံၤန့ၣ်လီၤ.
ယ့ၣ်နံၣ်ပီးကၣ်က့သုးကလၢၤအံၤန့ၣ် အိၣ်ဆီလီၤဃၥ်အသးဖဲ ဃိၣ်လိၥ်ကျိမုၢ်ထီၣ်တကပၤ၀ံၤ KA ၊ KNDFသုးပၥ်ဖှိၣ်တဖၣ်လဲၤတ့ၢ်လီၤဒြိမ့ၣ်ပိၢ်တဖၣ်တကးဘၣ်ခး၀ဲလၢအၣ်ပံၣ်ကၠံၣ်တဖၣ်အသိးသုးကီၣ်ကးတပၤစ့ၢ်ကီးဟဲခးစၢၤ၀ဲဒၣ်လၢကဘီယူၤတစှၤန့ၢ်(၇)ဘျီ၀ံၤခးစၢၤ၀ဲဒၣ်လၢ(၁၂၀)မမကျိဖးဒိၣ်တဖၣ်အဂ့ၢ်တၢ်သ့ၣ်ညါဘၣ်န့ၣ်လီၤ.
တၢ်ထီၣ်ဒုးမၤန့ၢ် ယ့ၣ်နံၣ်ပီးကၣ်က့သုးကလၢၤ၀ံၤအလီၢ်ခံ တၢ်မၤတၢ်ရှဲပျီဟီၣ်က၀ီၤအဆၢကတီၢ် တၢ်ထံၣ်န့ၢ်၀ဲသုးကီၣ်ကးအပှၤသုးဖိ တၢ်သံအစိၣ်(၂၀)ဂၤ၀ံၤ တၢ်မၤန့ၢ်စ့ၢ်ကီး စုက၀ဲၤကျိချံပှၥ်သၣ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကရ့ၣ်နံၣ်တၢ်ပၢၢ်ဆၢသုးပၥ်ဖှိၣ်တဖၣ် မၤတၢ်ထီၣ်ဒုး ဒုးယၤရဲၣ်ကျဲၤလၢ ၀့ၢ်ဘီလခဲအပူၤ သုးကီၣ်ကးနီၣ်ဂံၢ်(၄၂၉),(၄၃၀)ခီၣ်ချ့သုးရ့ၣ်ဒီးနီၣ်ဂံၢ်(၃၃၇)ခီၣ်သုးရ့ၣ်တဖၣ်အိၣ်၀ဲ၀ံၤ သုးရ့ၣ်တဖၣ်အံၤ မၤပှဲၤဃၥ်အသုးအဂံၢ်အဘါလၢယိၤဒိၣ်ကီၢ်စဲၣ်မုၢ်ထီၣ်ကလံၤထံးနီၣ်ဂံၢ်(၂)သုးတၢ်နဲၣ်လီၤအတၢ်ပၢဆှၢရဲၣ်ကျဲၤအစုတီၤဖီလၥ် သုးရ့ၣ်တဖၣ်န့ၣ်လီၤ.
