လါယူၤ(၃)သီ,၂၀၂၅နံၣ်
ဖဲလါယူၤ(၁)သီနံၤ,မုၫ်နၤခီအကတီၫ် ယူၣ်ကရ့ဒုးရၢရှၢၣ်လၢဒြိတဖၣ်အါအါဂီၫ်ဂီၫ်အဃိ ရၢးရှၢၣ်အကဘီယူၤ လၢတ့ၫ်လီၤမ့ၣ်ပိၫ်(၁၃)ခိၣ် လၢလီၤလၢလၢဒီၣ်လၣ်ဘံၣ်လံၣ်ယၣ်တဖၣ် ဘၣ်ဟးဂီၤကွံာ်၀ဲအဂ့ၫ် ယူၣ်ကရ့ပှၤဘၣ်မူဘၣ်ဒါ တဂၤတဲ၀ဲလီၤ.
တၫ်ကစီၣ်တဖၣ်ပာ်ဖျါ၀ဲလၢ ရၢရှၢၣ်ကလံၤသုးကလၢၤ(၄)ခါ ယူၣ်ကရ့ဒုး၀ဲလၢတၫ်သူၣ်ဒူသးဒူအပူၤ၀ံၤ ရၢရှၢၣ်အကဘီယူၤလၢတ့ၫ်လီၤမ့ၣ်ပိၫ်အခိၣ်(၄၀)လၢလူၤတ့ၫ်လီၤမ့ၣ်ပိၫ် လၢယူၣ်ကရ့ဒူသ၀ီတဖၣ်အဖီခိၣ် ဘၣ်ဟးဂီၤကွံာ်၀ဲအဂ့ၫ် ယူၣ်ကရ့တဲဃာ်၀ဲဂၢၫ်ဂၢၫ်ကျၢၤကျၢၤ၀ဲလီၤ.
ရၢးရှၢၣ်တဲစ့ၫ်ကီး၀ဲလၢယူၣ်ကရ့ဒြိ(၁၁၇)ခိၣ်လၢကဒုးဃီၤရၢးရှၢၣ်ကလံၤသုးကလၢၤတဖၣ်န့ၣ် တၫ်ခးလီၤတဲာ်ကွံာ်၀ဲန့ၫ် အဂ့ၫ်န့ၣ်လီၤ.လၢကတီၫ်အံၤ ယူၣ်ကရ့ဒီးရၢးရှၢၣ်အဘၢၣ်စၢၤ တၫ်တၢၣ်ပီၣ်တဲသကိးတၫ်မုာ်တၫ်ခုၣ် ခံ၀ီတ၀ီအဂီၫ် ခံကပၤခၢၣ်စးတဖၣ်န့ၣ် လဲၤတုၤဆူကီၫ်ထၢၣ်ခံၣ်,အံၣ်စတၣ်ဘူၣ်လံန့ၣ်လီၤ.
ခံကပၤအဘၢၣ်စၢၤ တၫ်တၢၣ်ပီၣ်တဲသကိးလၢကဲထီၣ်သ့တဖၣ် လၢအဘျူးအဖှိၣ်တအိၣ်ဘၣ်အပူၤ ရၢးရှၢၣ်မၤ၀ဲအဂ့ၫ် ယူၣ်ကရ့ကီၫ်ခိၣ် စံၣ်လၣ်စကံတဲ၀ဲလီၤ.ဖဲအပူၤကွံာ် လၢအံၣ်စတၣ်ဘူၣ်တၫ်တၢၣ်ပီၣ်တဲသကိးအပူၤတခီ မ့တမ့ၫ်လၢ တၫ်ဆီတလဲပှၤသုးဖိလၢတၫ်ဖီၣ်န့ၫ်တဖၣ်န့ၣ် တၫ်အၢၣ်လီၤလီၤလီၤဆီဆီတဖၣ် တဒိးန့ၫ်၀ဲဘၣ်.
လၢကတီၫ်အံၤတၫ်တၢၣ်ပီၣ်တဲသကိးအဂီၫ် ရၢးရှၢၣ်တတဲဖျါထီၣ်၀ဲနီတမံၤဒံးဘၣ်ဆၣ် တၫ်တၢၫ်ပီၣ်တဲသကိးအဂီၫ် ဆှၢလီၤဃာ်ခၢၣ်စးတဖၣ်ဆူကီၫ်ထၢၣ်ခံၣ်လံအဂ့ၫ် ယူၣ်ကရ့ကီၫ်ခိၣ် စံၣ်လၣ်စကံတဲ၀ဲလီၤ.
အမဲရကၤကီၫ်ခိၣ်ဒီနၢၣ်ထရၢးတခီ မ့ၫ်တထံၣ်လိာ်သးဒီးရၢးရှၢၣ်ကီၫ်ခိၣ်ပူၣ်တ့ၣ်တစု ယူၣ်ကရ့တၫ်ဒုးကပတုာ်အဂီၫ် တၫ်လဲၤထီၣ်လဲၤထီတမ့ၫ်ကအိၣ်ဘၣ်အဂ့ၫ် လၢအပူၤကွံာ်န့ၣ် ထုးထီၣ်တဲဖျါဃာ်၀ဲလီၤ.
