Radio တၢ်ကစီၣ် ခိၣ်ဃၢၤန့ဆၢၣ် တၢ်ကစီၣ်

ရၢၫ်ခၢၣ်ကီၫ်စဲၣ်,၀့ၫ်(၃)၀့ၫ်အပူၤ ထံဒိၣ်နိယွၤကဲထီၣ်

လါယူၤ(၃)သီ,၂၀၂၅နံၣ်

ရၢၫ်ခၢၣ်ကီၫ်စဲၣ်,ကၠီးတီၣ်,မၠီးအူဒီးတီၣ်ကိးကီၫ်ဆၣ်တဖၣ်အပူၤ မူခိၣ်စူးဖးဒိၣ်ဒီးကလါတၣ်ထံကျိထံဒိၣ်ထီၣ်အဃိ ထံဒိၣ်နိယွၤကဲထီၣ်၀ဲအဂ့ၫ် တၫ်သ့ၣ်ညါဘၣ်လၢပှၤလီၫ်က၀ီၤဖိတဖၣ်အိၣ်န့ၣ်လီၤ.

ကၠီးတီၣ်ကီၫ်ဆၣ်ပူၤ,မဟၣ်မၠးမူးနံးဖယါအကပိာ်ကပၤ ဒူသ၀ီတဖၣ်လၢအမ့ၫ် စပါဆ့း,သၣ်ယၣ်ကိ,ညီၣ်ခၠီ,ယွၣ်မးပၠ့ၣ်, သယဲးတပ့ၣ်,ကၠီးတလိ,မ့သါတီၣ်သ၀ီတဖၣ်ဒီးလၢ၀့ၫ်မၠီးအူ,ကၠီးကၠး,ကၣ်ယၣ်တီၣ်သ၀ီတဖၣ်ပာ်ဃုာ် ကၠီးတီၣ်-မၠီးအူ ကျဲမုၫ်ဒီတကျိၤ ဒူသ၀ီတဖၣ်စ့ၫ်ကီးထံဒိၣ်ဘၢတၫ်ကဲထီၣ်၀ဲအဂ့ၫ် တၫ်သ့ၣ်ညါဘၣ်လီၤ.

“တၫ်လီၫ်ခိၣ်သ့ၣ်လၢထံဒိၣ်တဖၣ်န့ၣ် မ့ၫ်၀ဲဖဲကၠီးတီၣ်ဒီးမၠီးအူအဆၢန့ၣ်လီၤ.ထံဒိၣ်တၫ်အိၣ်သးန့ၣ် လၢတၫ်လီၫ်တနီၤအပူၤ ဘၢပှၤနီၫ်တဂၤန့ၣ်လီၤ.တၫ်လီၫ်တနီၤဒုထံတုၤလၢယီၫ်ဒ့ညါလီၤ.ဟံၣ်ဃီလၢထံဘၢအိၣ်၀ဲလီၤ. ကျးတဖၣ်စ့ၫ်ကီး ဘၣ်တၫ်ကးတံာ်ဃာ်၀ဲအဂ့ၫ်”လီၫ်က၀ီၤဖိတဂၤတဲ၀ဲလီၤ.

လၢကတီၫ်အံၤ ပှၤလၢတူၫ်ဘၣ်ထံလုၫ်ဘၢတၫ်တဖၣ် လၢဂ့ၫ်ဂီၫ်အူအပူၤ ဘၣ်သုးအသးဆူတၫ်လီၫ်ထီၣ်ထီဒီး လၢသီခါဖၠၣ်တဖၣ်အဂ့ၫ်န့ၣ်လီၤ.

မူခိၣ်စူၤဒိၣ်ဒိၣ်မုာ်မုာ်အဃိ ရၢၫ်ခၢၣ်ရိမးကစၢၫ်ထံဒီးထံကျိထံဒိၣ်ထီၣ်အဃိ ထံနုာ်လီၤဆူဒူသ၀ီတဖၣ်အပူၤ၀ံၤ ကျဲမုၫ်ဖီ ခိၣ်စ့ၫ်ကီးထံဒိၣ်ဘၢအဃိ သိလ့ၣ်တဖၣ်လ့ၤထီၣ်လ့ၤလိၤတန့ၫ်လၢၤဘၣ်အဂ့ၫ် တၫ်သ့ၣ်ညါဘၣ်လီၤ.

“မူခိၣ်ဒုစူၤအဖၢမုၫ်လီၤ.တၫ်လီၫ်လၢထံတဒိၣ်ဘၢတဖၣ်န့ၣ် အိၣ်တ့ၫ်ဒၣ်လၢတၫ်လီၫ်လၢအကစီၤထီၣ်ထီတဖၣ်လီၤ. တၫ်လီၫ်လၢအ့ၣ်ထၢၣ်နဲးဒီးလီတဲစိတၫ်ဆဲးကျိးန့ၫ်အလီၫ်တဖၣ်ဒုန့ၫ်လီၤ.ဘၣ်ဆၣ်သနာ်က့တၫ်ဆဲးကျိးလဲတဖၣ်န့ၣ်တဂ့ၤအါဘၣ်.

“လၢတီၣ်ကိးစ့ၫ်ကီး လၢတၫ်လီၫ်အါတက့ၫ်အပူၤ ထံဒိၣ်၀ဲလီၤ.၀့ၫ်တီၣ်ကိး ဆ့ယိတါကျဲ(ကလံၤထံး)မုၫ်နၤကျး အခိၣ် ထိးစ့ၫ်ကီး ထံဒိၣ်၀ဲလီၤ.တနံၤအံၤထံဒိၣ်ထီၣ်သ့ဒံးလီၤ.အခဲအံၤထံဒိၣ်န့ၣ် မ့ၫ်ဒၣ်စးထီၣ်သီဒံးလီၤ.တီၣ်ကိးန့ၣ် မူခိၣ်မ့ၫ် စူၤဒိၣ်ထီၣ်တစဲးန့ၣ်ထံနုာ်လီၤ၀ဲအဂ့ၫ်”လီၫ်က၀ီၤဖိတဂၤတဲ၀ဲလီၤ.

အပူၤကွံာ် စးထီၣ်ဖဲလါမ့ၤ(၂၆)သီအနံၤန့ၣ် မူခိၣ်စူၤလီၤတပယူာ်ဃီအဃိ ရၢၫ်ခၢၣ်ကီၫ်စဲၣ်ပာ်ဃုာ် ကီၫ်ခီဒီးကီၫ်စဲၣ်တနီၤအပူၤ မူခိၣ်စူၤထံဒိၣ်၀ဲလီၤ.

အပူၤကွံာ် ၂၀၂၄နံၣ်အပူၤစ့ၫ်ကီး ရၢၫ်ခၢၣ်ကီၫ်စဲၣ်ပူၤ မူခိၣ်စူၤဒိၣ်အဃိ ကၠီးတီၣ်,မၠီးအူ,ပိၣ်နါကၠိကီၫ်ဆၣ်တဖၣ်အပူၤ ထံဒိၣ်နိယွၤကဲထီၣ်၀ံၤ ပှၤလၢကလးဂၤ ကွၫ်ဆၢၣ်မဲာ်ဘၣ်တၫ်ကီတၫ်ခဲအဂ့ၫ်တၫ်သ့ၣ်ညါဘၣ်လီၤ.

မူခိၣ်ကလံၤသီၣ်ဂီၤ၀ဲၤကျိၤ အလါယူၤ(၂)သီ တၫ်ထုးထီၣ်ဘိးဘၣ်ရၤလီၤအဖီခိၣ် ရၢၫ်ခၢၣ်ကီၫ်စဲၣ်ပူၤ လၢတၫ်လီၫ် စုာ်စုာ်အပူၤ မူခိၣ်စူၤဒိၣ်သ့၀ံၤ ထံတၫ်အၢၣ်ကစၢၫ်တဖၣ်ကဲထီၣ်သ့အဂ့ၫ် တၫ်သ့ၣ်ညါဘၣ်လီၤ.

ဖဲထံတၫ်အၢၣ်ကစၢၫ်တဖၣ် သုးအသးအလီၫ်န့ၣ် မူခိၣ်စူၤဒီးကလံၤအူသ့,တၫ်စူၤပူၤတီၤပူၤတီၤသ့,လီဖျးသ့, လီ၀ၫ်ဒံးဟဲ သ့,ထံဖျၢၣ်ကိၫ်လိၣ်တဖၣ်လီၤတဲာ် ကဲထီၣ်သ့၀ဲန့ၣ်လီၤ.

တကးဘၣ် ကီၫ်ပယီၤပီၣ်လဲၣ်နံၤဒီးလၢပီၣ်လဲၣ်ပူၤတဖၣ် ကလံၤအူသ့၀ဲတဘျီတခီၣ်၀ံၤလပီဒိၣ်ထီၣ်သ့ဒီး ဖဲကလံၤ အူတၫ်အကတီၫ် ထံကျါ,ခိခိၣ်ကလံၤန့ၣ် တနၣ်ရံၣ်အူတၫ်သ့တုၤ(၃၅)မဲၣ်ဒီးလပီအကစီၤထီၣ်ထီ (၉)ပျၫ်တုၤ(၁၃)ပျၫ် သ့၀ဲအဂ့ၫ် တၫ်သ့ၣ်ညါဘၣ်လီၤ.

Ref: VOM

    X