လါယူၤ(၃)သီ,၂၀၂၅နံၣ်
UWSA”၀း”သုးမုၢ်ဒိၣ်န့ၣ် ကၠီၣ်တဲၣ်-ပယီၤကီၢ်ဆၢအိၣ် အ၀ဲသ့ၣ် (၁၇၁)သုးဟီၣ်က၀ီၤအပူၤ မၤတ့ၢ်၀ဲ သုးတၢ်ဂဲၤလိတခါလၢ အပှၤသုးဖိဂံၢ်ဘါ(၁)ကထိဘျဲၣ်န့ၣ်လီၤ.
သုးတၢ်ဂဲၤလိလၢအပၣ်ဃုၥ်ဒီးစုက၀ဲၤကျိချံပှၥ်သၣ်လၢလၢပှဲၤပှဲၤ တၢ်ရဲၣ်တၢ်ကျဲၤတၢ်ဂီၤမူတဖၣ်န့ၣ် ဖဲလါမ့ၤလီၢ်ခံကတၢၢ်တနွံန့ၣ် ပၥ်ဖျါထီၣ်၀ဲဒၣ်လၢ အ၀ဲသ့ၣ်တၢ်ကစီၣ်သန့တခါလၢအမ့ၢ် WSTVအပူၤန့ၣ်လီၤ.
တၢ်ရဲၣ်တၢ်ကျဲၤအပူၤ UWSAလီၢ်ခၢၣ်သးကမံးတံၥ်ကရၢဖိလၢအမ့ၢ် အူကၠီးကီၣ်အါဒီးပတီၢ်ထီခိၣ်နၢ်တဖၣ် ဟဲထီၣ်၀ဲန့ၣ်လီၤ. ကီၢ်ကၠီၣ်တဲၣ်ကီၢ်ဆၢ ထံကျိၤတဖၣ်အကပၤ ခီဖျိ UWSA မၤ၀ဲတၢ်ခူၣ်လၢၢ်ခူၣ်ထူတၢ်ဖံးတၢ်မၤတဖၣ်အဃိ ထံကျိထံဘၣ်အၢထီၣ်တၢ်ဂ့ၢ်, ကီၢ်ဆၢဟီၣ်က၀ီၤအပူၤ ဘၣ်ထွဲဒီးတၢ်ထုးထီၣ်ကသံၣ်မူၤဘှီးတၢ်ဂ့ၢ်တဖၣ် တၢ်ကဘှါရှဲအီၤအဂီၢ် ကၠီၣ်တဲၣ်တပၤဟ့ၣ်တၢ်ဆီၣ်သနံးအဆၢကတီၢ် တၢ်ရဲၣ်ကျဲၤမၤ၀ဲ သုးတၢ်ဂဲၤလိအံၤန့ၣ်လီၤ.
“၀”သုးမုၢ်ဒိၣ် တၢ်ရ့လိၥ်မုၥ်လိၥ်ပှၤဘၣ်မူဘၣ်ဒါ အူညံၣ်ရါတခီ သုးတၢ်ဂဲၤလိလၢတၢ်မၤအီၤအံၤန့ၣ် မ့ၢ်ဒၣ် တၢ်မၤအီၤညီနုၥ်လီၤအဂ့ၢ် စံး၀ဲန့ၣ်လီၤ.“တၢ်အံၤန့ၣ် တၢ်မၤအီၤ ညီနုၥ်လီၤ.”အဂ့ၢ် အ၀ဲစံး၀ဲန့ၣ်လီၤ.
ယိၤဒိၣ်ကီၢ်စဲၣ် မုၢ်ထီၣ်တပၤ ပယီၤ-ကၠီၣ်တဲၣ်ကီၢ်ဆၢအိၣ် တၣ်ခၠံၣ်လ့း, မဲဆဲး, မဲတိၣ်, ဟွ့ၣ်အီၣ်ဒီး ပိၣ်ပၣ်ကၠ့လီၢ်က၀ီၤအပူၤအိၣ် ကီၢ်ဆၣ်တဖၣ်န့ၣ် UWSAပၥ်ပနီၣ်ဃၥ်၀ဲ ဒ် “၀”ကလံၤထံး ၁၇၁သုးဟီၣ်က၀ီၤအသိးန့ၣ်လီၤ.
တၢ်လီၢ်တဖၣ်အံၤအပူၤန့ၣ် UWSAသုးမုၢ်ဒိၣ်အံၤ ညီနုၥ်ထၢသုးသီတဖၣ်၀ံၤ သုးတၢ်ဂဲၤလိတၢ်ရဲၣ်တၢ်ကျဲၤတဖၣ် စ့ၢ်ကီး မၤ၀ဲခဲအံၤခဲအံၤန့ၣ်လီၤ.
လါအ့ဖြ့ၣ်(၃)သီအနံၤန့ၣ်၁၇၁သုးဟီၣ်က၀ီၤသုးက့(၇၇၈)ဟီၣ်က၀ီၤအပူၤUWSAသုးမုၢ်ဒိၣ် မၤတ့ၢ်၀ဲ သုးတၢ်သိၣ်လိကၠိစံၣ်လီၤတၢ်ရဲၣ်တၢ်ကျဲၤတခါလၢ လီၢ်လၤအိၣ်သုးအဂံၢ်အဘါ(၂၀၀)ဘျဲၣ်အဂ့ၢ် တၢ်ကစီၣ်သန့တနီၤပၥ်ဖျါဃၥ်၀ဲန့ၣ်လီၤ.
တရူးကီၢ်ဆၢ အိၣ်သူၣ်လီၤ UWSAသုးမုၢ်ဒိၣ်န့ၣ် ကီၢ်ပယီၤအပူၤ မ့ၢ်ကလုၥ်ဒူၣ်ပှၤဖီၣ်စုက၀ဲၤကရၢတဖုလၢ အဂံၢ်အဘါဆူၣ်ကတၢၢ်လီၤဒီး ယိၤဒိၣ်ကီၢ်စဲၣ် မုၢ်ထီၣ် တုၤလၢကၠီၣ်တဲၣ်ကီၢ်ဆၢဟီၣ်က၀ီၤအပူၤန့ၣ် ရၤလီၤဃၥ်၀ဲအသုးအဂံၢ်အဘါတဖၣ်န့ၣ်လီၤ.
ဟီၣ်က၀ီၤတၢ်ဘၣ်ဂံၥ်ဂူၥ် တၢ်ဂ့ၢ်ကီတဖၣ်ကဲထီၣ်တ့ၢ်၀ဲလၢ နံၣ်ယံၤလါထၢဘၣ်ဆၣ် တုၤလၢကၠီၣ်တဲၣ်, မဲၣ်ဟီၣ်စီၣ်ကီၢ်ရ့ၣ်ကီၢ်ဆၢအပူၤန့ၣ် သူၣ်ထီၣ်ဃၥ်၀ဲသုးကလၢၤတဖၣ်အသိး ကၠီၣ်တဲၣ်တပၤစ့ၢ်ကီး ဒ်သိးသုးကလၢၤလၢဟဲသူၣ်ထီၣ်ဃၥ်၀ဲတဖၣ် ကဂုၤက့ၤအသးအဂီၢ် ဃ့ထီၣ်၀ဲခဲအံၤခဲအံၤန့ၣ်လီၤ.
