လါမ့ၤ(၂၈)သီ,၂၀၂၅နံၣ်
ကီၢ်သူလ့ၤတၢ်ပၢဟီၣ်က၀ီၤ, ကၠီၣ်တဲၣ်-ကီၢ်သူလ့ၤကီၢ်ဆၢအိၣ် သ့ၣ်ဘီဘိသုးကလၢၤပၣ်ဃုၥ် သုးကီၣ်ကးသုးကလၢၤတဖၣ် KNLAဒီးသိၣ်မှံကရၢသုးပၥ်ဖှိၣ်တဖၣ် ကမၤ၀ဲတၢ်ထီၣ်ဒုး ဒုးယၤရဲၣ်ကျဲၤတဖၣ်အဃိ လီၢ်က၀ီၤကမျၢၢ်ဖိတဖၣ် လဲၤစံၣ်အိၣ်ကဒုဆူကၠီၣ်တဲၣ်တပၤအဂ့ၢ် တၢ်သ့ၣ်ညါဘၣ်လၢ ကီၢ်ဆၢဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ.
မဟါအနံၤ လါမ့ၤ(၂၇)သီအနံၤ, ဂီၤအဆၢကတီၢ်န့ၣ် ကၠီၣ်တဲၣ်-ကီၢ်သူလ့ၤကီၢ်ဆၢ, ရၤမတံကီၢ်ဆၣ်, သ့ၣ်ဘီဘိ, ဆိၣ်စံမၠဲၣ်, ၀ီၢ်လ့ၤဟီၣ်က၀ီၤအပူၤအိၣ် သုးကီၣ်ကးအသုးကလၢၤတဖၣ် KNLAဒီးသိၣ်မှံသုးပၥ်ဖှိၣ်တဖၣ် ကဒုး၀ဲအဃိ လီၢ်က၀ီၤကမျၢၢ်ဖိတဖၣ်အံၤ လဲၤဃ့ၢ်ကဒုဆူ ကီၢ်ကၠီၣ်တဲၣ်, မီၣ်လံၣ်ခၠဲ, ဖိးဖရး, ဆအိၣ်သ၀ီတပၤအဂ့ၢ် တၢ်သ့ၣ်ညါဘၣ်န့ၣ်လီၤ.
“တၢ်ဒုးတဖၣ် ဟဲဘူးထီၣ်လၢ သ့ၣ်ဘီဘိအကပၤလံ, ဆိၣ်စံမၠဲၣ်တပၤစ့ၢ်ကီးလီၤ. တ့ၢ်လီမ့ၣ်ပိၢ်လၢဒြိဒီးခးလၢစုဘျၢတဖၣ်, ခးကျိဖးဒိၣ်တဖၣ်န့ၣ်လီၤ. အခဲအံၤန့ၣ်ပအိၣ်တဘူၣ်လၢၤဘၣ်. ကဟဲခီအိၣ်လၢ မီၣ်လံၣ်ခၠဲတပၤန့ၣ်လီၤ. ပှၤလၢအိၣ်လၢတီၣ်နံၣ်တပၤတဖၣ်စ့ၢ်ကီး ဟဲခီဆူ သူမွဲခံ, ဖိးဖရးတခီလံ”အဂ့ၢ် ကၠီၣ်တဲၣ်-ကီၢ်သူလ့ၤ ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
လါမ့ၤ(၂၃)သီအနံၤန့ၣ် KNLAသိၣ်မှံသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးဘျၢၣ်ဒိၣ်သုးကလၢၤ၀ံၤအလီၢ်ခံ က၀ီၤဒီၣ်တဲၥ်ဃၥ်၀ဲသ့ၣ်ဘီဘိ,ဆိၣ်စံမၠဲၣ်,အူကရံးထးသုးကလၢၤတဖၣ်အဃိခံခီခံကပၤတၢ်ဒုးတဖၣ်ဆူၣ်ထီၣ်သ့တၢ်အိၣ်သးတဖၣ်အဃိ လီၢ်က၀ီၤကမျၢၢ်ဖိတဖၣ် လဲၤစံၣ်အိၣ်ကဒုဆူ ကၠီၣ်တဲၣ်တပၤအဂ့ၢ် တၢ်သ့ၣ်ညါဘၣ်န့ၣ်လီၤ.
ကၠီၣ်တဲၣ်-ကီၢ်သူလ့ၤဟီၣ်က၀ီၤအပူၤ ကၠီၣ်တဲၣ်သုးမုၢ်ဒိၣ် ဟးဆှၣ်ကွၢ်တၢ်ဘံၣ်တၢ်ဘၢ နၣ်ရံၣ်ပှဲၤပှဲၤ၀ံၤ အိၣ်ကတီၤဃၥ်၀ဲသုးဂ့ၢ်၀ီအဂ့ၢ် တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤန့ၣ် ကီၢ်သူလ့ၤတၢ်ပၢဟီၣ်က၀ီၤအပူၤ ရၤမတံ, ဃိၣ်သၢဖျၢၣ်, ကီးတရံး, ကြုၢ်တု, ဖၣ်ပူၣ်, ဒီၣ်ဖးခိၣ်ဟီၣ်က၀ီၤတဖၣ်အပူၤ သုးဂ့ၢ်၀ီတၢ်ဖ့ၣ်ဆၢဆူၣ်ထီၣ်၀ဲလၢ သုးကီၣ်ကးအသုးဒီး KNLAသိၣ်မှံသုးပၥ်ဖှိၣ်တဖၣ်အဘၢၣ်စၢၤအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: khit thit
