လါမ့ၤ(၂၈)သီ,၂၀၂၅နံၣ်
အ့ၣ်ယၣ်၀တံၣ်ကီၢ်ခီ,တစှၤန့ၣ်ကီၢ်ဆၣ်သၢဘ့ၣ်အပူၤသုးဂ့ၢ်၀ီတၢ်ဖ့ၣ်ဆၢတဖၣ်အိၣ်ထီၣ်၀ံၤတၢ်ဒုးတဖၣ်စ့ၢ်ကီးကဲထီၣ်အဃိ သုးကီၣ်ကးတပၤ သူၣ်ထီၣ်၀ဲမျိၥ်သုးကလၢၤတဖၣ်လၢ တၢ်ခီၣ်ဆၢဒုးတၢ်အဂီၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုးအံၤ ယ့ၣ်ကၠံၣ်, သၣ်ပီဒီးအသိးကီၢ်ဆၣ်သၢဘ့ၣ်ကျဲဂၥ်တဲၥ်အိၣ်တဆ့ၣ်ခၠီသ၀ီတၢ်သိၣ်လိကၠိအအပူၤ ကဟဲသူၣ်ထီၣ်မျိၥ်သုးကလၢၤအဂီၢ်ကတီၤဃၥ်၀ဲအဂ့ၢ်တၢ်သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်တဖၣ်အအိၣ်န့ၣ်လီၤ.
တၢ်လီၢ်လၢကဟဲသူၣ်ထီၣ်မျိၥ်သုးကလၢၤတဖၣ်န့ၣ် သုးဂ့ၢ်၀ီအဂီၢ် ဂ့ၤလၢအိၣ်လၢသုးတၢ်တိၥ်ကူၣ်ကျဲၤအဂီၢ်၀ံၤ တကးဘၣ်တၢ်လဲၤဆူသၣ်ပီမကၠံစ့ၣ်တပၤသ့အသိးယ့ၣ်ကၠံၣ်မျိၥ်သုးလၢတၢ်ဒုးဆူၣ်တပၤစ့ၢ်ကီးတၢ်လဲၤထီၣ်၀ဲသ့အဂ့ၢ် တၢ်သ့ၣ်ညါဘၣ်န့ၣ်လီၤ.
“တၢ်ဒုးအဂီၢ်စ့ၢ်ကီး ကတီၤဃၥ်၀ဲလီၤ. ဒ်န့ၣ်အသိး တၢ်ကလဲၤပှ့ၤတၢ်အဂီၢ်စ့ၢ်ကီး တၢ်ဘၣ်မၤလံၥ်အုၣ်သးန့ၣ်လီၤ. စဲးဖီကဟၣ်သူသိတဖၣ်လ့ၤတက့ၤတၢ်တပျဲၤပှ့ၤ၀ဲဘၣ်. သုးကီၣ်ကးအသုးန့ၣ် ဘၣ်ယိၣ်လၢလီၢ်က၀ီၤဖိတဖၣ် ကမၤစၢၤ AAဒီးPDFပျံၤဒိၣ်မး”အဂ့ၢ် သၣ်ပီလီၢ်က၀ီၤဖိတဂၤ စံး၀ဲန့ၣ်လီၤ.
သုးကီၣ်ကးအသုးအံၤ လ့မၠဲးနၣ်ကီၢ်ဆၣ် ပ့နဲကွ့သ၀ီအကပၤ ဟဲဆီလီၤဃၥ်မျိၥ်သုးကလၢၤလၢ သုးဂံၢ်ဘါအိၣ်(၅၀)ဃၣ်ဃၣ်အသိး အ့ၣ်ကပူၣ်ကီၢ်ဆၣ်, မဲစလံၣ်ကိ၀့ၢ်အပူၤစ့ၢ်ကီး ထၢဖှိၣ်သုးသီတဖၣ်၀ံၤ ဟ့ၣ်၀ဲသုးတၢ်သိၣ်လိတဖၣ်ဒီးကတီၤဃၥ်၀ဲ၀့ၢ်ဒ် သုးတၢ်ခီၣ်ဆၢအဂီၢ်န့ၣ်လီၤ.
အ့ၣ်ကပူၣ်, ကွ့ကီးနီၣ်ဂံၢ်(၅)သုးမုၢ်ဒိၣ်ပတီၢ်ထီသုးတၢ်သိၣ်လိကၠိ(တကက-၅)အကပၤစ့ၢ်ကီး ဆှၢဃၥ်သုးတဖၣ်၀ံၤ ပှၤလၢစံၣ်လီၤသုးတၢ်သိၣ်လိ၀ံၤတဖၣ်တၢ်ဟ့ၣ်သုးတၢ်သိၣ်လိစှၤသီအတီၢ်ပူၤ၀ံၤမၤအါထီၣ်သုးအဂံၢ်အဘါအဂ့ၢ်တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤန့ၣ်အ့ၣ်ကပူၣ်ကီၢ်ဆၣ်,ဘးဘွ့ၣ်ကိသ၀ီအကပၤ,ငသဲခၠီမျိၥ်သုးအကပၤဒီးလ့မၠဲးနၣ်ကီၢ်ဆၣ်အဆၢတၢ်လီၢ်တဖၣ်အပူၤ တၢ်ဒုးတဖၣ်ဆူၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Ayeyarwaddy Times
