လါမ့ၤ(၁၄)သီ,၂၀၂၅နံၣ်
လၢစှၤသီအတီၫ်ပူၤ ရၢရှၢၣ်-ယူၣ်ကရ့တၫ်ထံၣ်လိာ်တၢၣ်ပီၣ်တဲသကိး လၢတၫ်ကမၤ၀ဲဖဲကီၫ်တူၣ်ရကံၣ်အပူၤန့ၣ် သးအိၣ်ပာ်ဃုာ်၀ဲအဂ့ၫ် အမဲရကၤကီၫ်ခိၣ် ဒီနၢၣ်ထရၢးတဲ၀ဲလီၤ.
ယူၣ်ကရ့တၫ်ဒုး တၫ်ကပတုာ်ကွံာ်လၢယံာ်(၃၀)သီအဂီၫ် ဖဲယူၤရပၤထံကီၫ်တဖၣ် ဟ့ၣ်တၫ်ဆီၣ်သနံးရၢရှၢၣ်အကတီၫ် လၢတၫ်တၢၣ်ပီၣ်တဲသကိးဒီးရၢရှၢၣ်အပူၤ ကထံၣ်လိာ်သးဒီးပူၣ်တ့ၣ်အဂီၫ် ကလဲၤအိၣ်ခိး၀ဲလၢတူၣ်ရကံၣ်အဂ့ၫ် ယူၣ် ကရ့ကီၫ်ခိၣ်စံၣ်လၣ်စကံတဲ၀ဲ၀ံၤ ယံာ်(၁)သီအလီၫ်ခံ ထရၢးတဲဖျါထီၣ်၀ဲဒ်သိးအံၤန့ၣ်လီၤ.
အဲၣ်စထၢၣ်တၫ်ထံၣ်လိာ်တၢၣ်ပီၣ်တဲသကိးန့ၣ် ကဲထီၣ်တၫ်မၤစၢၤသ့လၢ တၫ်ပတုာ်ကွံာ်တၫ်ဒုး၀ံၤ ဖဲအိၣ်လၢလီၫ်က၀ီၤ ပူၤအဆၢကတီၫ် ပာ်ဃုာ်လၢတၫ်တၢၣ်ပီၣ်တဲသကိးအပူၤသ့အဂ့ၫ် ထရၢးတဲဘၣ်ပှၤဟံးန့ၫ်တၫ်ကစီၣ်ဖိတဖၣ် ဖဲဟံၣ်၀ါ န့ၣ်လီၤ.လၢကတီၫ်အံၤထရၢးန့ၣ် လဲၤဟးလၢ တၫ်ခၢၣ်သးထံကီၫ်တဖၣ်ဒ်အမ့ၫ် ဆီၣ်ဒံၣ်အၣ်ရ့ဘံယါ, ယူၣ်အ့ၣ်အံဒီး ကၣ်တၣ်ထံကီၫ်တဖၣ်န့ၣ်လီၤ.
တၫ်ထံၣ်လိာ်အိၣ်ဖှိၣ်တဖၣ်အိၣ်၀ဲဘၣ်ဆၣ် ကလဲၤဆူတူၣ်ရကံၣ်အဂီၫ် ဆိမိၣ်ဃာ်၀ဲ၀ံၤ ကဲထီၣ်သးသ့အဂ့ၫ် ဖဲထရၢး တချူးဟးထီၣ်ဆူ ခံ၀ီတ၀ီ ကီၫ်ချၢတၫ်လဲၤတၫ်က့ၤဒံးဘၣ်အကတီၫ် တဲ၀ဲလီၤ.
ရၢရှၢၣ်တခီ တၫ်ကထံၣ်လိာ်သးဒီးပူၣ်တ့ၣ်ဖဲတူၣ်ရကံၣ်အဂီၫ် ယူၣ်ကရ့ကီၫ်ခိၣ်အတၫ်ဃ့ထီၣ်န့ၣ် တတဲခီၣ်ဆၢဃာ်၀ဲ နီတမံၤဒံးဘၣ်.လၢကတီၫ်အံၤ ရၢရှၢၣ်န့ၣ် ဒုး၀ဲယူၣ်ကရ့တပယူာ်ဃီဒံးလီၤ.ရၢရှၢၣ်န့ၣ် ကထံၣ်လိၣ်တၢၣ်ပီၣ်တဲသကိး တၫ်တဘျီဃီအဂီၫ် တၫ်ဃ့ထီၣ်တဖၣ်န့ၣ် အ၀ဲသ့ၣ်အကလုၫ်ဘှ့ၣ်၀ံၤ တၫ်အံၤလီၤဆီဒိၣ်မးအဂ့ၫ် စံၣ်လၣ်စကံၣ်တဲ၀ဲ လီၤ.
ယူၣ်ကရ့တၫ်ဒုး တၫ်ကပတုာ်(၃၀)သီအဂီၫ် မ့ၫ်တတူၫ်လိာ်၀ဲဘၣ်န့ၣ် ယူရပၤထံကီၫ်တကပၤ ကပာ်လီၤတၫ်ကးတံာ်ဟံး န့ၫ်ဂ့ၫ်၀ီအသီလၢရၢရှၢၣ်အဖီခိၣ်အဂ့ၫ် ကၠၢမနံာ်ပဒိၣ် ထုးထီၣ်တဲဖျါ၀ဲဖဲလါမ့ၤ(၁၂)သီအနံၤန့ၣ်လီၤ.
Ref:CNA
