လါမ့ၤ(၁၅)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတခီ အပူၤကွံၥ်ဒီးဆၢကတီၢ်ခဲအံၤအတီၢ်ပူၤန့ၣ် ကအိၣ်မူလဲၤသဃဲၤလိၥ်သးဒီးကၠီၣ်တဲၣ်ထံဖိကီၢ်ဖိတဖၣ်ဂ့ၤဂ့ၤအသိးခါဆူညါစ့ၢ်ကီးန့ၣ်တၢ်ရ့လိၥ်ဘူးတံၢ်ဒီးတၢ်ပၥ်ကဲ လိၥ်သးအဖီခိၣ် ကဆဲးအိၣ်မူလဲၤသဃဲၤလိၥ်သးအဂ့ၢ် ခ့ၣ်အဲၣ်ယူၣ်-ဘျံးဒ၀ဲၢ်ကီၢ်ရ့ၣ် ထုးထီၣ်ပၥ်ဖျါဃၥ်၀ဲန့ၣ်လီၤ.
လါမ့ၤ(၉)သီအနံၤ, တၢ်ထီၣ်ဒုးမၤန့ၢ် သုးကီၣ်ကးထံခံသုးကလၢၤ၀ံၤအလီၢ်ခံ ခ့ၣ်အဲၣ်ယူၣ်-လီၢ်ခၢၣ်သး ဘိးဘၣ်ရၤလီၤ၀ဲဘၣ်ထွဲထံခံသုးဂ့ၢ်၀ီတၢ်အိၣ်သးအဖီခိၣ်တၢ်ဃ့သကွံၥ်ကညးဆူကၠီၣ်တဲၣ်ထံဖိကီၢ်ဖိလၢအိၣ်ဖဲကီၢ်ပယီၤကီၢ်ဆၢဒီတကျိၤအအိၣ်လၢ ကၠီၣ်တဲၣ်,ပယီၤ,ဒီး အဲကလံးသၢကျိၥ်န့ၣ်လီၤ.
“ပ၀ဲတခီ ပအဲၣ်ဒိးအိၣ်မူလဲၤသဃဲၤလိၥ်သးဒီးကီၢ်ကၠီၣ်တဲၣ်လၢတၢ်မုၥ်တၢ်ခုၣ်တပူၤဃီ ဒီး ပဆၢမုၢ်လၢ်စ့ၢ်ကီးလၢ ကၠီၣ်တဲၣ်ထံဖိကီၢ်ဖိတဖၣ် ကအိၣ်ဒီးတၢ်နၢ်ပၢၢ်လိၥ်သးလၢယၢ်ခီယၢ်ခီအဂ့ၢ် “ ကီၢ်ရ့ၣ်ဘျံးဒ၀ဲၢ် ပၥ်ဖျါဃၥ်၀ဲလၢ အလံၥ်ဘိးဘၣ်ရၤလီၤအပူၤန့ၣ်လီၤ.
လါမ့ၤ(၂)သီအနံၤန့ၣ် သုးက့(၄)အစုတီၤဖီလၥ် KNLAသုးပာ်ဖှိၣ်တဖၣ် စးထီၣ်ထီၣ်ဒုး၀ဲထံခံသုးကလၢၤ၀ံၤ ယံၤ(၈)သီအတီၢ်ပူၤန့ၣ် ဒုးမၤန့ၢ်၀ဲ ထံခံသုးကလၢၤအံၤန့ၣ်လီၤ.
ဖဲ၁၉၉၇နံၣ်န့ၣ် ကီၢ်ပယီၤသုးမုၢ်ဒိၣ် ထီၣ်ဒုးမၤန့ၢ် ခ့ၣ်အဲၣ်ယူၣ်-ကီၢ်ရ့ၣ်ဘျံးဒ၀ဲၢ်၀ဲၤလီၢ်၀ံၤအလီၢ်ခံ သုးဂ့ၢ်၀ီတၢ်သဘံၣ်သဘုၣ်တဖၣ်ဒီးလီၢ်က၀ီၤကမျၢၢ်တဖၣ် ဘၣ်သုးလီၢ်သုးကျဲတဖၣ်အိၣ်ထီၣ်၀ဲအဂ့ၢ်, ခ့ၣ်အဲၣ်ယူၣ်-သုးက့(၄)တခီ ကီၢ်ဆၢအိၣ်လီၢ်က၀ီၤကမျၢၢ်တဖၣ် တၢ်ဘံၣ်တၢ်ဘၢအဂီၢ် လိၣ်သပှၢ်ကတၢၢ်လၢ ကဘၣ်ဒုးမၤန့ၢ်ပၢဆှၢက့ၤ၀ဲအဂီၢ် နၥ်၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
ထံဖိကီၢ်ဖိကမျၢၢ်တဖၣ် နီၢ်ကစၢ်တၢ်စံၣ်ညီၣ်ပၢဆှၢလီၥ်သးခွဲးယၥ်ဒီး ကထူၣ်ဖျဲးထီၣ်လၢ သုးမီၤစိရိၤသုးကီၣ်ကးအသုးအတၢ်ဆီၣ်ဘံၣ်ဆီၣ်လၢအဖီလၥ်အဂီၢ် လိၣ်သပှၢၢ်ကတၢၢ်လၢ တၢ်ကဘၣ်ဟံးန့ၢ်ဂ့ၢ်၀ီသုးကီၣ်ကးအဖီခိၣ်လၢ သုးဂ့ၢ်၀ီအဖီခိၣ်အဂီၢ်နၥ်၀ဲအဂ့ၢ် ပၥ်ဖျါဃၥ်၀ဲလၢ အလံၥ်ဘိးဘၣ်ရၤလီၤအပူၤန့ၣ်လီၤ.
တကးဘၣ် ကီၢ်ပယီၤဒီးကၠီၣ်တဲၣ်ထံဖိကီၢ်ဖိကမျၢၢ်တဖၣ် အတၢ်ဘံၣ်တၢ်ဘၢ, တၢ်ပူၤဖျဲးလၢတၢ်လီၤဘၣ်ယိၣ် ဒီး ကအိၣ်မူလၢပှဲၤဒီးတၢ်အိၣ်ကုအီပှဲၤအဂီၢ် တၢ်ဘၣ်ယိၣ်ဘၣ်ဘှီအိၣ်ထီၣ်လၢ သုးမီၤစိရိၤသုးကီၣ်ကးအသုး အတၢ်တိၥ်ကူၣ်ကျဲၤအဃိစ့ၢ်ကီးအဂ့ၢ် ပၥ်ဖျါဃၥ်၀ဲလၢ အလံၥ်ဘိးဘၣ်ရၤလီၤအပူၤန့ၣ်လီၤ.
၂၀၂၅နံၣ်, လါမ့ၤ(၇)သီအနံၤန့ၣ် သုးကီၣ်ကးပဒိၣ် ဘိးဘၣ်ရၤလီၤတၢ်ကစီၣ်လၢ တၢ်ကသူၣ်ထီၣ် ၁၁၀မဲၣ်ဂၣ်၀ဲးအနူးမၠူၣ်လီသဟီၣ်ဆဲးဖီကဟၣ်တဖျၢၣ်တၢ်ဂ့ၢ်အဃိ တၢ်ဘၣ်ယိၣ်ဘၣ်ဘှီအိၣ်ထီၣ်လၢ ထံကီၢ်ခံဘၣ်ထံဖိကီၢ်ဖိကမျၢၢ်တဖၣ်အဂီၢ်အဂ့ၢ် ဒုးသ့ၣ်ညါဃၥ်၀ဲန့ၣ်လီၤ.
ကတီၢ်ခဲအံၤန့ၣ် တၢ်လီၢ်ခံတီၤလၢ တၢ်သူၣ်ထီၣ်အီၤသ့ခံတီၤအဂ့ၢ်ပၥ်ဖျါဃၥ်၀ဲ၀ံၤ တၢ်လီၢ်တဖၣ်လၢတၢ်သူၣ်ထီၣ်အီၤသ့ဒ်အမ့ၢ် ပကိဟီၣ်က၀ီၤတၢ်ချၢၣ်သးဒီး ကၠီၣ်တဲၣ်ကီၢ်ဆၢ တနီသရံၣ်ကီၢ်ခီ, ဒ၀ဲၢ်ဟီၣ်က၀ီၤ, ဒ၀ဲၢ်မုၥ်ကျိၤ၀ဲၤကွၢ်ဟီၣ်က၀ီၤဒိၣ်လီၤဆီအပူၤအဂ့ၢ် ဒုးသ့ၣ်ညါဃၥ်၀ဲန့ၣ်လီၤ.
ခီဖျိ KNUဒီးသုးကီၣ်ကးအသုးအဘၢၣ်စၢၤ သုးဂ့ၢ်၀ီတၢ်ဖ့ၣ်ဆၢတၢ်အိၣ်သးတဖၣ်အဃိ တၢ်ပိၥ်ထွဲထီၣ်အခံလၢအမ့ၢ် တၢ်ဘၣ်ဒိဘၣ်ထံးတဖၣ်အိၣ်ထီၣ်၀ဲအဖီခိၣ် ပဲၥ်ထံနီၤဖး၀ဲဒိၣ်ဒိၣ်ယီၢ်ယီၢ်ဒီး ဒ်တၢ်လၢအသ့အသိး တၢ်ကမၤစှၤလီၤကွံၥ် တၢ်ဘၣ်ဒိဘၣ်ထံးတဖၣ် အဂ့ၤကတၢၢ်အဂ့ၢ် ဒုးသ့ၣ်ညါဃၥ်၀ဲန့ၣ်လီၤ.
ကတီၢ်ခဲအံၤန့ၣ် သုးက့(၄)ဒီးသုးက့(၇)ဟီၣ်က၀ီၤပူၤ သုးကီၣ်ကးသုးကလၢၤတဖၣ်အံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီးသုးပၥ်ဖှိၣ်တဖၣ် ထီၣ်ဒုးမၤ၀ဲတဖျၢၣ်၀ံၤတဖျၢၣ် တပယူၥ်ဃီန့ၣ်လီၤ.
