လါမ့ၤ(၁၄)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့(၆), ကီၢ်ရ့ၣ်ဒူပျၥ်ယၥ်,၀့ၫ်ကီးတရံးအကပၤ ဖဲယၣ်ကိးသ၀ီန့ၣ် သုးကီၣ်ကးအအီၣ်စ့ၣ်ယးသုးကျိၤဒီးကညီဒီကလုာ်တၫ်ထူၣ် ဖျဲးသုးမုၫ်ဒိၣ်(KNLA)သုးပာ်ဖှိၣ်သုးကျိၤတဖၣ် ဖဲလါမ့ၤ(၁၃)သီနံၤ,ဂီၤ(၅)နၣ်ရံၣ်ဃၣ်ဃၣ်အဆၢကတီၫ်န့ၣ် တၫ်ဒုးဆူၣ် ထီၣ်၀ဲအဂ့ၫ် တၫ်မဲာ်ညါဂ့ၫ်ခီၣ်ထံးတၫ်ကစီၣ် တဲ၀ဲလီၤ.
ဖဲလါမ့ၤ(၁၂)သီနံၤ,ကီးတရံးပာ်ဃုာ် မၠးပတဲၣ်,နဘူသ၀ီတဖၣ်အပူၤ သုးကီၣ်ကးဒီးKNLAတီခိၣ်ရိၣ်မဲသုးပာ်ဖှိၣ်တဖၣ် တၫ်ဒုးကဲထီၣ်၀ဲလီၤ.
ကီးတရံးကီၫ်ဆၣ်ပူၤ ဒူသ၀ီတဖၣ်န့ၣ် သုးကီၣ်ကးသုး ခးလီၤ၀ဲလၢကျိဖးဒိၣ်တကးဘၣ်၀့ၫ်ကြူၫ်တုအကပၤစ့ၫ်ကီး တၫ်လီၫ်လၢတၫ်ဒုးတကဲထီၣ်ဘၣ်အပူၤ သုးကီၣ်ကးသုး ခးလီၤ၀ဲလၢကျိဖးဒိၣ်အိၣ်၀ဲန့ၣ်လီၤ.
တၫ်မဲာ်ညါဂ့ၫ်ခီၣ်ထံးတၫ်ကစီၣ်တဂၤတဲ၀ဲလၢ”လၢအ့ရှၢၣ်ကျဲတကပၤဒု တၫ်ဒုးကဲထီၣ်ကိးမုၫ်နံၤလီၤ. အပူၤကွံာ်နံၣ် တၫ် လီၫ်လၢသုးကီၣ်ကးသုးမၤန့ၫ်၀ဲတဖၣ် ပက့ၤမၤန့ၫ်၀ဲလီၤ.ပမၤန့ၫ်က့ၤဖံ၀ါဖၠၣ်ဒီးလဲ၀းတကပၤလီၤ. ကီးတရံးတၫ်လီၫ်အါ တက့ၫ်အပူၤ တၫ်ဒုးကဲထီၣ်၀ဲလီၤ.လၢကတီၫ်အံၤကဲထီၣ်အဖၢမုၫ်ဒံးလီၤအဂ့ၫ်”တဲ၀ဲလီၤ.
၀့ၫ်ကီးတရံးပူၤ ကမျၢၫ်လၢအကထိတဖၣ် သုးကီၣ်ကးတကပၤ တပျဲဟးထီၣ်အ၀ဲသ့ၣ်ဘၣ်အဃိ ကွၫ်ဆၢၣ်မဲာ်ဘၣ် တၫ်အီၣ်တၫ်အီတၫ်ဂ့ၫ်ကီ၀ံၤ ဘၣ်အီ၀ဲမ့ၤချီအိၣ်အဂ့ၫ် ပှၤ၀့ၫ်ဖိလၢအိၣ်ကးတံာ်အသးဖဲန့ၣ်တဂၤတဲ၀ဲလီၤ.
ပှၤ၀့ၫ်ဖိတဂၤတဲ၀ဲလၢ”တဂီၤအံၤတၫ်ဒုးဆူၣ်၀ဲလီၤ.လၢယၣ်ကိးတကပၤဒီးအိၣ်ဘူးဘူးဖိလီၤ.ဟးထီၣ်တန့ၫ်,နုာ်လီၤတန့ၫ်စ့ၫ်ကီးဘၣ်.ပကမၤဒ်လဲၣ်တသ့ၣ်ညါလၢၤဘၣ်.မုာ်ကျိၤ၀ဲၤကွာ်တအိၣ်နီတမံၤဘၣ်.အိၣ်ဒၣ်ကဘၣ်လီၤဒိဒီးသံလီၤ.အခဲအံၤဘၣ်ချီအီၣ်မ့ၤချီလံ.ပှ့ၤတၫ်တန့ၫ်,ဃုစ့ၫ်ကီးတန့ၫ်,တၫ်မၤဒၢးတအိၣ်ဒီးစ့တအိၣ်ဘၣ်.ကွၫ်ဆၢၣ်မဲာ်ဘၣ်တၫ်ကီတၫ်ခဲတၫ်ဃံးတၫ်စ့ၤအဂ့ၫ်”တဲ၀ဲလီၤ.
သုးကီၣ်ကးအစုတီၤဖီလာ် ကညီကီၫ်စဲၣ်ပဒိၣ်ကရၢန့ၣ် လၢကၠဲထံကျိအပူၤ ချံသန့လၢကမျၢၫ်ဟးထီၣ်က့ၤလီၤ၀ဲန့ၣ် ကးတံာ်ကွံာ်၀ဲအဃိ ကွၫ်ဆၢၣ်မဲာ်ဘၣ်တၫ်ကီတၫ်ခဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
လၢကတီၫ်အံၤ တၫ်ဒုးတဖၣ်အဃိ သုးကီၣ်ကးသုးတကပၤ ၀့ၫ်ကီးတရံးပာ်ဃုာ် ဖၣ်အၣ်-ကၠဲတိၤကျဲမုၫ်ဒီတကျိၤဒီး (ခမရ-၅၄၅,ခမရ-၅၄၆)သုးရ့ၣ်တဖၣ်လၢအိၣ်ဆီလီၤဃာ်အသးဖဲ၀့ၫ်ကြူၫ်တုတဖၣ် အိၣ်ကတီၤဃာ်အသး လၢသုး တၫ်ခီၣ်ဆၢအဂီၫ်၀ံၤမၤပှဲၤသုးဖိဂံၫ်ဘါဒီးတၫ်စုက၀ဲၤဂံၫ်ဘါတဖၣ်အဂ့ၫ် တၫ်သ့ၣ်ညါဘၣ်လီၤ.
Ref: DVB
