လါမ့ၤ(၁၃)သီ,၂၀၂၅နံၣ်
တလၢၤကီၫ်စဲၣ်,ကၠဲးထိၣ်ကီၫ်ဆၣ်ပူၤ ၀့ကၣ်သ၀ီဒီးကရ၀့ဆ့းသ၀ီတဖၣ် သုးကီၣ်ကးဒုးခးလီၤ၀ဲလၢကလံၤကျါဒီး ကျိဖးဒိၣ်တဖၣ်အဃိ ကမျၢၫ်ဘၣ်သံ(၁)ဂၤဒီးဘၣ်ဒိဘၣ်ထံး(၆)ဂၤ၀ံၤ ဟံၣ်ဃီဟးဂီၤ၀ဲ(၂၅)ဖျၢၣ်အဂ့ၫ် ကညီဒီကလုာ်စၢဖှိၣ်ကရၢ(KNU)လီၫ်ခၢၣ်သး ထုးထီၣ်ဘိးဘၣ်ရၤလီၤ၀ဲ ဖဲလါမ့ၤ(၁၂)သီအနံၤန့ၣ်လီၤ.
ဖဲလါမ့ၤ(၁၀)သီနံၤ,ဟါ(၄)နၣ်ရံၣ်ဃၣ်ဃၣ်န့ၣ် ၀့ကၣ်သ၀ီန့ၣ် သုးကီၣ်ကးအသုးဟဲတ့ၫ်လီၤမ့ၣ်ပိၫ်(၅)ဖျၢၣ်ခီဖျိလၢ Y-12ကဘီယူၤဒီး ဟံၣ်(၄)ဖျၢၣ်မ့ၣ်အူအီၣ်ကွံာ်၀ံၤ သ၀ီဖိဘၣ်ဒိဘၣ်ထံး(၂)ဂၤအဂ့ၫ် ပာ်ဖျါ၀ဲလီၤ.
ဖဲတနံၤဃီ၀ဲန့ၣ် ဟါ(၄)နၣ်ရံၣ်ဘျဲၣ်အကတီၫ် နီၫ်ဂံၫ်(၄၄) ခီၣ်ချ့သုးတြိၤ၀ဲၤလီၫ်ခိၣ်သ့ၣ် ခးလီၤ၀ဲ(၁၂၀)မမ (၂)ဖျၢၣ် ဒီးလဲၤလီၤတဲာ်ပိၫ်ဖး၀ဲဒၣ်ဖဲ၀့ကၣ်သ၀ီဒီးကလူသ၀ီကရူၫ် ကရ၀့ဆ့းသ၀ီ တါကရၢၫ်ပူၤ၀ံၤ ကရ၀့ဆ့းသ၀ီဖိ ဒီၣ်ခ့ၣ်အ့ သးနံၣ်(၆၆)နံၣ် ကျိဖးဒိၣ်အက့ဘၣ်အခိၣ်သၣ်ဃံအဃိ သံဖဲအလီၫ်တဘျီဃီအသိး ကမျၢၫ်(၂)ဂၤ ဘၣ်ဒိဘၣ်ထံး ဒီးဟံၣ်ဘၣ်ဟးဂီၤ၀ဲ(၆)ဖျၢၣ်အဂ့ၫ် တၫ်သ့ၣ်ညါဘၣ်လီၤ.
ဖဲလါမ့ၤ(၁၁)သီနံၤ,ဂီၤ(၁၀း၄၀)နၣ်ရံၣ်အကတီၫ်စ့ၫ်ကီး ၀့ကၣ်သ၀ီန့ၣ်တၫ်ဟဲတ့ၫ်လီၤပိၣ်(၅၀၀)မ့ၣ်ပိၫ်(၁)ဖျၢၣ် ,ပီၣ်(၂၀၀)မ့ၣ်ပိၫ်(၁)ဖျၢၣ် လၢကဘီယူၤဒုးသုး(၂)ခိၣ်အဃိ ဖိသၣ်(၁)ဂၤပာ်ဃုာ်,သ၀ီဖိ(၂)ဂၤ ဘၣ်ဒိဘၣ်ထံး၀ံၤ ဟံၣ်ဟးဂီၤ၀ဲ(၁၀)ဖျၢၣ်ဘျဲၣ်အဂ့ၫ် KNUတဲဃာ်၀ဲလီၤ.
