လါမ့ၤ(၁၃)သီ,၂၀၂၅နံၣ်
ဖဲမဟါအနံၤ လါမ့ၤ(၁၂)သီအနံၤန့ၣ် သုးမီၤစိရိၤသုးကီၣ်ကးအသုး ကဘီယူၤလဲၤတ့ၢ်လီၤမ့ၣ်ပိၢ်ဆူ စကဲကီၢ်ခီ, ဒံၣ်ပဲယ့ကီၢ်ဆၣ်, အိထ့ၣ်ကွ့သ၀ီတၢ်သိၣ်လိကၠိအဃိ တၢ်သံတၢ်ပှၢ်အိၣ်ထီၣ်တုၤ(၂၂)ဂၤ၀ံၤ ကၠိဖိမုၣ်ခွါခဲလၢၥ်(၂၀)ဂၤဒီး ကၠိသရၣ်မုၣ်ပၣ်ဃုၥ်ခံဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုး ပညိၣ်ဒုးတၢ်သိၣ်လိကၠိအံၤလၢကလံၤကျါတၢ်ဒုးအပူၤ ကၠိဖိလၢဘၣ်သံ၀ဲ(၂၀)ဂၤအကျါ Grade 2ကၠိဖိ(၆)ဂၤ, Grade 3ကၠိဖိ(၃)ဂၤ, Grade 4ကၠိဖိ(၄)ဂၤ, Grade 5ကၠိဖိ (၁)ဂၤ, Grade 7ကၠိဖိ(၃)ဂၤဒီး Grade 9၊ 10၊ 11ကၠိဖိဘၣ်သံ၀ဲတဂၤစုၥ်စုၥ်အဂ့ၢ် တၢ်သ့ၣ်ညါဘၣ်လၢ ကီၢ်ဆၣ်ပကဖဒီးပှၤလၢမၤစၢၤ၀ဲတဖၣ်အအိၣ်န့ၣ်လီၤ.
တကးဘၣ် ကလံၤကျါတၢ်ဒုးခးလီၤတၢ်အပူၤ သရၣ်မုၣ်ဒီၣ်ပါမိးမိး၀့ၣ်ဒီးဒီၣ်စ့ၣ်မၣ်သူၣ်တဖၣ်စ့ၢ်ကီး ဘၣ်သံ၀ဲန့ၣ်လီၤ.
ပှၤလၢဘၣ်ဒိနးနးကလၢၥ်အကျါ တၢ်သံတၢ်ပှၢ်အိၣ်ထီၣ်၀ဲအဃိ တၢ်သံတၢ်ပှၢ်အနီၣ်ဂံၢ်ဟဲအါထီၣ်အဂ့ၢ်န့ၣ် ကီၢ်ဆၣ်ပကဖပှၤဘၣ်မူဘၣ်ဒါတဖၣ် စံး၀ဲန့ၣ်လီၤ.
“မ့ၣ်ပိၢ်န့ၣ်လီၤတဲၥ်လၢကၠိပူၤလိၤလိၤလီၤ. ကၠိန့ၣ်အိၣ်ဒၣ်တကထၢလီၤ. ကၠိအခိၣ်ဒုးတဖၣ် လီၤတပှၢ်ကွံၥ်၀ံၤ ကၠိအဒူၣ်တဖၣ် ထူၣ်ဖျိးကွံၥ်န့ၣ်လီၤ. ဖိသၣ်လၢ ဃ့ၢ်ဟးထီၣ်လၢတၢ်ချၢတဖၣ်တခီ အပူၤဖျဲးအဂ့ၢ်” ဟီၣ်ခိၣ်မဲၥ်ဖံးခိၣ်ပှၤမၤပူၤဖျဲးတၢ်တဂၤ စံး၀ဲန့ၣ်လီၤ.
