လါမ့ၤ(၁၂)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၃), ကီၢ်ရ့ၣ်ချၢၣ်လွံၢ်ထူၣ်,ဆီထံးကီၢ်ဆၣ်အပူၤသုးကီၣ်ကးကလံၤထံးသုး၀ဲၤလီၢ်ခိၣ်သ့ၣ်အစုတီၤဖီလၥ်သုးရ့ၣ်၀ဲၤလီၢ်တခါအံၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲအဂ့ၢ် ဒီကလုၥ်ဃူဖိးပဒိၣ်(NUG) တၢ်ဒီသဒၢကိတိၥ်၀ဲၤကျိၤ(MOD) ပၥ်ဖျါဃၥ်၀ဲဖဲမဟါအနံၤလါမ့ၤ(၁၁)သီအနံၤန့ၣ်လီၤ.
ဘၣ်ထွဲဒီးတၢ်ထီၣ်ဒုးမၤန့ၢ် သုးကလၢၤအံၤအဖီခိၣ် သုးကီၣ်ကးတပၤစ့ၢ်ကီဒီး ပၥ်ဖျါဃၥ်၀ဲတၢ်ကစီၣ်န့ၣ်လီၤ.သုးကီၣ်ကးအသုးတဖၣ် ဂုၤက့ၤအခံလၢ သုးရ့ၣ်အပူၤအံၤတစိၢ်တလီၢ်၀ံၤ မၤပှဲၤဂံၢ်ဘါဟဲထီၣ်ဒုးက့ၤအဃိ တၢ်မၤန့ၢ်က့ၤအီၤဖဲ လါမ့ၤ(၁၁)ဂီၤအဆၢကတီၢ်အဂ့ၢ်ပၥ်ဖျါဃၥ်၀ဲန့ၣ်လီၤ.
မ့မ့ၢ်လၢ (MOD) တခီ သုးကီၣ်ကးအသုး နီၣ်ဂံၢ်(ခမရ-၅၉၈)ခီၣ်ချ့သုးရ့ၣ်၀ဲၤလီၢ်လၢအိၣ်ဆီလီၤဃၥ်သးဖဲညီၣ်ခၠ့ၣ်ထီးသ၀ီ, ဆီထံးကီၢ်ဆၣ်ပူၤအံၤ သုးက့(၃)အစုတီဖီလၥ် KNLA ဒီးသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ ဖဲလါမ့ၤ(၈)သီအနံၤန့ၣ်လီၤ.
တၢ်ဒုးမၤန့ၢ်သုးကလၢၤအပူၤသုးကီၣ်ကးအပှၤသုးဖိသံ၀ဲ(၃၀)ဂၤ၀ံၤတၢ်ဖီၣ်န့ၢ်မူဒံးစ့ၢ်ကီးသုးကီၣ်ကးအပှၤသုးဖိ(၆)ဂၤဒီးအဟံၣ်ဖိဃီဖိ(၇)ဂၤအဂ့ၢ်သုးရ့ၣ်ခိၣ်ပၣ်ယုၥ်သုးခိၣ်သုးနၢ်ဒီးအပှၤသုးဖိ(၅၀)ဂၤဃၣ်ဃၣ်တခီဃ့ၢ်ပဒ့ၣ်ပူၤဖျဲးသုးအဂ့ၢ် NUG MODအလံၥ်ပၥ်ဖျါအပူၤ ပၥ်ဖျါဃၥ်၀ဲန့ၣ်လီၤ.
တၢ်မၤန့ၢ်စ့ၢ်ကီး (၀.၅)ကျိဆဲး, ၇၅နီးပွ့း, ၈၁မမ,၆၀မမကျိဖးဒိၣ်ပၣ်ဃုၥ် စုက၀ဲၤအကလုၥ်ကလုၥ်(၈၃)ခိၣ်, (Jammer)(၃)ဖျၢၣ်ဒီး ကျိချံပှၥ်သၣ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ထီၣ်ဒုး သုးကီၣ်ကး(ခမရ)သုးရ့ၣ်၀ဲၤလီၢ်အပူၤ သုးက့(၃), KNLAသုးရ့ၣ်(၇), ဒြိသုးတဖၣ်, ကလံၤထံးဟီၣ်က၀ီၤ ဒုးယၤရဲၣ်ကျဲၤလီၤဆီသုး-SOF, နီၣ်ဂံၢ်(၁)ဒုးယၤရဲၣ်ကျဲၤဟီၣ်က၀ီၤ, ဒီနးသုးရ့ၣ်, Cloudwingsဒြိသုးရ့ၣ်, နကါဖၠူၣ်သုးရ့ၣ်, တီၣ်ညိၣ်သုးရ့ၣ်, ၇၈၀၅သုးရ့ၣ်, ၇၈၀၁သုးရ့ၣ်, Southern Eagleသုးရ့ၣ်, SOGသုးရ့ၣ်, တလၢၤကမျၢၢ်တၢ်ဒီသဒၢသုး(ပကဖ)ဒီး တၢ်ပၢၢ်ဆၢသုးပၥ်ဖှိၣ်အဂုၤအဂၤတဖၣ်စ့ၢ်ကီးပၣ်ဃုၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
