လါမ့ၤ(၇)သီ, ၂၀၂၅နံၣ်
စကဲကီၢ်ခီ, တၢ်ထီၣ်ဒုးအ့တီၣ်၀့ၢ်တၢ်ဒုးအပူၤ သုးတြိၤ(၇၇)သုးတြိၤခိၣ် သုးခိၣ်ကျၢၢ်ဖိ အီၣ်သဲးအူလၢဘၣ်တၢ်ဖီၣ်န့ၢ်အီၤအံၤ အၢၣ်လီၤ၀ဲ သုးမီၤစိရိၤအသုး အတၢ်မၤကမၣ်တဖၣ်အသိး အၢၣ်လီၤ၀ဲစ့ၢ်ကီး အတၢ်မၤကမၣ်တဖၣ်အဂ့ၢ် ဒီကလုၥ်ဃူဖိးပဒိၣ်(NUG) တၢ်ဒီသဒၢကိတိၥ်၀ဲၤကျိၤ(MOD) ကီၢ်စၢဖှိၣ်ကိတိၥ် အူယံၣ်မိၣ်စံး၀ဲန့ၣ်လီၤ.
ဖဲမဟါအနံၤလၢအလီၤဘၣ် တၢ်သူၣ်ထီၣ်ကမျၢၢ်တၢ်ဒီသဒၢသုးမုၢ်ဒိၣ်(PDF)မုၢ်နံၤဆၢက့ၤပှဲၤထီၣ်(၄)နံၣ်အနံၤန့ၣ် တၢ်ကတိၤလီၤတၢ်အပူၤ တဲလီၤ၀ဲန့ၣ်လီၤ.
“သုးတြိၤ(၇၇)သုးတြိၤခိၣ်ပၣ်ဃုၥ်သုးဖိလၢတၢ်ဖီၣ်န့ၢ်မူဒံးတဖၣ်စ့ၢ်ကီး တဲလီၤ၀ဲအ၀ဲသ့ၣ်အတၢ်မၤကမၣ်တဖၣ်အဂ့ၢ်လီၤ. သုးကီၣ်ကးအတၢ်မၤကမၣ်တဖၣ်န့ၣ် အ၀ဲသ့ၣ်သ့ၣ်ညါ၀ဲလီၤ. အၢၣ်လီၤ၀ဲလၢ ကနုၥ်လီၤပၥ်ဖှိၣ်မၤသကိးတၢ်လၢ တၢ်ထီဒါပၢၢ်ဆၢတၢ်အပူၤ ဒ်အ၀ဲသ့ၣ်တၢ်သ့အိၣ်အသိးအဂ့ၢ်န့ၣ်လီၤ. သုးခိၣ်သုးနၢ်ဒီးသိၣ်ဒူလၢ အိၣ်တ့ၢ်လၢပယီၤသုးကီၣ်ကးအသုးအပူၤတဖၣ်စ့ၢ်ကီး တၢ်ကပတုၥ်ကွံၥ်တၢ်မၤသံမၤ၀ီထံဖိကီၢ်ဖိကမျၢၢ်တဖၣ်ဒီး တၢ်ကလီၤမၣ်ကွံၥ် သုးအၢသုးသီတၢ်ဆိကမိၣ်ဆိကမးတဖၣ်အဂီၢ်” တဲဆီၣ်တခူလီၤ၀ဲအဂ့ၢ် စံး၀ဲန့ၣ်လီၤ.
တကးဘၣ် သုးကီၣ်ကးအသုးအစုတီၤဖီလၥ် သုးခိၣ်သုးနၢ်ဒီးသိၣ်ဒူတဖၣ်စ့ၢ်ကီး တၢ်မ့ၢ်ပတုၥ်ကွံၥ် တၢ်မၤသံမၤ၀ီထံဖိကီၢ်ဖိကမျၢၢ်တဖၣ်န့ၣ် ထံကီၢ်ဒီးကမျၢၢ်တဖၣ် ကမုၥ်ခုၣ်က့ၤအဆိအချ့အသိး ပယီၤသုးမုၢ်ဒိၣ်စ့ၢ်ကီး ကအီၣ်ကူအီပှဲၤအဂ့ၢ် တဲဟ့ၣ်ပလီၢ်လီၤ၀ဲ သုးကီၣ်ကးန့ၣ်လီၤ.
NUGတၢ်ဒီသဒၢကိတိၥ်၀ဲၤကျိၤ နီၣ်ဂံၢ်(၁)သုးဟီၣ်က၀ီၤ တၢ်ရဲၣ်တၢ်ကျဲၤအဖီခိၣ် တၢ်ထီၣ်ဒုးအ့တီၣ်၀့ၢ်လၢ(၈)လါယံၤအဆၢကတီၢ်၀ံၤအလီၢ်ခံ လါအ့ဖြ့ၣ်(၁၇)သီအနံၤန့ၣ် PDF, ကၠိဖိသုးမုၢ်ဒိၣ်(ABSDF), ကခၠ့ၣ်တၢ်ထူၣ်ဖျဲးသုးမုၢ်ဒိၣ်(KIA), ပကဖဒီးသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ အ့တီၣ်၀့ၢ်၀ံၤ တၢ်ဖီၣ်န့ၢ်မူဒံးစ့ၢ်ကီး သုးတြိၤ(၇၇)သုးတြိၤခိၣ် ဒီးသုးဖိတဖၣ်န့ၣ်လီၤ.
Ref: The Irrawaddy
