လါမ့ၤ(၆)သီ,၂၀၂၅နံၣ်
ကၠီၣ်တဲၣ်-ပယီၤကီၢ်ဆၢ တနီသရံၣ်, ဒ၀ဲၢ်ကီၢ်ဆၣ်အပူၤ သုးကီၣ်ကးထံခံသုးကလၢၤအံၤ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုး၀ဲဒီးတကတီၢ်ဃီ သုးကီၣ်ကးတပၤစ့ၢ်ကီး မၤ၀ဲကလံၤကျါတၢ်ဒုးကိးမုၢ်နံၤအသိး ဆှၢအါထီၣ်သုးအဂံၢ်အဘါတဖၣ်အဂ့ၢ် တၢ်သ့ၣ်ညါဘၣ်လၢ သုးဂ့ၢ်၀ီတၢ်ကစီၣ်ဒီးလီၢ်က၀ီၤဖိတဖၣ်အအိၣ်န့ၣ်လီၤ.
ဟီၣ်က၀ီၤအံၤအပူၤ တၢ်လီၢ်အါအါဂီၢ်ဂီၢ် တၢ်ပၢၢ်ဆၢဂံၢ်ဘါကရူၢ်တဖၣ် ပၢဆှၢဃၥ်၀ဲအဃိ သုးကီၣ်ကးတပၤ ဒ်သိးကဆှၢသုးမၤစၢၤအဂီၢ် လဲၤနုၥ်လီၤခီ၀ဲဆူ ကီၢ်ကၠီၣ်တဲၣ်ဟီၣ်က၀ီၤပူၤအဂ့ၢ် KNU/KNLA သုးက့(၄)ပတီၢ်ထီ သုးလီၢ်လၤအိၣ်တဂၤ စံး၀ဲန့ၣ်လီၤ.
“သုးမၤစၢၤဂံၢ်ဘါအိၣ်(၂၀၀)ဃၣ်ဃၣ်လၢကဟဲမၤစၢၤဆူထံထၣ်သုးကလၢၤအံၤတချူးလၢအ၀ဲသ့ၣ်ဟဲတုၤဒံးဘၣ်အဆၢကတီၢ်ထံထၣ်သုးကလၢၤလီၤကွံၥ်အဃိအ၀ဲသ့ၣ်ဟဲနုၥ်လီၤအိၣ်လၢသုးကလၢၤပူၤန့ၣ်လီၤ.အတဖိးမံလိၥ်သးဒီးပတၢ်တိၢ်ပၥ်ဘၣ်ဆၣ် ပကဒုးတုၤအန့ၢ်”န့ၣ်လီၤ.
ကလံၤသုးစ့ၢ်ကီး တနံၤန့ၣ် ဟဲခးလီၤတၢ် သၢဘျီအဂ့ၢ် အ၀ဲစံးအါထီၣ်န့ၣ်လီၤ.
တၢ်ထီၣ်ဒုးမၤန့ၢ် ထံထၣ်သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤ ဖဲလါအ့ဖြ့ၣ်(၁၉)သီအနံၤ၀ံၤအလီၢ်ခံ တၢ်စးထီၣ်ဒုး၀ဲ ထံထၣ်သုးကလၢၤအံၤဒီး ယံၤထီၣ်၀ဲတနွံဃၣ်ဃၣ်လံန့ၣ်လီၤ.
တၢ်ထီၣ်ဒုးထံခံသုးကလၢၤလၢအရ့ဒိၣ်၀ဲဒ် ကီၢ်ဆၢတၢ်ကူၣ်လဲၢ်မၤကၤအပူၤ သုးကီၣ်ကးတပၤခီၣ်ဆၢဒုးတၢ်ဆူၣ်ဆူၣ်ကလၢၥ်၀ံၤ တၢ်ဖီၣ်န့ၢ်မူဒံးသုးကီၣ်ကးအပှၤ(၁၅)ဂၤအကျါ ဒုးယၤခိၣ်စ့ၢ်ကီးပၣ်ဃုၥ်၀ဲအဂ့ၢ် စံး၀ဲန့ၣ်လီၤ.
“တၢ်ထီၣ်ဒုးမၤန့ၢ် သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤအဆၢကတီၢ် သုးကီၣ်ကးတပၤ သုးအဂံၢ်ဘါကအိၣ်တုၤ(၁၀၀)ဘျဲၣ်န့ၣ်လီၤ. တပၥ်လီၤစုက၀ဲၤဘၣ်. တၢ်မၤန့ၢ်စ့ၢ်ကီး စုက၀ဲၤကျိချံပှၥ်သၣ်(၅၀)ဘျဲၣ်န့ၣ်လီၤ. ဂံၢ်ဘါ(၁၀၀)ဘျဲၣ်အကျါ ပှၤသံဒီးပှၤလၢဃ့ၢ်ဖျိးကွံၥ်တဖၣ်စ့ၢ်ကီးအိၣ်၀ဲလီၤ. တၢ်ဖီၣ်န့ၢ်မူဒံး(၁၅)ဂၤအဂ့ၢ်” အ၀ဲစံး၀ဲန့ၣ်လီၤ.
တၢ်ဒုးကဲထီၣ်၀ဲအဆၢကတီၢ် ဒ၀ဲၢ်ကီၢ်ရ့ၣ်, ကီၢ်ဆၣ်လွံၢ်ဘ့ၣ်အပူၤ သုးကီၣ်ကးအသုးဟဲတ့ၢ်လီၤမ့ၣ်ပိၢ်အဃိ လါအ့ဖြ့ၣ်အတီၢ်ပူၤ ကမျၢၢ်(၆)ဂၤသံ၀ဲ, တစှၤန့ၣ်ပှၤ(၁၀)ဂၤဘၣ်ဒိ၀ဲအသိး ပှၤဃ့ၢ်သုးပှၤလီၢ်အိၣ်ကမှံတဖၣ်စ့ၢ်ကီးအိၣ်ထီၣ်တုၤ (၂)ကလးဃၣ်ဃၣ်အဂ့ၢ် တၢ်သ့ၣ်ညါဘၣ်လၢ တၢ်မၤစၢၤ တီနီၢ် တနီသရံၣ်ပှၤလီၢ်အိၣ်ကမှံဖိကရၢတဖၣ်အအိၣ်န့ၣ်လီၤ.
တနီသရံၣ်ကီၢ်ခီအပူၤ အပူၤကွံၥ်လါမးရှးအတီၢ်ပူၤ ပှၤလၢဘၣ်ပၥ်တ့ၢ်အိၣ်ဆိးလီၢ်ကျဲဃ့ၢ်ပူၤဖျဲးသးတဖၣ် အိၣ်ထီၣ်၀ဲ(၆၆၈၀၀)ဘျဲၣ်၀ံၤ ဒ၀ဲၢ်ကီၢ်ရ့ၣ်အပူၤန့ၣ်အိၣ်၀ဲ (၂၇၃၀၀)ဘျဲၣ်လံအဂ့ၢ် တၢ်ဃိထံၣ်သ့ၣ်ညါကရၢလၢအမ့ၢ် FE5Tanintharyi ထုးထီၣ်ပၥ်ဖျါဃၥ်၀ဲဖဲ လါအ့ဖြ့ၣ်(၂၃)သီအနံၤန့ၣ်လီၤ.
ထဲ တနီသရံၣ်ကီၢ်ဆၣ်တဘ့ၣ်အပူၤန့ၣ် လီၢ်က၀ီၤဖိလၢ ပှၤလၢပၥ်တ့ၢ်အိၣ်ဆိးလီၢ်ကျဲဃ့ၢ်ပူၤဖျဲးတဖၣ် အိၣ်ထီၣ်တုၤ(၁၈၅၀၀)အဂ့ၢ် လံၥ်ပၥ်ဖျါအံၤစံး၀ဲန့ၣ်လီၤ.
Ref: Myanmar Now
