လါမ့ၤ(၅)သီ,၂၀၂၅နံၣ်
အပူၤကွံၥ် လါအ့ဖြ့ၣ်တလါအတီၢ်ပူၤ ခီဖျိသုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးမီၤစိရိၤအသုး မၤသံမၤ၀ီတၢ်တဖၣ်အဃိ ပှၤဟူးဂဲၤဒံၣ်မိၣ်ကရ့ၣ်စံၣ်ဂ့ၢ်၀ီဒီးထံဖိကီၢ်ဖိကမျၢၢ်ခဲလၢၥ်ပၥ်ဖှိၣ်(၉၆)ဂၤသံ၀ဲ၀ံၤ ထံရူၢ်ကီၢ်သဲးတၢ်ဂ့ၢ်အဖီခိၣ် တၢ်ဖီၣ်ဃၥ်၀ဲ(၆)ဂၤအဂ့ၢ် တၢ်မၤစၢၤထံရူၢ်ကီၢ်သဲးပှၤလီၤဃိၣ်ဖိကရၢ(AAPP)ထုးထီၣ်ပၥ်ဖျါဃၥ် အလံၥ်ပၥ်ဖျါလၢလါမ့ၤ(၃)သီအနံၤန့ၣ်လီၤ.
ပှၤသံ(၉၆)ဂၤအကျါ ပှၤ(၄)ဂၤန့ၣ် တၢ်ဖီၣ်အီၤ၀ံၤအလီၢ်ခံ တၢ်ဂ့ၢ်အကလုၥ်ကလုၥ်အဖီခိၣ် ဘၣ်သံ၀ဲအဂ့ၢ်တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤပှၤသံနီၣ်ဂံၢ်စရီလၢတၢ်ပၥ်ဖျါထီၣ်အီၤန့ၣ်တၢ်ပၥ်ဂၢၢ်ပၥ်ကျၢၤန့ၢ်အီၤဃုၥ်ဒီးအမံၤ,တၢ်ဂ့ၢ်တၢ်ကျိၤလီၤတံၢ်လီၤဆဲး၀ံၤ မ့မ့ၢ်လၢဟီၣ်ခိၣ်မဲၥ်ဖံးခိၣ်တခီ တၢ်သံတၢ်ပှၢ်နီၣ်ဂံၢ်ကအိၣ်အါန့ၢ်ဒံးတၢ်ပၥ်ဖျါအဂ့ၢ် ဒုးသ့ၣ်ညါဃၥ်၀ဲလၢ အလံၥ်ပၥ်ဖျါအပူၤန့ၣ်လီၤ.
တၢ်ကဘၣ်ပၥ်ဂၢၢ်ပၥ်ကျၢၤအီၤလိၣ်ဒံးလၢ လါအ့ဖြ့ၣ်တလါအတီၢ်ပူၤ ပှၤသံ(၁၅၀)ဂၤဃၣ်ဃၣ်အနီၣ်ဂံၢ်စရီစ့ၢ်ကီး တၢ်ထၢဖှိၣ်ဃၥ်အီၤလီၤဆီ၀ံၤ တၢ်ပၥ်ဂၢၢ်ပၥ်ကျၢၤအီၤကန့ၢ်အဂီၢ် ဂုၥ်ကျဲးစၢး၀ဲအဂ့ၢ် AAPP စံး၀ဲန့ၣ်လီၤ.
ပှၤသံတဖၣ်အံၤ မ့ၢ်ပှၤတဖၣ်လၢအိၣ်ဖဲ မါတလ့,စကဲ,ကညီ,ရၢၢ်ခၢၣ်,ခၠ့, ကရ့ၣ်နံၣ်, တလၢၤ, တနီသရံၣ်,မကွ့ဒီးအ့ၣ်ယၣ်၀တံၣ်ကီၢ်ခီဒီးကီၢ်စဲၣ်တဖၣ်အပူၤ၀ံၤ ဘၣ်သံ၀ဲခီဖျိလၢ သုးကီၣ်ကးမၤကလံၤကျါတၢ်ဒုး, ခးကျိဖးဒိၣ်, ခးသံတၢ်လၢကျိ, လဲၤတ့ၢ်လီၤမ့ၣ်ပိၢ်လၢ Paramotorတဖၣ်အဃိအဂ့ၢ် စံး၀ဲန့ၣ်လီၤ. ဖဲန့ၣ်အကျါ ပှၤသံအါတက့ၢ်န့ၣ် ခီဖျိဘၣ်သံ၀ဲလၢ ကလံၤကျါတၢ်ဒုးအဃိန့ၣ်လီၤ.
သုးမီၤစိရိၤသုးကီၣ်ကးအသုး ဘိးဘၣ်ရၤလီၤတ့ၢ်၀ဲလၢ လါအ့ဖြ့ၣ်(၂)သီတုၤ(၃၀)သီအနံၤလၢဒ်သိး တစိၢ်တလီၢ်တၢ်ပတုၥ်တၢ်ခးအကတီၢ် မၤ၀ဲကလံၤကျါတၢ်ဒုးတဖၣ်ဆူ တၢ်ဘူၣ်တၢ်ဘါတၢ်သူၣ်ထီၣ်လၢဟီၣ်ခိၣ်ဟူး၀းပှၤဘၣ်ကီဘၣ်ခဲဖိတဖၣ်အိၣ်အလီၢ်ပၣ်ဃုၥ် လီၢ်က၀ီၤကမျၢၢ်ဒီးကမျၢၢ်အိၣ်တၢ်သူၣ်ထီၣ်တဖၣ်အဃိအဂ့ၢ် Fortify Rightsကရၢစ့ၢ်ကီး ထုးထီၣ်တဲဖျါဃၥ်၀ဲဖဲ လါမ့ၤ(၃)သီအနံၤန့ၣ်လီၤ.
AAPP အတၢ်ထၢဖှိၣ်တၢ်ဂ့ၢ်တၢ်ကျိၤတဖၣ်အဖီခိၣ် လါအ့ဖြ့ၣ်တလါအတီၢ်ပူၤ ပှၤဘၣ်သံခီဖျိသုးမီၤစိရိၤအသုးအတၢ်မၤသံမၤ၀ီတဖၣ်အကျါ မိၢ်ဒၢဒီးဖိသၣ်ဆံးတဖၣ်စ့ၢ်ကီး ပၣ်ဃုၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
