လါမ့ၤ(၅)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, ကီၢ်ရ့ၣ်မုၢ်တြီၢ်, သုးက့(၅)ဟီၣ်က၀ီၤအပူၤ လါအ့ဖြ့ၣ်တလါအတီၢ်ပူၤတၢ်ဒုးကဲထီၣ်တ့ၢ်၀ဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးကီၣ်ကးအသုးအဘၢၣ်စၢၤ (၁၃၉)ဘျီအပူၤသုးကီၣ်ကးအသုးဘၣ်သံ၀ဲ(၃၉)ဂၤဒီးဘၣ်ဒိ၀ဲ(၅၅)ဂၤအဂ့ၢ်ပှိၥ်လိၥ်FMတၢ်ရၤလီၤတၢ်ကစီၣ် ပၥ်ဖျါဃၥ်၀ဲဖဲ လါမ့ၤ(၄)သီအနံၤန့ၣ်လီၤ.
စးထီၣ်လၢလါအ့ဖြ့ၣ်(၁)သီတုၤ(၃၀)သီအနံၤအတီၢ်ပူၤတၢ်ဒုးလၢကဲထီၣ်တ့ၢ်၀ဲတဖၣ်အပူၤသုးကီၣ်ကးအပှၤသုးဖိသံ (၃၉)ဂၤအကျါပၣ်ဃုၥ်ဒီးသုးခိၣ်ဒိၣ်ဖိ(၂)ဂၤ,သုးစကီၤ(၁၀)ဂၤဒီးပှၤဘၣ်ဒိ(၅၅)ဂၤအကျါပၣ်ဃုၥ်ဒီးသုးစကီၤပြံ(၁)ဂၤဒီးအတၢ်သူၣ်ထီၣ်(၉)ဖျၢၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
ခံခီယၢ်ပၤ တၢ်ဒုးတဖၣ်အပူၤ မ့မ့ၢ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တကပၤတခီ တၢ်ဘၣ်ဒိဘၣ်ထံးအိၣ်ထီၣ်တဆံးတက့ၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိးသုးမီၤစိရိၤသုးကီၣ်ကးအသုးတဖၣ်ခးတပျူၤတပျီၤ၀ဲကျိဖးဒိၣ်အိၣ်ထီၣ်၀ဲ(၇)ဘျီဒီးအကဘီယူၤဒုးသုးဟဲတ့ၢ်လီၤမ့ၣ်ပိၢ်လၢကလံၤကျါ(၁၄)ဖျၢၣ်အဃိဘၣ်သံ၀ဲထံဖိကီၢ်ဖိကမျၢၢ်(၂)ဂၤဒီးဘၣ်ဒိ၀ဲ(၇)ဂၤအဂ့ၢ်ပှိၥ်လိၥ်FMတၢ်ရၤလီၤတၢ်ကစီၣ် ပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ ခီဖျိသုးမိၤစိရိၤသုးကီၣ်ကးအသုး ခးကျိဖးဒိၣ်ဒီးမၤကလံၤကျါတၢ်ဒုးတဖၣ်, ဟဲတ့ၢ်လီၤမ့ၣ်ပိၢ်လၢကဘီယူၤတဖၣ်အဃိ ကမျၢၢ်ဒူသ၀ီဖိတဖၣ် ဘၣ်ပျံၤဘၣ်ဖုးအါထီၣ်ကွ့ၢ်ကွ့ၢ်ဒီး တနီၤဘၣ်သုးလီၢ်သုးကျဲအိၣ်၀ဲတကဘၣ်ဒံးဘၣ်အမဲၥ်ညါ တၢ်ဖံးအီၣ်မၤအီၣ်အလီၢ်အကျဲဟးဂီၤအိၣ်ဃုၥ်၀ဲတနီၤအဂ့ၢ် တၢ်သ့ၣ်ညါဘၣ်န့ၣ်လီၤ.
