လါအ့ဖြ့ၣ်(၃၀)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆), ကီၢ်ရ့ၣ်ဒူပျၥ်ယၥ်, ကီးတရံး၀့ၢ်ပူၤ သုးကီၣ်ကးသုးကလၢၤ(၃)ဖျၢၣ်လၢအိၣ်ဆီလီၤဃၥ်သးအံၤ KNLAတီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ် က၀ီၤကးတံၥ်ဒုး၀ဲတကတီၢ်ဃီအဂ့ၢ် ဂံၢ်ခီၣ်ထံးသုးဂ့ၢ်၀ီတၢ်ကစီၣ်စံး၀ဲန့ၣ်လီၤ.
ကီးတရံး၀့ၢ်ပူၤ သုးမီၤစိရိၤသုးကီၣ်ကးအသုး နီၣ်ဂံၢ်(၁၂)ဒုးယၤရဲၣ်ကျဲၤသုး၀ဲၤလီၢ်ခိၣ်သ့ၣ်အကပၤ ကိတဲၣ်သုးတၢ်လီၢ်, အီၣ်စ့ၣ်ယးဒုးယၤရဲၣ်ကျဲၤ တၢ်လီၢ်ခံတၢ်နဲၣ်လီၤသုးကလၢၤ(ဆွ့ၣ်ကၠဲးမ့သီခါဖၠၣ်)ဒီး (ခလရ-၉၇)သုးရ့ၣ်အလီၢ်ခံ တၢ်ခီၣ်ဆၢသုးတၢ်လီၢ်တဖၣ်အံၤ KNLAတီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ် က၀ီၤကးတံၥ်ဒုး၀ဲတကတီၢ်ဃီအဂ့ၢ် တၢ်သ့ၣ်ညါဘၣ်န့ၣ်လီၤ.
“အကဲထီၣ်သးန့ၣ် တကတီၢ်ဃီလီၤ. စကခ၁၂ ကိတဲၣ်တၢ်လီၢ်, အီၣ်စ့ၣ်ယးသုးတၢ်နဲၣ်လီၤ ဆွ့ၣ်ကၠဲးမ့ၣ်သီခါဖၠၣ်, ခလရ၉၇အလီၢ်ခံ သုးတၢ်ခီၣ်ဆၢတၢ်လီၢ်တဖၣ်လီၤ. ကရၢအါအါဂီၢ်ဂီၢ် က၀ီၤဒုး၀ဲလီၤ. အ၀ဲသ့ၣ်တပၤဒုးတၢ်အသိး ပ၀ဲတပၤစ့ၢ်ကီးဒုးလၢဒြိလီၤ.အ၀ဲသ့ၣ်မ့ၢ်ခးကျိဖးဒိၣ်န့ၣ်ပ၀ဲတပၤစ့ၢ်ကီးက့ၤခးလၢကျိဖးဒိၣ်လီၤ.သုးကီၣ်ကးတပၤတခီ မၤ၀ဲတၢ်ခီၣ်ဆၢတၢ်ဒုးန့ၣ်လီၤ.သံ,ဘၣ်ဒိတဖၣ်တၢ်ဟဲထုးထီၣ်အီၤတန့ၢ်တဖၣ်စ့ၢ်ကီးအိၣ်အဂ့ၢ်”ကီးတရံးKNLAသုးပၥ်ဖှိၣ် အဂံၢ်ခီၣ်ထံးသုးဂ့ၢ်၀ီတၢ်ကစီၣ် စံး၀ဲန့ၣ်လီၤ.
သုးကီၣ်ကးအသုးလၢအိၣ်ဆီလီၤဃၥ်သးလၢကြုၢ်တု, ကၠဲတိၤတဖၣ် ခးစၢၤ၀ဲဟီၣ်၀့ၣ်စၣ်ကျိဖးဒိၣ် တဖၣ်ဆူတၢ်လီၢ်လၢတၢ်ဒုးဆူၣ်တဖၣ်အပူၤမ့ၢ်ဂ့ၤ, လဲၣ်၀းကျိဖးဒိၣ်သုးခးစၢၤကျိဖးဒိၣ်ဆူ ယၣ်ကိးသ၀ီတပၤမ့ၢ်ဂ့ၤ, (ခလရ-၉၇)သုး ဆွ့ၣ်ကၠဲးမ့သုး ခးစၢၤကျိဖးဒိၣ်ဆူ တတၣ်ကူသ၀ီတပၤမ့ၢ်ဂ့ၤအသိး မၤ၀ဲဒြိတၢ်ဒုးတဖၣ်ဘၣ်ဆၣ် KNLAသုးပၥ်ဖှိၣ်တပၤ တၢ်ဘၣ်ဒိဘၣ်ထံးတအိၣ်ဘၣ်အဂ့ၢ်န့ၣ် တၢ်သ့ၣ်ညါဘၣ်န့ၣ်လီၤ.
“စကစ အကျိဖးဒိၣ်တၢ်လီၢ်န့ၣ်အါမးလီၤ. ခးစၢၤ၀ဲလၢ ဟီၣ်၀့ၣ်စၣ်တဖၣ်ဒီး ၁၂၀တဖၣ်လီၤ. သုးကီၣ်ကးအသုးလၢအိၣ်ဖဲကၠဲတိၤ, ကြုၢ်တုသုးတၢ်တိၥ်ကူၣ်ကျဲၤခိၣ်သ့ၣ်, လဲၣ်၀းကျိဖးဒိၣ်တၢ်လူၢ်ခိၣ်တဖၣ် ခးလီၤ၀ဲကျိဖးဒိၣ်အသိး ပ၀ဲတပၤစ့ၢ်ကီး ဒုးတၢ်လၢဒြိ, ခးလီၤ၀ဲဆူ သုးကီၣ်ကးအသုးအိၣ်တၢ်လီၢ်တဖၣ်လီၤ. ကဘီယူၤတခီ ဟဲကွၢ်ဟုၣ်ကွၢ်စုၣ်တၢ်ဘၣ်ဆၣ် တဟဲတ့ၢ်လီၤမ့ၣ်ပိၢ်ဒံးဘၣ်”အဂ့ၢ် ဂံၢ်ခီၣ်ထံးသုးဂ့ၢ်၀ီတၢ်ကစီၣ်စံး၀ဲန့ၣ်လီၤ.
မဟါအနံၤလါအ့ဖြ့ၣ်(၂၉)သီအနံၤ, ဂီၤအဆၢကတီၢ် ခံခီခံကပၤ တၢ်ဒုးဆူၣ်လၢ ဆွ့ၣ်ကၠဲးမ့,တတၣ်ကူတပၤအဃိ ကျိပိၢ်ဖးသီၣ်အကလုၢ်တဖၣ်တၢ်နၢ်ဟူဘၣ်ဖးဒိၣ်ဖးဒိၣ်၀ံၤ ဆွ့ၣ်ကၠဲးမ့သီခါဖၠၣ်တၢ်လီၢ်အိၣ် အီၣ်စ့ၣ်ယးတၢ်လီၢ်ခံသုးခီၣ်ဆၢတၢ်နဲၣ်လီၤသုးကလၢၤအံၤ KNLAတီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ် မ့ၢ်ဒုးမၤန့ၢ်၀ဲန့ၣ် မ့ၢ်တၢ်မၤဟးဂီၤကွံၥ် သုးကီၣ်ကးအရၤမတံ-အ့ရှၢကျဲမုၢ်ဒုးယၤရဲၣ်ကျဲၤလံအဂ့ၢ် ဂံၢ်ခီၣ်ထံးသုးဂ့ၢ်၀ီပှၤဘၣ်မူဘၣ်ဒါ ပဲၥ်ဖံနီၤဖး၀ဲန့ၣ်လီၤ.
Ref: Khit Thit
